Kîatho gîa Pasaka
12
1 Mwathani aaria na Musa na Arûni wa barî nthî ya Miisiri abeera: 2 “Kuuma îîndî kûthi na mbere, mweri ûyû n'uu ûkeegua ûrî mweri wa kwanjîîria mwanka wenu. 3 Menyithia antû bonthe atî ntugû ya îkûmi ya mweri ûyû kîra mûciî nwa mwanka bathuure kagondu. 4 Ûkaaya kwîgua mûciî ûrî na antû baakai ûntû batathiria kagondu konthe, nwa bagaane ko na mûciî ûra batûûranîîre nau. Bakagaana kûringana na bûra mûciî ûgana na bûra baûmba kûrîa bûgana. 5 Nwa ûthuure kathenge kana gatûrûme îndî wîgue karî na ûkûrû bwa mwanka ûmwe na gatarî na bantû athûûku mwîrîîni. 6 Bûtumenyagîîre mwanka ûgoro bwa ntugû ya îkûmi na inya ya mweri ûyû wa mbere. Rîru wa kîra mûciî wa antû ba Isiraeri ûthînje nyamû înu. 7 Rîru bacooke bathûkie nthakame ya gatûrûme kaao bamîake mburemuuni cia mîrango ya nyomba înu, na bamîake tûrûbaaûni tûra tûgwatithanîîtie mbureemu inu cia nyomba ira tûgondu tûkaarîîrwa. 8 Ûtugû wa bûbu nyama ciako ciokue na irîîyanîrue na mûgaate ûteekîrîîtwe ndawa ya kwimbithia na ndawa na nyani irî gana. 9 Na batikaarîe nyama inu irî mbîthî, kana iri ntherûkie, îndî yonthe n'yokue na mwanki amwe na kîongo, mathaagiro na mainto ma nnda monthe. 10 Bûtigaatigarie nwa mbi îkinyithia rûûni rûkîîrî. Wegua kûrî kîo gîgaatigara, nwa mwanka kîrîrîkîrwe na mwanki. 11 Na bûkîrîa bwîgue bwîkîrîte nguo cia kûthi rûgendo, ta bwîthuuranîrîte kûthi rûgendo rwa kûraaya. Bwîkîre iraatû bienu na bûkamate mîraagi ya wîkinyîîria n'yo. Bûrîe irio na mpwî, n'ûntû îno i Pasaka ya Mwathani. 12 Ngaakûrûkîîra nthî ya Miisiri ûtugû bûbu na mbûrage biîmbere bia twana twa twîyî na biîmbere bia tûrûme twa nyamû bia nthî ya Miisiri na ngaacinda ngai cia Miisiri cionthe, n'ûntû i niû Mwathani! 13 Nthakame îra bwakire mburemuuni cia mîrango n'yo îkeegua îrî rwano rwa kwonanîîria nyomba ira bûrî. Ndoona nthakame i nkaabûkûrûkîra. Rîra nkaaringa nthî ya Miisiri na kînyamaara gîkî gîa gîkuû ntibûringithia.14 “Îno i ntugû bûbatîîrue bûririkanaga nthukeeni cienu cionthe. Bûmîkûngwagîîre kîrî kîatho gîa gûkumithia Mwathani, bûrî watho bwenu bwa gûtûûra kûthingatagwa tene na tene.”
