KUUMA
Mantû ma îbuku rîrî
Îbuku rîrî rîgaanîîtue maita mana: 1. Gûkûûrwa kuuma ûkombooni bwa Miisiri (Gîcu. 1-15). 2. Kûthaama gwa antû kûthi kîrîmaani kîa Ngai ta kîo Sinai (Gîcu. 15-18), ara Ngai oonaniirie gwîtîgîka gwake kîrî bo kinya ûkeegua bataamwathîkagîra. 3. Ngai aarûtha kîrîîkanîro na antû ba Isiraeri (Gîcu. 19-24), ara aabagwûrîîre maathana na mawatho mara Aisiraeri bakaathingataga mûtûûrîreeni na mûgongereeni wao. 4. Gwakwa kwa îrema rîa kûrîîkanaga, mawatho ma kûgonga na ûthînjîri (Gîcu. 24-40).
Ngai anjîîria kûûyûria wîrane bûra eeranîîte na Aburamu, Isaka na Njakubu mantûûni ma kûmûtuîkithia mûgongo ûmûnene na kinya nthîgûrû îra eeranîîte akabaneenkera. Îndî n'ûntû bwa kûrega kwathîka gwa Aisiraeri nwa mwanka beeteere kagiita kagana ûna bakîîya kûthûngîra nthîgûrû înu. Kwoogu nthuke yonthe îra îteetigagia yathirîra rwanda îrî ngerekano kîrî nthuke ira ikaaya (Aibirania 3:7-19).
Gûkûrûkîîra kîrî Musa, Ngai aarûtha kîrîîkanîro na antû ba Isiraeri. Kîrîîkanîro gîkî gîtaakari ta kîra Ngai aarûthîîte na Andamu, Nuu kana kîra aarûthîîte na Aburamu, Isaka na Njakubu. Kîrîîkanîro gîkî gîtaarî gatîgatî ka Ngai na muntû ûmwe kana mûciî ûmwe, kîarî gîa antû bonthe ba Isiraeri. Wa ta irîîkanîro bira biingî, Ngai n'eendaga antû boonania wîtîgio na wathîki kana wegua t'ûgu baage ithaarimo bia kîrîîkanîro na beewe îkaanûkia.
Kagiita konthe kara Ngai akaanûkagia antû n'ûntû bwa kûrega kwaiga kîrîîkanîro i kwîthagîrwa kûrî na matigari mara maigaga wîrîgîîro bwa nthuke îra îkaaya, ta kîo kîthaarimo gîa gûcookeera Ngai. Îbuku rîrî irîonanagia mîtugo ya Ngai ta ûtheru, gwîtîgîka, kîao na wendo (Gîcu. 3, 6 na kinya 33-34). Ngai oonanîîtue ta Ngai wa mûririkana, Ngai ûra athiyaga akîgarûranagia mantû wa bûra mathiîte. Kwaigwa gwa kîatho gîa Pasaka (Gîcu. 12) kinya ku n'ûroria bwa gîkuû kîa Yiesû n'ûntû bwa wonokio bwa antû (Njoana 1:29 na 1 Akorintho 5:7).
Gwookubî îbuku rîrî rîkari ûûgû:
Aisiraeri barî nkombo nthîgûrû ya Miisiri (1:1-22)
Gûciarwa kwa Musa na wîthî bwake (2:1-4:31)
Musa na Arûni baathi kîrî mûnene wa Miisiri (5:1-11:10)
Pasaka na kûthaama kuuma nthîgûrû ya Miisiri (12:1-15:21)
Kuuma Îria Rîtuune mwanka kîrîma gîa Sinai (15:22-18:27)
Watho na maathana ma kîrîîkanîro (19:1-24:18)
Îrema rîa kûrîîkanaga na mawatho meegiî kûgonga (25:1-40:38)