Kwathûrîra Ngai biîmbere bia Aisiraeri
13
1 Rîru Mwathani eera Musa ûûgû: 2 “Mbathûrîra biîmbere bionthe bia ndûme. Wa kîra gîgaaciaragwa kîrî kîa mbere kuumania na antû ba Isiraeri kîrî kîa muntû kana kîrî kîa nyamû, gîku i gîakwa.”3 Musa n'we eera antû ba Isiraeri ûûgû, “Ririkanagaani ntugû îno, îrî ntugû îra bwaumire Miisiri, nthîgûrû ya ûkombo, n'ûntû Mwathani aabûrutire ku na inya yake înene. Na bûririkane bûtikaarîe mîgaate îrugîîtwe na ndawa ya kwimbithia. 4 Îmunthî, mweriini ûyû ûgwîtwa Abibu,a n'yo ntugû îra bwauma bwathi. 5 Rîra Mwathani akaabûkinyithia nthî ya Akanaani, ya Aiti, ya Amori, ya Aibi, na ya Anjebusi ira aathiîtîîrie ba abaagu abeera akabûnenkera nthîgûrû yûûyûrîîte îria na ûkî, nwa mwanka bûgaakûngwagîîra ntugû înu. 6 Bantû a ntugû mûgwanja bûkaarîîyaga mûgaate ûtarugîîtwe na ndawa ya kwimbithia. Na ntugû înu ya mûgwanja yongwa, n'yo îkeegua îrî ntugû îînene ya gûtîîya Mwathani. 7 Na ntugû inu mûgwanja i kwîgue gûkîrîîyawa mîgaate îtarî na ndawa ya kwimbithia, na gûntû kunthe kûra bûkeethîrwa bûrî gûtikooneke mûgaate wîkîrîtwe ndawa înu kana ndawa înu ya kwimbithia yîîya kwonekana gatîgatî keenu gûku nthî yenu.
8 “Îgiita rîonthe rîra bûkeegua bûgîkûngwîra kîatho gîkî wa mwanka, nwa mwanka bwîre aana beenu gîtûmi gîa gûkûngwîra ntugû înu. Bûbeere, ‘Tûrîrûtha ûûgû, n'ûntû bwa kûririkana ntugû îra Mwathani aatûrutire Miisiri.’ 9 Kîatho gîkî gîkeegua kîrî gîntû gîa kûbûririkanagia kîrî ta rwano rwîkîrîtwe njara kana ûthiû. Gîkaabûririkanagia kûthi na mbere na kûgweta na kûthooma watho bwa Mwathani, n'ûntû n'abûrutire Miisiri na inya yake înene. 10 Kwoogu kûngwagîîraani kîatho gîkî kagiita kara kabatîîrue wa kîra mwanka.
Kwathûrwa kwa biîmbere
11 “Rîra Mwathani akaabûkinyithia nthî ya Akanaani îra aathiîtiirie wo tene auga akaa yo biûyûûyû bienu, 12 bûkaathûra biîmbere bia ndûme bionthe kîrî Mwathani. Biîmbere bia ndûme bia nyamû cienu cia ndîîthia, i bia Mwathani. 13 Na kîîmbere kîa îng'ooi nakîo ûgaatua gûgîkûûraga na kabûri kana kagondu, na waremwa n'ûgu, ûgakiuna nkingo. Biîmbere bia antû bia twîyî i bigaakûûragwa. 14 Rîra aana baaku bagaakûûria gîtûmi gîa kûrûtha ûgu i kîbi, ûkabeeraga, ‘Ntugû îno n'yo Mwathani aatûrutire ûkombooni bwa Amiisiri na inya yake înene. 15 Rîra Faraû aaregire gûtûrekeeria tûthi, Mwathani aabanga kûûraga biîmbere bionthe bia ndûme bia Miisiri, nwîgue i bia antû kana i bia nyamû. Na gîku i kîo gîtûmi tûrutagîra Mwathani biîmbere bia ndûme bionthe bia nyamû cia ndîîthia îndî biîmbere bia twîyî itûkûûraga.’ 16 Na kaîrî i ka nkûbwîra kîatho gîkî gîkeegagua gîkari ta rwano bwîkîrîtwe njaraani cienu kana moothiûni meenu. Na ûyu, i mûririkana wa kûbwonia i Mwathani wabûrutire nthî ya Miisiri na inya yake îînene.”
Rûgendo rwa Aisiraeri mwanka Ethamu
17 Rîra Faraû aarekeerie antû ba Isiraeri bathi, Ngai ataabatongoreeria bathi na barabara îra yaakûrûkîîrîîte nthîgûrû ya Afirisiti na kinya wegua n'yo yarî njîra înkubî kuuma Miisiri mwanka nthî înu ya wîrane. Ngai augire, “Antû baba bakaaya kwîthîra ndûa njîraani, nwa bathûgaanie gûcooka Miisiri kaîrî.” 18 Kwoogu bantû bathi na njîra, Ngai abatongoreeria abakûrûkîîria rwanda rûtarî antû batarîte bwa Îria Rîtuune, na Aisiraeri baumire Miisiri beethuuranîrîte kûrûa.
19 Musa n'we aakamata maîndî ma Njosebu aathi namo, n'ûntû Njosebu n'atûmire antû ba Isiraeri bathiîtia bauga bagaakamata mîîndî yake bathi n'yo ntugû îra Ngai akaabaruta baume nthî ya Miisiri, n'ûntû Njosebu n'etîgîîtie Ngai akabaruta ku.
20 Nyuma ya kuuma Sukothi ara baarî bakûrûngama, baathiire baamba marema maao bantû eetagwa Ethamu mûthiani wa rwanda. 21 Mwathani n'we aathiiyaga akîboonagia njîra abatongorereetie na gîtugî gîa îtu mûthenya, na ûtugû nabu akabatongoreeria na gîtugî kîa mwanki, gîkîbamûrîkagîra kaingo baûmba kûthi ûtugû na mûthenya. 22 Na Mwathani ataarutaruta gîtugî gîku gîa îtu kana kîa mwanki mbere ya antû.