Kîatho kîa mîgaate îtarî na ndawa ya kwimbithia
15 Mwathani auga, nwa mwanka bûrîîyage mîgaate îtarî na ndawa ya kwimbithia bantû a ntugû mûgwanja. Na ntugû ya mbere ya mîthenya înu mûgwanja n'yo bûkaaruta ndawa înu ya kwimbithia mîgaate nyomba cienu. N'ûntû wa muntû wonthe ûra akaarîa mûgaate ûra mwimbithie ntugûûni inu cia kûgonga Ngai, muntû ûyu n'akaathûrwa aume kîrî antû ba Isiraeri. 16 Ntugû ya mbere na ntugû ya mûgwanja bwîgue bûrî na kîûthûrano kîîtheru. Bûtikaarute ngûgî nwa irî kû ntugûûni inu tatiga kûruga irio akî. 17 Naabi bûkûngwagîîre kîatho gîkî kînene kîa mîgaate îtarî miimbithie, n'ûntû ntugû înu n'yo ndaarutire antû ba mîîrîga yenu nthî ya Miisiri. Bûkûngwagîîre ntugû înu nthukeeni cienu cionthe, bûrî watho bwa gûtûûra kûthingatagwa tene na tene. 18 Kuuma ûgoro bwa ntugû ya îkûmi na inya ya mweri wa mbere, bûrîîyage mûgaate ûtarî na ndawa ya kwimbithia, mwanka ûgoro ntugû ya mîrongo îîrî na îmwe. 19 Bantû a ntugû inu mûgwanja, gûtikooneke ndawa ya kwimbithia mîgaate mîciî yenu. Muntû wonthe ûra akaawatîkana arîîte gîntû kîrugîîtwe na ndawa înu, atiîgua arî muntû wakwa kaîrî. Muntû ûyu nwîgue i Mûyaundi kana ti Mûyaundi. 20 Bûtikaarîe gîntû kîrî na ndawa ya kwimbithia. Wa ara ûkeegua bûrî bûrîîyage mîgaate îtarî miimbithie.
Pasaka ya mbere
21 Musa eeta atongoria bonthe ba Isiraeri abeera, “Ka woora mwene mûciî athûkie gatûrûme kana kathenge na akathînje n'ûntû bwa kûrîa Pasaka. 22 Wa bwang'eera gatûrûme kana kathenge gaku bûkaruithîria nthakame mbakûriini. Bûcooke bwoge kîmanja gîa twong'i twa mûtî wîtagwa ucopo, bûgîtombeke nthakameeni îra îrî mbakûriini, bûcooke bwake nthakame înu mburemuuni cia mîrango irî ciîrî na kinya kaburemuuni kara gakeranîîtie agu îgûrû. Na gûtirî muntû nwa ûmwe wa cienu akaumagarûka nyomba yake mwanka rûûni rûkîîrî. 23 N'ûntû Mwathani agaakûrûkîîra nthîgûrû ya Miisiri na akîûragaga Amiisiri. Îndî oona nthakame îrî mburemuuni cia mîrango, atiireka mûraîka wa gîkuû athûngîra nyomba aûraga biîmbere bienu. 24 Bûririkane, mawatho mama i magûtûûra na nwa mwanka bûmamenyeere biû na nciarwa cienu mwanka tene na tene. 25 Bwakinya nthî ya wîrane îra Mwathani aabwîrire akabwaa, bûkaathi na mbere gûkûngwîra kîatho gîkî. 26 Rîru aana beenu babûûrie ata rî, ‘Gîtûmi gîa gûkûngwîra mantû mama i mbi?’ 27 Nyuma ya ûgu, naabi bûkaabacookeria bûbeere, ‘I gûkûngwîra Pasaka ya Mwathani, n'ûntû Mwathani naakûrûkîîre mîciî ya antû ba Isiraeri rîra baarî Miisiri. Na wegua naûragire antû ba Miisiri, ataaringa mîciî yetû na ataatûûraga.’ ” Rîru atongoria bonthe ba Isiraeri beenîka biongo biao na baagonga Ngai. 28 Kwoogu antû ba Isiraeri baarûthire wa ta bûra Mwathani aathîîte Musa na Arûni.
29 Na kûrî ûtugû mainda Mwathani aûraga biîmbere bionthe bia twîyî bia nthî ya Miisiri. Aanjîîrie na kîîmbere gîa kaîyî gîa Faraû ûra aakarîrîîte gîtî kîa ûnene, mwanka kîîmbere kîa mûthaîkwa ûra aathaîkîîtwe nceera. Wana kinya biîmbere bia nyamû ciao cia ndîîthia i biaûragirwe. 30 Faraû na aniini baake na antû bonthe ba Miisiri baindûkîrua ûtugû i kîrîro kîînene kîarî nthî yonthe ya Miisiri n'ûntû gûtirî nyomba nwa îmwe îtaakuîte muntû.
