Kînyamaara kîa biûra
8
1 Mwathani aacooka eera Musa ata rî, “Îthi kîrî Faraû kaîrî ûmwîre, ‘Mwathani ariuga ûûgû: Rekeeria antû baakwa bathi kaingo bangoonga. 2 Waarega kûbarekeeria ngakwa îkaanûkia, mbûyûrie nthîgûrû yaku na biûra. 3 Muuro wa Naero ûkaûyûra biûra teke. Biume ku bithûngîre waku mûciî bikûrûke bithûngîre nyomba yaku ya ûmaamo bitwe ûrîrîîni bwaku, bithûngîre nyomba cia aniini baaku na cia antû baaku, na bicooke bikûrûke bithûngîre kîrugîrooni gîaku ara ûrugagîrwa na biûyûre ikandiini bia mîgaate. 4 Na t'ûgu bunka, bikaathûngûthaga bigagûtwa mwîrî waku, na mîîrî ya antû baaku, na ya aniini baaku bonthe.’ ”5 Mwathani eera Musa ata rî, “Îra Arûni, ataambûrûkie njara yake îrî na mûraagi îgûrû ya rûûyî, mîtaro ya rûûyî, maria na oone biûra bikuuma ku biathi biaûyûra nthî ya Miisiri.” 6 Kwoogu Arûni aathingata bûra eerîîtwe na biûra biauma rûûyîîni biaûyûra nthî ya Miisiri. 7 Îndî agao nabo bakwona ûgu, baatûmîra mûtheega kinya bo baumîria biûra rûûyîîni babireeta nthî ya Miisiri.
8 Nyuma ya ûgu, Faraû atûmana Musa na Arûni abeera, “Rombaani Mwathani arute biûra bibi biume gwakwa na kîrî antû baakwa, naani nkaarekeeria antû beenu bathi, kaingo baûmba kûrutîra Mwathani kîgongwana.” 9 Musa acookeria Faraû amwîra, “Nwa mbende gûkûrombera. Ceria îgiita ûmbîîre rîra ûkwenda nkûrombera, ndombera aniini baaku, na antû baaku. Ngakûrombera na biûra bikaathirua nyomba cienu cwe, bitigare wa bira birî muurooni bionka.” 10 Faraû amwîra, “Ûndombere rûû.” Musa n'we amwîra, “I bwega, gûgaakarîka woogu wauga. Rîru i rîo ûkaamenya gûtirî ûngî ûrî inya ta Mwathani Ngai wetû. 11 Biûra bionthe bikauma waku, na nyomba ciaku, na kwa aniini baaku, na wa antû baaku bitigare bira birî muurooni wa Naero bionka.”
12 Rîru Musa na Arûni bauma kwa Faraû baathi. Na Musa aakayîra Mwathani n'ûntû bwa biûra bira aaretereete Faraû wa ta bûra baagwatanîrîîte. 13 Mwathani n'we aarûtha wa bûra Musa eerîîte Faraû na biûra bibu biakua biathira nyomba, nja ya mûciî na mîndaani. 14 Na babiîthîrania ithûmba ithûmba, mwanka nthî yaûyûra kîrumba. 15 Faraû akwona biûra bikûthira, aûmia nkoro kaîrî na aarega kwathîkîra Musa na Arûni wa ta bûra Mwathani augîîte.
Kînyamaara kîa ndaa
16 Mwathani eera Musa, “Îra Arûni aturanie mûraagi wake nthî, na mûthetu uunthe wa nthî ya Miisiri ûgaatuîka nthuua.” 17 Na Arûni aarûtha woogu, aaturania mûraagi nthî na tîîri yaûmbûka yaatuîka ndaa yaakunîkîra antû na nyamû. Tîîri yonthe ya nthîgûrû ya Miisiri yaatuîka ndaa. 18 Agao bakwona ûgu baageria gûtûmîra mîtheega yao bagarûra tîîri îtuîka ndaa na bwarema. Ndaa inu ciarî kîrî antû na nyamû. 19 Na gûgûkarîka ûgu, beera mûnene, “I Ngai ûrûthîîte ûûgû!” Îndî amwe na ûgu Faraû aathiire na mbere kûûmia nkoro na atatindanîra na ntheto cia Musa na Arûni wa ta bûra Mwathani augîîte.
Kînyamaara kîa ngi
20 Mwathani eera Musa, “Raûka rûû rûkîîrî gacaitîrî ûthi ûkomane na Faraû athiîte muurooni, na ûmwîre Mwathani ariuga, ‘Rekeeria antû baakwa bathi, kaingo baûmba kûngonga. 21 Na gangûkaanie, ûkaaya kûregana na mantû mamu, ngakwa îkaanûkia rîa gûgûtûmîra mûrumbî wa ngi ciûyûre gwaku, kwa aniini baaku na wa antû baaku. Nyomba cia antû ba Miisiri ikaûyûra ngi teke na nthîgûrû n'yo îkunîkwe i cio. 22 Na ntugû înu nthî ya Ngoseni, kûra antû baakwa batwîre gûkeegua kûrî na mwanya n'ûntû gûtiîgua kûrî na mûrumbî wa ngi. Nkaarûtha ûgu, kaingo bûkaamenya i niû, Mwathani na ndî na inya kinya ndeeni ya nthîgûrû îno yenu. 23 Ngeekîra mûkûûrani wa antû baakwa na baaku. Kîama gîkî gîkoonekana rûû.’ ” 24 Mwathani aarûtha ûgu; aareeta ngi inyingî mûno mûciî wa Faraû, na ndeeni ya nyomba cia aniini baake. Nthîgûrû ya Miisiri yathi mbere kwînyangua i mîruumbî ya ngi.
25 Rîru mûnene Faraû atûmana Musa na Arûni baaya abeera, “Îthiini bûkarutîre Ngai wenu kîgongwana bûrî nthîgûrû wa îno.” 26 Musa n'we amwîra, “Gûtibatîîrue kûrûthwa ûgu, n'ûntû igongwana bira tûkaarutîra Mwathani Ngai wetû, bikaathûûria antû ba Miisiri na bagatûûraga na maiga. 27 Nwa mwanka tûthi rûgendo rwa ntugû ithatû tûkinye rwanda tûkarutîre Mwathani Ngai wetû kîgongwana, wa ta bûra aatwathire.” 28 Faraû abeera, “Nkabûrekeeria bûthi bûkarutîre Mwathani Ngai wenu kîgongwana rwanda bunka bûtikaathi araaya mûno. Îîndî ndomberaani.” 29 Musa aacookia auga, “Warîo ndauma aaga, nkaaromba Mwathani na rûû ngi cionthe ikaathaama ciume gwaku, kwa aruti ngûgî baaku na wa antû baaku bunka ûtigatweneerie kaîrî ûrigîîria antû bathi kûrutîra Mwathani kîgongwana.”
30 Kwoogu Musa auma wa Faraû na aaromba Mwathani athaamie ngi cionthe. 31 Na Mwathani eegua maromba ma Musa na aarûtha wa bûra aamûrombeete, ngi ciauma wa Faraû na kwa aruti ngûgî baake na wa antû baao, na gûtirî ngi nwa îmwe yaatigara. 32 Îndî amwe na ûgu, Faraû aathiire na mbere kûûmia nkoro na aarega kûrekeeria antû ba Isiraeri bathi.