Kuuma 9

Kînyamaara gîa gûkua kwa nyamû cia ndîîthia

1 Mwathani eera Musa ata rî, “Cooka kîrî Faraû ûmwîre, ‘Ûûgû i bu Mwathani, Ngai wa Aibirania akuuga: Rekeeria antû baakwa bathi, kaingo bangoonga. 2 Na waarega kûbarekeeria bathi, 3 Mwathani agaatambûrûkia njara yake arekeerie mûrimo ûthirie nyamû ciaku cia ndîîthia. 4 Îndî Mwathani akaathûrana into bia antû ba Isiraeri na bia antû ba Miisiri na gûtirî nyamû nwa îmwe ya ndîîthia ya antû ba Isiraeri îgaakua.’ ” 5 Mwathani aatua kîatho auga, “Rûû i rîo Mwathani akaarûtha ûgu nthîgûrû îno.”

6 Na rûûni gûgûkîa, Mwathani aarûtha wa ta bûra augîîte. Nyamû cionthe cia ndîîthia cia antû ba Miisiri ciathira, îndî cia antû ba Isiraeri cio itaakua nwa îmwe. 7 Faraû aatûma antû baathi kwona, bakwona baacooka bamwîra, gûtirî nyamû nwa îmwe ya antû ba Isiraeri irakua. Îndî amwe na ûgu Faraû aathi na mbere na kûûmia nkoro na ataarekeeria antû ba Isiraeri bathi.

Kînyamaara gîa gûtûrîkanga matooyo

8 Rîru Mwathani aaria na Musa na Arûni abeera, “Rûmaani muu kuuma riiko na Musa acumince bwa îgûrû Faraû akîonaga. 9 Muu ûyu nau ûgaatuîka tîîri îmbinyu îkunîke nthîgûrû ya Miisiri, na îtûme kwîgua kûrî na mûrimo wa gûtûrîkanga matooyo mwîrî, magaatûrîkangaga mîîrîîni ya antû na ya nyamû, nthîgûrû yonthe ya Miisiri.” 10 Nabo baarûma muu kuuma riiko na baarûngama ara Faraû aarî. Musa acuminca bwa îgûrû, nau watuma kwîgua kûrî na mîrimo ya gûtûrîkanga matooyo mîîrî ya antû na ya nyamû. 11 Agao batikîrûngama mbere ya Musa n'ûntû bwa bûra mîîrî yao yaakunîkîîtwe i matooyo wa ta Amiisiri bara bangî. 12 Îndî Mwathani n'we aûmia Faraû nkoro nkûrûki aarega kûbathikîîria wa ta bûra Mwathani eerîîte Musa.

Kînyamaara kîa mbura ya maiga

13 Mwathani aacooka eera Musa ata rî, “Raûka rûkîîrî gacaitîrî ûthi ûrûngame mbere ya Faraû ûmwîre, ‘Mwathani, Ngai wa Aibirania ariuga ûûgû: Rekeeria antû baakwa bathi kaingo bangoonga. 14 Waarega ûgu, nkabûretera inyamaara bîra bigaakûnyamaaria woû na aniini baaku, wana kinya antû ba Miisiri bonthe. Nkaarûtha ûgu nkîenda gûkwonia gûtirî Ngai ûngî ta niû nthîgûrû yonthe. 15 Mwanka agu, mbatîîrue mbîgua nkûûragîîte woû amwe na antû baaku, na mûrimo ûmûthûûku mûno bûkauma nthîgûrû îno cwe. 16  Ngûtuîkithîîtie mûnene kaingo mbonania naawe bûra ndî inya îgana, na ntambia îgweta rîakwa nthîgûrû yonthe. 17 Na îndî nwaka ûthiîte na mbere kwîbûkîîria ûtikûrekeeria antû baakwa bathi. 18 Rûû ta îîndî ûûgû, mbura îra nkaurithia ya maiga îtaura kaîrî kuuma rîra nthî ya Miisiri yaûmbirwe mwanka îmunthî tûrî. 19 Kwoogu tûmana rûriîni uuge nyamû ciaku cia ndîîthia iringwe ciînûkue na mpwî, n'ûntû muntû ûra agaatuîkîîrua mûndaani kana nyamû cia ndîîthia îra îkeegua îrî kîthakaani îtarî mbînûkie, mbura ya maiga îra îîyîîte yaciurîra, n'igaakua.’ ”

