Mûbango wa atongoria ba njûûrî cia acikaarî
27
1 Mama i mo mariîtwa ma atongoria ba antû ba Isiraeri bara baarî atongoria ba mîciî, na atongoria ba ikundi bia acikaarî ngiri, atongoria ba acikaarî magana na atongoria bara baatûmîkagîra mûnene Ndaundi îgûrû rîa mûbango wa ikundi kûthûûngîra ngûgîîni na kuuma. Woora mweri wa kîra mwanka, gîkundi mwanya gîa antû ngiri mîrongo îîrî na inya i baarutaga ngûgî kagiita kara babangîrîîtwe.2 Njasobeamu mwana wa Sabundieri aarî mûtongoria wa gîkundi kîa mbere mweri wa mbere, gîkundi gîake kîarî na antû ngiri mîrongo îîrî na inya. 3 We aarî wa rûrîîyo rwa Peresi, n'we aarî mûtongoria wa atongoria bonthe ba acikaarî ba mweri wa mbere.
4 Ndondai Mûaoi wa kuuma Aoi aarî mûtongoria wa gîkundi kîa baîrî mweriini wa îîrî. Gîkundi gîake kîarî na acikaarî ngiri mîrongo îîrî na inya.
5 Mûnene wa gîkundi kîa bithatû kîra kîarî na acikaarî ngiri mîrongo îîrî na inya aarî Benaya mwana wa Njeoyanda mûthînjîri wa Ngai. 6 Ûyû n'we Benaya ûra aarî ncamba ya muntû gîkundiini gîa antû bara mîrongo îthatû na mûtongoria wa gîkundi gîku. Amisabandi mwana wake, aarî mûtongoria wa gîkundi gîku.
7 Asaeri, mûruagina wa Njoabu, aarî wa bana atongoreeretie gîkundi kîa bina kîra kîarî na acikaarî ngiri mîrongo îîrî na inya, na nyuma yake Sebandia mwana wake atuîka mûtongoria.
8 Mûtongoria wa gîkundi kîa bitaano, kîra kîarî kîa mweri wa îtaano, aarî Samuuthi, aarî na gîkundi gîa acikaarî ngiri mîrongo îîrî na inya.
9 Mûtongoria wa gîkundi kîa bithanthatû, kîra kîarî kîa mweri wa îthanthatû, aarî Ira, mwana wa Ikesi, wa kuuma Tekoa, aarî na gîkundi gîa acikaarî ngiri mîrongo îîrî na inya.
10 Mûtongoria wa gîkundi kîa mûgwanja, kîra kîarî kîa mweri wa mûgwanja, aarî Eresi, Mûperoni, wa aana ba Eburaimu; aarî na gîkundi gîa acikaarî ngiri mîrongo îîrî na inya.
11 Mûtongoria wa gîkundi kîa binaana, kîra kîarî kîa mweri wa înaana, aarî Sibekai, wa kuuma Usa, wa Sera; aarî na gîkundi kîa acikaarî ngiri mîrongo îîrî na inya.
12 Mûtongoria wa gîkundi gîa kenda, kîra kîarî kîa mweri wa kenda, aarî Abieseri wa kuuma Anathothi, wa Abenjameni; n'we aarî na gîkundi gîa acikaarî ngiri mîrongo îîrî na inya.
13 Mûtongoria wa gîkundi gîa îkûmi, kîra kîarî kîa mweri wa îkûmi, aarî Maarai, wa kuuma Netofa wa Asera; n'we aarî na gîkundi gîa acikaarî ngiri mîrongo îîrî na inya.
14 Mûtongoria wa gîkundi gîa îkûmi na kîmwe kîra kîarî kîa mweri wa îkûmi na ûmwe, aarî, Benaya, Mûpirathoni, wa aana ba Eburaimu, n'we aarî na gîkundi gîa acikaarî ngiri mîrongo îîrî na inya.
15 Mûtongoria wa gîkundi gîa îkûmi na biîrî, kîra kîarî kîa mweri wa îkûmi îîrî, aarî Erindai, wa kuuma Netofa, wa mûciî wa Othinieri; kinya n'we aarî na gîkundi gîa acikaarî ngiri mîrongo îîrî na inya.
