ARAWI
Mantû ma îbuku rîrî
Arawi n'îbuku rîa kwonia athînjîri ba Ngai na ateetheeria baao (tabo Arawi) bûra babatîîrue baruta Ngûgî bantû ara atheru. Îbuku rîrî irîonanagia bwega mûtûûrîre wa kîîmuntû na wa kîîNgai mûgongooni wa Isiraeri. I rîonanîîtie mîtaratara mwanya mwanya ya bûra igongwana mwanya mwanya bibatîîrue birutwa na kinya bûra biatho mwanya mwanya bibatîîrue birûthwa na bûra antû baabatîîrue bakara kagiita gaku (Gîcu. 23).
Igongwana bira biarutagîrwa Ngai cia ûrongo n'ûntû bwa ûguaya antû bakeenda gûcikirakiria na njîra ya gûcia biewa i kwabuananaga na igongwana bira biarutagîrwa Ngai. Mwanya ungwa i kwîthîrwa bira Ngai aathanîîte biumanîîtie na kîrîîkanîro kîra Ngai aarûthire na antû baake. Igongwana bibi i nkûrûki ya biewa bia gûtûma Ngai cia mîbuanaano ikena, n'ûntû i bia gûtûma antû beenenkanîra na baathîkîra Ngai. Kûruta kîgongwana i njîra ya kwonanîîria ome ngwatanîro ya muntû na Ngai (Isaya 1:11-18). Kwoogu i bionanîîria na ûroria bwa igongwana bia kîrîîkanîro kîîyerû bira Kîrîstû aarikithiirie.
Ûntû bûra bûnene mûno îbukuuni rîrî n'ûtheru. Ngai n'ûmûtheru na n'endaga kinya bara bamûceragia beethîrwe barî baatheru. Gûkûrûkîîra nthakame ya kîgongwana Ngai n'atûmaga muntû athera, gîkî i kîonanîîria gîa gîkuû kîa Yiesû Kîrîstû mûtharabaani ara we wengwa gûkûrûkîîra nthakame yake aagwatithaniirie muntû na Ngai (Aibirania 9:11-14).
Gacuncî kara kaiyîîwe mûno ndeeni ya îbuku rîrî i kara Yiesû aagwetire karî kamwe kîrî maathana mara maîrî manene augire, “Enda mûtûûri waku ta bûra wîbendeete.” (Arawi 19:18).
Gwookubî îbuku rîrî rîkari ûûgû:
Mawatho meegiî biewa na igongwana (1:1-7:38)
Kwathûrwa kwa Arûni na nthaka ciake barî athînjîri ba Ngai (8:1-10:20)
Mawatho meegiî mîgiro (11:1-15:33)
Ntugû ya kûthambua meeyia (16:1-34)
Mawatho meegiî ûtheru na kûgonga (17:1-27:34)