20 Bamwe ba aniini ba Faraû bara baatîîyaga Mwathani i baathîkire bakwîgua bûra Mwathani augîîte, na baareeta nkombo ciao na nyamû ciao cia ndîîthia mûciî baciingîra. 21 Amwe na ûgu, bamwe baao bataatindanîra na bûra Mwathani augîîte baatiga nyamû ciao na nkombo naagu rûriîni. 22 Rîru Mwathani eera Musa, “Taambûrûkia njara yaku ûmîerekereetie bwa îgûrû na mbura ya maiga îkaura nthîgûrû ya Miisiri yonthe yuurîre antû, nyamû na imera bionthe bira birî mîndaani.” 23 Kwoogu Musa aataambûrûkia njara agwete mûraagi wake, acuerekeria îgûrû, Mwathani areeta nkwa na mbura ya maiga, na rweni rwenia nthîgûrû yonthe. Na Mwathani aurithia mbura ya maiga Miisiri yonthe. 24 Na n'ûntû bwoogu kwaura mbura ya maiga înene mûno na rweni rwenagia gîtinîîro ûntû bwa kûrigaria. Kuuma nthîgûrû ya Miisiri îgûtûûrwa n'antû gûtooro ura mbura ta înu kaîrî. 25 Mbura înu ya maiga yenyangiirie nthîgûrû ya Miisiri amwe na bira biarî ku. Yaringa antû, nyamû, na yenyangia imera na mîtî yonthe. 26 Nwa nthîgûrû ya Ngoseni akî îra yaatûûraga aana ba Isiraeri îtaura mbura înu ya maiga.

27 Rîru Faraû aatûmana Musa na Arûni beetwa. Bakûûya abeera, “Îîndî i mbîyîîtie, Mwathani n'we wagîrîîte, îndî niû na antû baakwa itûbîtîîtie. 28 Rombaani Mwathani, n'ûntû mwanka agu tûkwinya i nkwa na mbura înene ya maiga. Nkabûrekeeria bûthi, na gûtirî gûta kaanya kaîrî.” 29 Musa amwîra, “Rîra nkaumagarûka taûni îno, ngaataambûrûkia njara ndoombe Mwathani. Na gûticooka kwîgua kûrî na nkwa kaîrî, na mbura ya maiga îkîe cwe, kaingo bûmenya Mwathani n'we mwene nthî. 30 Îndî inkûmenya wana îîndî woû na aniini baaku twaka bûgûkuthûka Mwathani Ngai.”

31 Gatani na sayiri iciaurîîrwe cienyangua. N'ûntû mbarî i ciarî igûciara na gatani n'yaraîte. 32 Îndî ngano na kûcemethû cio iteenyangua i mbura n'ûntû cio itaarî i kwîrua.

33 Musa auma agu kîrî Faraû aumagarûka ome ya taûni aathi aatambûrûkia njara aaromba Mwathani. Akûromba, nkwa ciatiga kûthandîka na mbura înu ya maiga yakea cwe. 34 Faraû akwona nkwa igûtiga kûthandîka na mbura înu ya maiga îgûkea aacooka wa ara akûrû, eeyia kaîrî: Wee na aniini baake baacooka kûûmia nkoro kaîrî. 35 Kwoogu nkoro ya Faraû yaûma kaîrî wata wîthîre na aarega kûrekeeria aana ba Isiraeri bathi, wa ta bûra Mwathani eerîîte Musa.