Atongoria ba mîîrîga ya Isiraeri
16 Mama i mo mariîtwa ma atongoria ba mîîrîga ya Isiraeri:
wa mwîrîga wa Rubeni, n'Erieseri mwana wa Sikiri, Erieseri n'we aarî mûtongoria ûra mûnene, wa Simioni, Sefatia mwana wa Maaka,
17 wa Rawi, Asabia, mwana wa Kemueri, wa Arûni, Sandoki,
18 wa Njunda, Eriu, ûmwe wa aruagina ba mûnene Ndaundi, wa Isakaari, Omuri mwana wa Mikaeri,
19 wa Seburuni, Isimaya mwana wa Obandia, wa Nabutarî, Njerimothi, mwana wa Asirieri,
20 wa mûciî wa Eburaimu, Osea mwana wa Asasia, wa nucu mwîrîga wa Manase, Njoeri mwana wa Pendaya,
21 wa nucu îra îîngî ya mwîrîga wa Manase ndeeni ya Ngiriandi, Indo mwana wa Sakaria, na wa Benjameni, Yaasieri mwana wa Abuneri,
22 wa Ndani, Asareri mwana wa Njeroamu. Babu i bo atongoria ba mîîrîga ya Isiraeri.
23 Mûnene Ndaundi ataatara bara baarî ruungu rwa ûkûrû bwa mîanka mîrongo îîrî n'ûntû Mwathani eeranîîte akaathagayia antû ba Isiraeri batuîke baingî ta nthata cia îgûrû. 24 Njoabu mwana wa Seruya aanjîîria gûtarana îndî ataarîîkia, kaîrî mûthûûro wayîîra antû ba Isiraeri n'ûntû bwa gûtarana, narîo îthaabu rîtaandîkwa mabukuuni ma mûnene Ndaundi.
Arûngamîîri ba ûtonga bwa mûnene
25 Mûrûngamîîri wa kîgîîna kîa mûnene Ndaundi aarî Asimabethi mwana wa Andieri. Njonathani mwana wa Usia aarûngamagîîra into bira biarî mîndaani, taûni, ntûûraani na ibayo bira biatûmagîrwa n'ûntû bwa gûcûûbîra. 26 Ûra aarûûngamîrîîte aruti ngûgî ba mînda aarî Esiri mwana wa Kerubi. 27 Ûra aarûûngamîrîîte ngûgî ya mînda ya mîcabiibû aarî Simei, Mûrama. Ûra aarûûngamîrîîte kûrûthwa kwa ndibei aarî Sabundi, Mûsefamu. 28 Ûra aarûûngamîrîîte mîceituuni na mîkûyû ya Sepera aarî Mbaari-Anani, Mûngendera. Ûra aarûûngamîrîîte bianda bia maguta ma mîceituuni aarî Njoasi. 29 Ûra aarûûngamîrîîte nyamû cia ndîîthia ira ciarî Saroni aarî Sitirai Mûsaroni, ûra aarûûngamîrîîte nyamû cia ndîîthia ira ciarî ibondeeni aarî Safati mwana wa Andirai. 30 Ûra aarûûngamîrîîte nkamîîra aarî Obiri Mwisumairi. Ûra aarûûngamîrîîte mang'ooi aarî Yendeya, Mûmeronothi. 31 Ûra aarûûngamîrîîte ntundu cia ng'ondu aarî Njasisi Mûagiri. Babu bonthe baarî amenyeeri ba into bia mûnene Ndaundi.
Eeyani mataaro ba mûnene Ndaundi
32 Njonathani, abuue wa mûnene Ndaundi, aarî mweyani mataaro na muntû aarî na ûmenyo na mwandîki. Wee na Njeiyeri mwana wa Akimoni i bo baarî aarimû ba aana ba mûnene. 33 Aithoferi, aarî mûcoore wa ndeeni wa mûnene, Usai Mûariki, aarî mûcoore wa mûnene. 34 Aithoferi agûkua, bantû aake aathûkua i Njeoyanda mwana wa Benaya na Abiathari. Njoabu aarî mûtongoria wa njûûrî îra yaakaragia mûnene.