Kuuma Miisiri
31 Faraû aatûmana Musa na Arûni ûtugû wa bûbu abaugîîria na inya abeera, “Umaani bûthi, buume kîrî antû baakwa biû na antû ba Isiraeri bûkagonge Mwathani wa ta bûra bûraugaga. 32 Thûkiani ng'ondu, mbûri na ng'ombe, na buume bûthi wa bûra bûraugîîte. Na bûnthaarime.” 33 Antû ba Miisiri baakinyîîrie antû ba Isiraeri baume nthî înu na mpwî bûra gûkîûmbîka. N'ûntû antû babu ba Miisiri baathûgaanagia bagaakua bonthe.
34 Antû ba Isiraeri baakamata îkie rîao rîa mûtu wa ngano rîteekîrîtwe ndawa ya kwimbithia mîgaate. Baacooka baakundîkîîra ikaandi biao bia mîgaate nguoni na baciîkîra ituro. 35 Antû ba Isiraeri nabo i baarûthîîte wa bûra Musa aabeerîîte, n'ûntû ibeetîîtie antû ba Miisiri into bia fetha na bia thaabu na kinya nguo. 36 Mwathani n'aarî agûtûma antû ba Miisiri batîîya antû ba Isiraeri na kîonthe kîra Aisiraeri beendaga i baanenkagîrwa kîo n'antû babu ba Miisiri. N'ûntû bwoogu antû ba Isiraeri i baathiire na ûtonga bwa Amiisiri.
37 Antû ba Isiraeri banjîîria rûgendo kuuma gûntû gwetagwa Ramesesi mwanka baakinya bantû eetagwa Sukothi. Bonthe baarî antû arûme ta ngiri magana mathanthatû bara bathiîte na magûrû, tûtagûtara eekûrû amwe na twana. 38 Na bakîthi bataathi barî bonka. Baathiiyaniirie na mîthemba ya antû bangî bataarî ba Isiraeri. Baarî na mbûri na ng'ondu na ng'ombe imbiingî mûno. 39 Baaruga mîgaate ya îkie rîa mûtu wa ngano rîra baakamatîîte rîteekîrîtwe ndawa ya kwimbithia. N'ûntû rîra baumaga Miisiri gûtaarî na kaanya ga kûthuuranîra irio kana ga gwîkîra mûtu na ndawa ya kwimbithia i mpwî ira baarutirwe nacio ku.
40 Antû ba Isiraeri baatwîre Miisiri mîanka magana mana ma mîrongo îthatû. 41 Ntugû ya mûthia ya mwanka wa magana mana na mîrongo îthatû n'yo antû ba Mwathani baumire Miisiri. 42 N'ûntû bwa bûra Mwathani aacûûbîîre antû ba Isiraeri ûtugû akîbaruta Miisiri, nwabu antû ba Isiraeri babatîîrue bakara batamaami ûtugû bunthe n'ûntû bwa gûtîîya Mwathani nthukeeni cionthe.
Mawatho ma Pasaka
43 Rîru Mwathani eera Musa na Arûni ata rî: “Mama i mo mawatho ma wîthîre bwa Pasaka: Gûtirî muntû nwa ûmwe ûtarî Mûisiraeri abatîîrue arîa Pasaka. 44 Îndî nkombo yonthe îra ngûre nwa îrîe bunka wegua n'întaane. 45 Ageni kana aruti ngûgî ba gîîntugû batikaarîe Pasaka înu. 46 Bonthe bara bakaarîa kagondu kana kathenge nwa mwanka barîîyanîre barî amwe nyomba îmwe. Bûtikaume nja bûrî na kanyama kaayo, kana bûkaba maîndî maako. 47 Mûgongo wa Isiraeri uunthe nwa mwanka ûkûngwagîîre kîatho gîkî. 48 Wegua kûrî antû batarî Aisiraeri bûtûûraga nabo na i bakwenda gûkûngwagîîra Pasaka ya Mwathani, antû arûme baao bonthe i bataanagwe. Rîru nwa bûrîîyanagîre Pasaka înu nabo. Bakaathûkagua taka baciarîîtwe barî bamwe beenu. Îndî muntû mûrûme atarî mûtaane atibatîîrue arîa Pasaka. 49 Watho bûbû i bwa muntû wonthe nwîgue muntû i Mûisiraeri kanyinyari kana aayire arî mûgeni atûûra gatîgatî keenu.”