Kûringa Îria Rîtuune
14
1 Rîru Mwathani aaria na Musa amwaa mawatho amwîra, 2 “Aria na antû ba Isiraeri ûbeere i baûndûke bathi akubî na Pi-Airothi gatîgatî ka Migindori na îria. Baambe marema maao agu rûteere rwa îria, beerekerete bantû eetagwa Mbaari-Seboni. 3 Bakarûtha ûgu, Faraû akoona taka barî baarigicanu bakûruruutha woogu. Athûgaanie i baûrîrîîte rwanda! 4 Naani nkaûmia Faraû nkoro, na akabûthingata bûra bûthiire. Naani ndaabanga ûgu kaingo nkumua n'ûntû bwa bûra nkaarûtha Faraû na njûûrî yake yonthe ya ndûa. Nyuma yoogu i rîo Amiisiri bakaamenya i niû Mwathani!” Kwoogu Aisiraeri baamba marema maao waagu wa ta bûra beerîîtwe.5 Mûnene ûyu wa Miisiri akûmenya atî antû ba Isiraeri bataabangîîte gûcooka Miisiri kaîrî, Faraû na aniini baake banjîîria kwîrira bakîûragia, “N'aata tûrûthire twarekeeria nkombo ino cionthe ciathi?” 6 Na n'ûntû bwoogu aathuuranîra nkaarî ciake cia ndûa na aatongoreeria njûûrî yake ya acikaarî baathi. 7 Aacooka aathi na nkaarî magana mathanthatû ira ciathuurîîtwe, amwe na nkaarî cia Miisiri cionthe aathi nacio. Na i kwarî na acikaarî ba ndûa. 8 Na Mwathani aathi na mbere kûûmia nkoro ya Faraû, mûnene wa Miisiri. Aathingata aana ba Isiraeri, bara baumire Miisiri na ûcamba bwingî. 9 Antû bonthe ba njûûrî ya ndûa ya Faraû beengana na antû ba Isiraeri. Baathiire batwete mbaraathi na nkaarî cia Faraû cionthe. Bakûthi babeethîra bambîîte marema maao rûteere rwa îria akubî na Pi-Airothi, kuuma rûgongo rwa Mbaari-Seboni.
10 Faraû agûkara gûkinya akubî na aana ba Isiraeri, bakûûndûka boona antû babu ba Miisiri babaumîîte nyuma. Aana ba Isiraeri baagwatwa n'ûguaya mûno, na baakayîra Mwathani. 11 Nyuma yoogu baanjîîria kûnung'una bakîûragia Musa, “I mbi watûrutîrîte Miisiri tûûya kûthirîra rwanda? I ka gûtaarî na nthiko cia kûgana Miisiri? Iimbi waatûrutîîre ku îndî? 12 Bûbû tibu twakwîraga rîra twarî Miisiri ûrekane n'aati tûrutîre Amiisiri ngûgî? Ûkombooni bûra twarî nthî ya Miisiri i bwarî bwega nkûrûki ya gûkuîra rwanda rûrû!” 13 Îndî Musa eera antû, “Bûtikaamake. Rûngamaani bwîrikîîtie bwone Mwathani akîbûteethia. Antû baba ba Miisiri bûkwona îmunthî bûtikooro bûboona kaîrî. 14 Mwathani wengwa n'we akaabûrwîrîîra, kwoogu rûngamaani bwîrikîîtie.”
15 Rîru Mwathani aûria Musa, “Iimbi n'ûntû ûkûndîrîra? Îra Aisiraeri banjîîrie kûthi mbere. 16 Naawe tûmîra mûraagi waku wa ûrîîthi na ûtaambûrûkie njara yaku îgûrû rîa îria. Na îria rîgaatuîkana gatîgatî njîra îtigwe. Rîru antû ba Isiraeri bakûrûkîîre bantû aûmo atarî na rûûyî. 17 Amwe na ûgu nkaûmia nkoro cia antû ba Miisiri, na bathûngîîre antû ba Isiraeri îriani. Rîru mbîgue ndî na ûkumio bûûnene gûkûrûkîîra kîrî Faraû na njûûrî ciake cia ndûa na nkaarî, wa amwe na acikaarî bara bathiiyaga na mbaraathi. 18 Ndaarîîkania na Faraû na njûûrî yake ya ndûa, antû ba Miisiri bonthe bakaamenya i niû Mwathani.”
