Kînyamaara kîa ngige
10
1 Rîru Mwathani eera Musa, “Îthi kîrî Faraû, n'ûntû nkûûmia nkoro yake na cia aniini baake, kaingo ndinga biama bibi biakwa gatîgatîîni kaao, 2 na biû kaingo bûkeera aana beenu, na biûyûûyû bienu bûra ndaaringire antû ba Miisiri, na biama biakwa bira ndaaringire bakîonaga; kaingo wana biû bûmenya i niû Mwathani.”3 Kwoogu Musa na Arûni baathi kîrî Faraû bamwîra, “Mwathani Ngai wa Aibirania, arîûria, ‘I mwanka rî ûgaatûûra ûregeete kwînyiia kîrî niû? Rekeeria antû baakwa bathi, kaingo bangoonga. 4 N'ûntû warega kûrûtha ûgu, rûû nkaareeta ngige nthîgûrû yaku, 5 na ikunîke nthîgûrû yonthe wîgue îtîkwonekana; na i kaarîa imera bionthe bîra bwatigariirue i mbura ya maiga, na icooke irîe mîtî yonthe. 6 Ngige inu ikaûyûra nyomba cienu, na nyomba cia aniini baaku na cia antû ba Miisiri bonthe. Bûbu bûtoonwa kaîrî i ba abaagu kana bwonwa i booyûûgu kuuma n'ûntû baaciarirwe mwanka îmunthî tûrî.’ ” Rîru Musa auma agu Faraû aarî, aathi. 7 Faraû aûrua n'aniini baake, “I ka muntû ûyû agatwa thîîna mwanka rî? Rekeeria antû bathi, kaingo batûmîkîra Mwathani Ngai wao; ga ûtakûmenya mwanka agu Miisiri n'îmbînyangie ikathira?” 8 Kwoogu Musa na Arûni baacookua kîrî Faraû; n'we abeera, “Îthiini, bûgatûmîkîre Mwathani Ngai wenu. Îndî îîndî, ta mbîîra i baaû bakaathi.” 9 Musa amûcookeria amwîra, “Tûkaathi twinthe mûnene na mûniini; tûkaathi kinya na nthaka cietû amwe na aarî beetû na nyamû cietû cia ndîîthia, n'ûntû nwa mwanka tûrûthîre Mwathani kîatho kîînene.” 10 Faraû atakûmaka abacookeria abeera, “Kaayia ingî Mwathani akabûteethia ûkaaya kwîgua nkabûrekeeria bûthi na aana beenu! I gûkwonekana bwega n'ûbereera bûrî nabu. 11 Arî! Nwa arûme bonka akî mbûûmba kûrekeeria bakathi kûgonga Mwathani, n'ûntû ûgu i bu bûkwenda.” Rîru Musa na Arûni beengatua bauma agu Faraû aarî. 12 Rîru Mwathani eera Musa, “Taambûrûkia njara yaku ûmîraithithîîtie nteere cionthe cia nthîgûrû ya Miisiri kaingo ngige ciiya ciûyûra ku, na irîa imera bionthe na mîtî yonthe nthîgûrû înu bira biatigariirue i mbura îra ya maiga.” 13 Kwoogu Musa aatambûrûkia njara yake agwete mûraagi, acuorootithia nteere cionthe cia nthîgûrû ya Miisiri. Na Mwathani aareeta ruuo nthîgûrû înu ya Miisiri kuuma bwa uumîîrooni bwa riûa naru rwabuutana mûthenya unthe na ûtugû bunthe. Na gûgîkea rûûni rûkîîrî, ruuo rûru rwareeta ngige. 14 Ngige inu ciaya ciaûyûra nthîgûrû ya Miisiri yonthe, na ciakara nteere cionthe cia gûku Miisiri; nacio ciaingîa mûno; na gûtooronekana ngige ciingî ta inu, na gûtikooronekana ta cio kaîrî. 15 Ciakunîkire nthîgûrû înu yonthe, mwanka yayirûa i cio. Nacio ciarîa imera bionthe na mîtî yonthe amwe na matunda mara maatigariirue i mbura îra ya maiga; gûtirî gantû ka ngiriini nwa kamwe gaatigara nthîgûrû înu ya Miisiri yonthe, ûreegua i kîmera kana i mûtî îra yarî mîndaani. 16 Rîru i rîo Faraû eetire Musa na Arûni na mpwî, abeera, “I mbîyîrîîtie Mwathani Ngai wenu, na biû beene. 17 Kwoogu îîndî ngûkwereka, ndekera meeyia maakwa, rîrî rîonka akî, na bûndombere kîrî Mwathani Ngai wenu kaingo andutarutîra gîkuû gîkî kîrî niû.” 18 Kwoogu Musa auma agu kîrî Faraû, aaromba Mwathani. 19 Mwathani n'we aûndûra ruuo rûru rwarî na inya mûno rwa mbarî ya ûthwîro bwa riûa, ruuo rûru rwabuutanire rwakamata ngige rwa citûûra Îria Rîtuune; na gûtirî kagige nwa kamwe gaatigara nthîgûrû înu ya Miisiri yonthe. 20 Îndî amwe na ûgu Mwathani aûmia nkoro ya Faraû, na ataarekeeria antû ba Isiraeri bathi.
Kînyamaara kîa mwindu wa nthaatû
21 Rîru Mwathani eera Musa, “Taambûrûkia njara yaku ûmîûkîîrie îgûrû, kaingo kûgîa mwindu nthîgûrû ya Miisiri yonthe ûmûrumanu mûno, ûkari taka ûûmba gûcuataata ûgacuîgua.” 22 Kwoogu Musa aûkîîria njara yake îgûrû, na kwagîa mwindu ûmûnene mûno nthîgûrû ya Miisiri yonthe bantû a ntugû ithatû. 23 Antû ba Miisiri batikîûmba kûraithana na meetho boonana, na gûtirî we akiuma ara aarî athi bantû a ntugû inu ithatû. Îndî antû ba Isiraeri bonthe i baarî na werû kûra baatwîre. 24 Rîru Faraû eeta Musa amwîra, “Îthiini bûkagonge Mwathani; nwa bûthi kinya na eekûrû na aana beenu; bunka bûtikaathi na nyamû cienu cia ndîîthia.” 25 Musa n'we amwîra, “Nwa mwanka kinya woû ûtûrekeerie twîgue tûrî na igongwana na biegwa bia kûbîîthua, kaingo tûrutîra Mwathani Ngai wetû. 26 Kinya nyamû cietû cia ndîîthia nwa mwanka tûthi nacio; gûtirî nyamû nwa îmwe tûgaatiga, n'ûntû nwa mwanka tûthi nacio tûkagonge Mwathani Ngai wetû, na tûtiiyî i nyamû mbi tûkaarutîra n'yo Mwathani kîgongwana mwanka rîra tûgaakinya noogo.” 27 Îndî amwe na ûgu Mwathani aûmia nkoro ya Faraû, na kwoogu Faraû atikîenda kûbarekeeria bathi. 28 Rîru Faraû eera Musa, “Uma aaga ndî; na wîmenyeere ntigakwone aaga kaîrî; n'ûntû na mma ntugû îra ngakwona aaga kaîrî n'ûgaakua ûkuîte.” 29 Musa amwîra, “Woogu wauga! Ntikooro mbona ûthiû bwaku kaîrî.”