Rwîmbo rwa Musa
15
1 Rîru Musa na antû ba Isiraeri bainîra Mwathani rwîmbo rûrû, bakiugaga:“I nkwinîra Mwathani n'ûntû bwa kûrûa ndûa aûmbana nainya mûno,
mbaraathi amwe na bara baarî mîgongooni yacio aciroromeria îriani.
2 Mwathani n'we inya yakwa, na n'we ûtûmaga mbina,
na n'we wonokio bwakwa.
N'we Ngai wakwa, na nkamûgongaga,
i Ngai wa ba baaba, na n'we nkainagîra!
3 Mwathani n'we ncamba ya ndûa;
Mwathani i rîo riîtwa rîake.
4 Nkaarî cia ndûa cia Faraû, na njûûrî ciake cia ndûa n'aigerire îriani,
Arûi baake bara bathuure barî îgweta, baagerwa Îria Rîtuune baûrîra ku.
5 Ndia ya îria yabameria,
baariamire cibi nwa ta iga ndiani.
6 Itû Mwathani, njara yaku ya ûrîo, îrî inya îînene mûno,
n'yomboranagia mûnthû.
7 Ûgîtûmagîra inya yaku înene, n'wathiriirie bara baakwithûkagîra.
Nwonaniirie mûthûûro waku ûmûnene, wabathiria ta mwanki ûkûbîîthia rûûa.
8 Wabuire îria, kîthûngûthûngû kîa rûûyî gîetia îgûrû,
kîarûngama cigî ta rûthiingo,
kûra kwarî na ndia îmborokeru,
rûûyî rwabwa kwaûmagara.
9 Mûnthû augire, ‘Nkaathingatana nabo na mbagwatagwate,
ndîîgaîre into bira bataîte, ndîe bio na nkinyîre.
Ngaakûûra rûûyiû rwakwa mbathirie.’
10 Naawe wabuire îria na mîruke, narîo rîabakunîkania,
Baariamire cibi nwa ta kathoka ndiani.
11 Mwathani, i ngai ûngî ûrîkû akari ta woû?
N'ûû ûkari ta woû, ûrî na ûtheru bwa kûrigaria?
N'ûû ûngî ûûmba kûringa biama na akarûtha mantû maanene ta woû?
12 Woû wataambûrûkiirie njara yaku ya ûrîo,
na nthî yameria anthû baaku baathira cwe.
13 Naawe n'ûntû ûrî mwîtîgua wîraneeni bwaku,
n'ûtongoragîîria antû bara ûkûûrîîte na wendo bwaku bûra bûtathiraga.
Na ûkabatongoreeria nainya yaku ûkaabaira ara ûtûûraga.
14 Antû ba mîgongo îmiingî i beegagua nkuma ya mantû mamu bakainaina n'ûguaya,
na kîeba gîgaakinyîra antû ba Firisitia.
15 Anene ba Endomu bamake,
na ncamba cia ndûa cia Moabu ciinaine n'ûguaya.
Na antû ba Kanaani bonthe banyagaare baûre.
16 Bakaagwatwa n'ûguaya na kîmako,
n'ûntû bwa inya yaku înene na bakire ki ta iiga,
mwanka antû baaku bakûrûke
bara wakûûrire ûkombooni.
17 I woû ûkabatongoreeria, ûbaire na ûbaande,
kîrîmaani gîaku wengwa bantû ara wethuuranîîre agûtûûra,
itû Mwathani bantû ara atheru werûthîîre wengwa na njara ciaku, itû Mwathani.
18 Mwathani akaathanaga tene na tene.”
Rwîmbo rwa Miriamu
19 Antû ba Isiraeri baakûrûkîîre îriani gatîgatî bagendeereete gûntû kûûmo gûtarî rûûyî. Îndî rîra antû ba Miisiri bo barî na mbaraathi cia Faraû, na nkaarî cia cio na bara baitwete baageriirie kûgendeera oogo, Mwathani aacookanîria rûûyî rûru rwa îria antû bonthe baakuîra ku.
20 Rîru kîroria kîa mûka gîetagwa Miriamu, ûra aarî mwaragina wa Arûni aathûkia tamburini yake, na eekûrû bonthe bamuuma nyuma, bakîringaga tamburini na bagîcûûngaga. 21 Miriamu abainîra rwîmbo akiugaga:
“Inîraani Mwathani, n'ûntû bwa kûrûa na kûûmbana ndûa înene;
n'agereete mbaraathi na bara bathiiyaga nacio îriani.”
Rûûyî rûrî gana rwa Mara
22 Musa aatongoreeria antû ba Isiraeri baathi bauma îria Rîtuune, baakinya rwanda rwîtagwa Suri. Baathiire rûgendo rwa ntugû ithatû rwanda rûru batoona rûûyî. 23 Bagûkinya Mara, i rîo boonire rûûyî. Îndî amwe na ûgu antû baaremwa i kûrunyua n'ûntû i rwarî na gana. Gîku i kîo gîtûmi bantû agu eetirwe Mara.a 24 Antû baanung'unîra Musa bakîûragia, “Tûrînyua mbi?” 25 Kwoogu Musa n'we aakayîra Mwathani amûteethia, na Mwathani amwonia rwong'i rwa mûtî. Musa aathûkia rwong'i rûru arûgera rûûyîîni. Na rûûyî rûru naru, rwabua rwa kûnyua. Mwathani aabaneenkeere watho bûbû kaingo babûthiingatîîra na agu noogo aabagereerie abathima bûra baamwîtîgîîtie bûgana; 26 Abeera, “Wegua bûkambathîkîra cwe bûtarî na mathee bûrûthage bûra kûbatîîrue na bûmenyagîîre mawatho maakwa, ntibwa îkaanûkia rîa kûbûreetera mûrimo nwa ûrîkû îra ndaareteere antû Miisiri. I niû Mwathani ûra abworagia mîrimo.”
27 Bakuuma Mara, baathi baakinya Erimu. Na agu noogo kwarî na inyaka îkûmi na biîrî na mîtî yaakari ta mîrûgûyû mîrongo mûgwanja. Agu noogo baambire marema maao rûteere rwa inyaka.