Akaria ba Nyomba ya Ngai
26
1 Bibi i bio ikundi bia Arawi bira biarutaga ngûgî ya ûkaria bwa mîrango ya Nyomba ya Ngai.Kuuma mwîrîga wa Kora, aarî;
Sakaria kîîmbere gîake,
Njendiaeri wa baîrî,
Sebandia wa bathatû,
Njathinieri wa bana,
3 Eramu wa bataano,
Njeoanani wa bathanthatû
na Erioenai, wa mûgwanja.
4 Kinya i kwarî na Obendi-Endomu, ûra Ngai athaarimîîte na aana banaana;
Semaya kîîmbere gîake,
Njeosabandi wa baîrî,
Njoa wa bathatû,
Sakari wa bana,
Nethaneri wa bataano,
5 Amieri wa bathanthatû,
Isakaari wa mûgwanja
na Peurethai wa banaana.
6 N'we mwana wake Semaya aagîa na aana bara baarî na wathani îgûrû rîa mûciî wa îthe, n'ûntû baarî ncamba.
7 Aana ba Semaya baarî Othini, Rafaeri, Obendi na Erisabandi. Aruagina Eriu na Semakia, wanabo baarî ncamba. 8 Babu bonthe n'aana ba Obendi-Endomu. Bo na aana baao na aruagina, baarî antû mîrongo îthanthatû na baîrî, ibaarî na inya na i baûmbaga ngûgî.
9 N'we Meseremia n'aarî na aana na aruagina, antû baarî ncamba, bonthe baarî îkûmi na banaana.
10 Osa ûmwe wa aana ba Merari aarî na aana bana, Simuri ûra aatuîkithiirue mûtongoria n'îthe wana wegua ataarî gîtûra îria, 11 Irikia wa baîrî, Tebaria wa bathatû na Sakaria wa bana. Aana bonthe ba Osa amwe na aruagina baarî îkûmi na bathatû.
12 Akaria babu ba mîrango ya Nyomba ya Ngai baagaûkaniirue ikundi kûringana na mîciî yao, na kinya baabangîrwa ngûgî ndeeni ya Nyomba ya Mwathani wa ta Arawi bara bangî. 13 Woora mûciî, îtakûmakania wingî, waringaga kuura kûthuura mwîrîga ûra bagaakaria. 14 Kuura ya kûthuura wa gûkaria mwîrîga wa umîîro bwa riûa yagwîrîîre Seremia. Baaringa kuura n'ûntû bwa mwana wake Sakaria, ûra aarî mweyani mataaro ûmûûgî, kuura ya mwîrîga wa n'egûrû yamûgwîra. 15 Obendi-Endomu aagwîrwa i kuura ya mwîrîga wa n'aiti, na aana baake nabo baagwîrwa i kuura ya gûkaria bianda. 16 Supimu na Osa baagwîrwa i kuura ya gûkaria mwîrîga wa ûthwîro bwa riûa kûra kwarî na mwîrîga wa Sarekethi barabaraani îra yîîtîîtie. Akaria baabangîrîîtwe wa kîra gîkundi na kagiita gaakîo. 17 Wa îra ntugû rûteere rwa umîîro bwa riûa i kwarî na akaria ba mîrango bathanthatû, neegûrû bana, na naiti bana, kinya kîandaani kwagaigwa akaria ba mîrango baîrî baîrî, 18 na kîaragooni kîîthongi kîra kîarî rûteere rwa ûthwîro bwa riûa, i kwarî na akaria bana barabaraani na baîrî kîaragooni kîongwa. 19 Bibi i bio ikundi bia akaria ba mîîrîga kuuma mûciî wa Kora na nciarwa cia Merari bara baarutaga ngûgî ya gûkaria mîîrîga.
Ngûgî ingî cia Nyomba ya Ngai
20 Gatîgatî ka Arawi, Aiya n'we aamenyagîîra mbia cia Nyomba ya Ngai, na kîgîîna gîa into bira biathûrîîtwe. 21 Randani, ûmwe wa mwîrîga wa Ngerisoni, aarî na nciarwa inyingî, na mûtongoria aarî Njeyieri.
22 Aana bara bangî baîrî ba Randani, Setamu na Njoeri, baarî amenyeeri ba kîgîîna kîa Nyomba ya Mwathani.
23 Kinya ngûgî ciagaûkanua kîrî antû ba mîciî ya Amuramu, Aisaarî, Eburoni na Usieri.
24 Sebueri, mwana wa Ngerisomu, mwana wa Musa aarî mûrûngamîîri ûra mûnene wa kîgîîna gîku. 25 Na antû ba mûciî wao gûkûrûkîîra Erieseri baarî, Reabia, ûra aarî îthe wa Yesaya, ûra aarî îthe wa Njoramu, ûra aarî îthe wa Sikiri, ûra aarî îthe wa Seromithi. 26 Seromithi na aruagina, i bo baarî acûûbîri ba igîîna bionthe bia into bira biathûrîîtwe i mûnene Ndaundi, na atongoria ba mîciî, atongoria ba magiri na magana na atongoria ba njûûrî. 27 Baathûrire gîcuncî kîa into bira baataîte ndûani birî bia gûtûmîrwa yomba ya Mwathani. 28 Kinya, bionthe bira biathûrîîtwe i Samweri, kîroria na Saûrû mwana wa Kisi, na Abuneri mwana wa Neri, na Njoabu mwana wa Seruya, biarî ruungu rwa ûmenyeeri bwa Seromithi na aruagina.
Ngûgî ya Arawi bara bangî
29 Kuuma kîrî nciarwa cia Aisaarî, Kenania na aana baake ibaapeerwe ngûgî ya gûtûmîkîra antû ba Isiraeri ta atongoria na agiiti magamba.
30 Kuuma kîrî nciarwa cia Eburoni, Asabia, na aruagina ngiri îmwe ya magana mûgwanja, bonthe antû ncamba baaneenkeerwe ngûgî ya kûrûngamîîra mbarî cia Isiraeri ira ciarî rûteere rwa ûthwîro bwa riûa rwa muuro wa Njorondani. Baarûngamîrîîte ngûgî cionthe cia Mwathani na ngûgî ya mûnene Ndaundi.
31 Gatîgatî ga nciarwa cia Eburoni, Njeriya aarî mûtongoria wa mîîrîga na mîciî yonthe, mwankaani wa mîrongo îna wa wathani bwa mûnene Ndaundi. Ûtuîria bûkûrûthwa kuumania na mîciî ya Eburoni, antû arûme barî na ûûmbi bûûnene i boonekanire naagu Njaseri gîteere kîa Ngiriandi. 32 Yeriya aarî na aruagina ngiri ciîrî cia magana mûgwanja, ncamba na atongoria ba mîciî, bara mûnene Ndaundi aathuurire kûrûngamîîra mbarî ya Arubeni, Angandi na nucu ya mwîrîga wa Manase, bara baarî umîîro bwa riûa bwa muuro wa Njorondani na mantûûni monthe meegiî Ngai na mûnene Ndaundi.