19 Na Mûraîka wa Ngai ûra aathiiyaga atongorereetie antû ba Isiraeri, auma mbere aacooka nyuma yao, wana kinya gîtugî gîa îtu kîra kîabatongoragîîria wana kîo gîacooka kîarûngama nyuma yao. 20 Gîtugî gîku gîa îtu nakîo, gîacooka gîakara gatîgatî ka ara antû ba Isiraeri na ba Miisiri baakari. Wa bûra kwathiire gûgîtugaga, gîtugî gîku kîarutaga werû bûkamûrîkîra antû ba Isiraeri ara baakaraga. Îndî kîrî antû ba Miisiri, gîtugî gîku kîareetaga mwindu, na wegua batikîûmba kûtheenganîîra.
21 Musa n'we aatambûrûkia njara yake îgûrû rîa îria; na Mwathani aatûma îria rîtuîkana, njîra yakûrûkîîra gatîgatî gûtarî nwa rûûyî. Bûbu bwakarîkire rîra ruuo rûûnene mûno rwabuutanire ûtugû bunthe rûkiumaga uumîîrooni bwa riûa. 22 Kwoogu antû ba Isiraeri baakûrûkîîra bantû aûmo gatîgatî ka îria. Rûûyî rwatuîkanîîte rûkarûtha ngombe cia ru nteere irî ciîrî. 23 Rîru antû ba Miisiri, mbaraathi cia mûnene Faraû cionthe, nkaarî na ndereba cia cio baathingata antû ba Isiraeri na njîra wenu yarî gatîgatî ka îria. 24 Rûkîîrî kariûa gakiuma, Mwathani arî gatîgatî ga gîtugî kîa mwanki na îtu aaraithîîria oona njûûrî ya ndûa ya Amiisiri na amîrigicania. 25 Na magûrû ma nkaarî ciao manjîîria kûnyua nthî na gwatuîka gûtiûmbîka kûthiithia nkaarî inu. Antû ba Miisiri baaringa gîtuma bakiugaga, “Tuumeeni aaga tûthi, n'ûntû Mwathani nakûrwîrîîra antû ba Isiraeri.”
26 Aisiraeri bakûringa rûteere rûra rûngî rwa îria, Mwathani eera Musa, “Tambûrûkia njara yaku îgûrû rîa îria kaîrî. Rîru rûûyî rwa îria rûcookanîre amwe na rûkondorie antû ba Miisiri, na nkaarî ciao cia ndûa, wa amwe na antû bara bathiyaga batwete mbaraathi.” 27 Kwoogu rûkîîrî ma riûa rîkîanjîîria kuuma, Musa aatambûrûkia njara yake îgûrû rîa îria. Rûûyî rwacookanîra wa ta bûra rwatûûraga, na Mwathani aaciata antû ba Miisiri bonthe baûrîra rûûyîîni. 28 Na rûûyî rûru rwakunîkania nkaarî cionthe, bara baathiiyaga batwete mbaraathi na njûûrî ya ndûa ya Faraû yonthe. Amiisiri bonthe bara beengatîîtie antû ba Isiraeri îriani, wana bo baariamanua rûûyîîni baûrîra ku na gûtirî nwa kamwe kaamonyia. 29 Antû ba Isiraeri bo baakûrûkîîre nthî îîmbûmo gatîgatî ka îria rûûyî rûrûûngi ki ta nthingo rûteere rwa ûrîo na rwa ûmotho. 30 Ûgu i bu Mwathani oonokiirie aana ba Isiraeri ntugû înu kuuma kîrî antû ba Miisiri. Antû ba Isiraeri nwaka boonaga mîîrî ya antû ba Miisiri îgeretwe rûteere rwa îria i rûûyî. 31 Antû ba Isiraeri bakwona inya îînene ya Mwathani îra oonaniirie kîrî antû ba Miisiri, baatîîya Mwathani na beetîgia kinya Musa.