Kînyamaara gîa gûkua kwa biîmbere bia antû ba Miisiri
11
1 Mwathani aacooka eera Musa ata rî, “Kûrî kînyamaara kîmwe akî gîtigeere, nakîo ngakîreeta kîrî Faraû na kîrî nthî ya Miisiri. Nyuma yoogu akabûrekeeria bûthi buume gûkû. Na aarûtha ûgu, n'akabwîngatia buume ku cwe. 2 Na îthi wîre antû bonthe aka na arûme beetie atûûri baao into bia thaabu na bia Fetha.” 3 Mwathani n'we aatûma antû ba Isiraeri batîîywa n'antû ba Miisiri. Na nkûrûki yoogu, Musa aathûkagua ta arî we mûnene mûno nthî înu ya Miisiri n'aniini ba Faraû na antû bonthe ba Miisiri.4 Kwoogu Musa eera Faraû ata rî. “Mwathani augîîte ûûgû, ‘Îmunthî ûtugû gatî ngaakûrûkîîra Miisiri, 5 na biîmbere bia twîyî bionthe bigaakua. Kwanjîîria na kîîmbere kîa mûnene Faraû mwanka kîîmbere gîa nkombo ya mwekûrû îra îthiaga. Wana kinya biimbere bia nyamû cia ndîîthia bigaakua. 6 Naku ûkeegua kûrî na irîro biinene mûno nthî înu ya Miisiri bira bitooroîguîka, na gûtirî bingî tabio bikeeguîka kaîrî rî kana rî. 7 Îndî gatîgatî ka aana ba Isiraeri ûkeegua kûrî na ûkiri bûra wana kinya kurû itagîkûûma muntû kana nyamû. Rîru i rîo bûkaamenya bûra Ngai oonanîîtie mûkûûrani wa antû ba Miisiri na ba Isiraeri.’ 8 Aniini baaku bonthe bakaaya baugîîtie rwîro naara ndî banturîrie maru bambereke bakîmbîîraga, ‘Itû ûkîîra ûthûkie antû baaku bonthe bûthi.’ Na nyuma yoogu i rîo nkaumagarûka nthi.” Rîru i rîo Musa aumire gwa Faraû aankanîîte ta mwanki i mûthûûro.
9 Mwathani eerire Musa ûûgû, “Faraû atiîgua bûra ûkaamwîra, kaingo naani nkeegua ndî na kaanya ga kûringa biama biingî na bia inya nkûrûki nthî ya Miisiri.” 10 Wa amwe na kwîgua Musa na Arûni baaringire biama bibi Faraû akîonaga, Mwathani aamûûmiirie nkoro aarega kûrekeeria aana ba Isiraeri bathi bauma nthî yake.