Mûraagi wa Musa watuîka njoka
7
1 Mwathani eera Musa ata rî, “Woû ngûgûtuîkithia ta Ngai kîrî mûnene Faraû, na mûruanyûkwe Arûni n'we akeegua arî kîroria gîaku, aaragie bantû aaku. 2 Îra Arûni mantû monthe mara ngûkwîra, eere Faraû mo. Amwîre aana ba Isiraeri barekeerue baume Miisiri. 3 Îndî naani ncooke mbûûmie nkoro ya Faraû, kaingo nkaathi na mbere kûringa biama bia kûrigaria nkûrûki nthîgûrû înu ya Miisiri. 4 N'we Faraû atiîgua bûra bûkaamwîra. Kwoogu naani nkainyîîria antû ba Miisiri na kûbaa îkaanûkia, na ncooke ndute antû baakwa ba Isiraeri baume Miisiri. 5 Na rîra nkoonia antû ba Miisiri bûra inya yakwa îgana, na ndute aana ba Isiraeri gatîgatî kaao, rîru i rîo bakaamenya i niû Mwathani.” 6 Kwoogu Musa na Arûni baarûtha wa ta bûra Mwathani aabaathîîte. 7 Îgiita rîru baariirie na Faraû, Musa aarî na ûkûrû bwa mîanka mîrongo înaana, Arûni n'we aarî na mîanka mîrongo înaana na îthatû.Mûraagi wa Arûni
8 Rîru Mwathani aaria na Musa na Arûni abeera, 9 “Faraû nwa akeenda bûringa kîama akîonaga kaingo eetîgia bûtûmîîtwe i Ngai. Akauga ûgu, wîre Arûni arekie mûraagi wake nthî, na mûraagi ûyu ûkaagarûka ûtuîke njoka.”
10 Nyuma ya ûgu, Musa na Arûni baathi kîrî Faraû na baarûtha wa bûra Mwathani aabaathîîte. Arûni aarekia mûraagi wake nthî mbere ya Faraû na aniini baake, nau watuîka njoka. 11 Faraû akwona ûgu, eeta antû baake bara baûme na aringia. Antû babu i bo baarî agao ba Miisiri. Nabo baaringa biama wa ta Musa na Arûni. 12 Wana bo baarekagia mîraagi yao nthî îgatuîka njoka. Îndî amwe na ûgu, njoka îra yarî mûraagi wa Arûni yaameria njoka ciao cionthe. 13 Nkoro ya Faraû n'yo yaathi na mbere kûûma nkûrûki wa ta bûra Mwathani augîîte atî, mûnene atiîgua ntheto cia Musa na Arûni.
Kînyamaara kîa muuro wa Naero rûûyî rwagarûka rwatuîka nthakame
14 Mwathani n'we eera Musa ata rî, “Nkoro ya Faraû n'îmbûmo mûno, naregeete kûrekeeria antû bathi. 15 Kwoogu raûka rûkîîrî rîra Faraû athiyaga muurooni ûkomane n'we. Na wakinya ûrûngame rûteere rwa muuro ûgwete mûraagi waku woora wagarûkîîte watuîka njoka. 16 Wamwona ûmwîre, ‘Mwathani Ngai wa Aibirania, aantûma nkwîra ûrekeerie antû baake bathi, kaingo bamûgongera naagu rwanda. Naawe wana îîndî ûtikwîgua. 17 Îîndî mûnene, Mwathani ariuga woû wengwa ûkeebonera mantû mara akaarûtha ûmenye we n'we Mwathani. Ata rî, nkaaringa rûûyî rwa Naero na mûraagi ûyû, na rûkaagarûka rûtuîke nthakame. 18 Na makûyû magaakua na muuro ûnuunke kîrumba kîî mwanka antû ba Miisiri baremwe i kûnyua rûûyî rwau.’ ” 19 Mwathani eera Musa, “Îra Arûni athûkie mûraagi wake acuorootithie ndûûyîîni cia Miisiri ira irî miurooni, mîtarooni, na mariani. Rûûyî rûgaatuîka nthakame, na nthîgûrû yonthe îkunîkwe i nthakame. Wana kinya into bira biîkagîrwa rûûyî; i biîgue niikuru bia mîtî kana bia maiga bikaûyûra nthakame.”
20 Nyuma ya ûgu, Musa na Arûni baarûtha wa bûra Mwathani aabaathîîte. Musa aûkîîria mûraagi wake aaringa nau rûûyî rwa muuro wa Naero mûnene wa Miisiri na atongoria babu bangî ba nthîgûrû yake bakîonaga, na rûûyî rwa muuro runthe rwagarûka rwatuîka nthakame. 21 Makûyû mara maarî rûûyîîni maakua, na rûûyî naru, rwanunkaga naaî na rûtikînyuîka. Nthakame yaanyagaarîîte gûku Miisiri kunthe. 22 Îndî agao ba Miisiri nabo baarûtha mantû wa ta mamu na ûgao bwao, na Faraû aathi na mbere na kûûmia nkoro nkûrûki. Wa ta bûra Mwathani aabeerîîte, mûnene ataatindanîra na bûra Musa na Arûni baamwîrire. 23 Faraû auma agu eenûka na ataatindanîra na mantû mamu kaîrî. 24 Antû ba Miisiri bonthe banjîîria kwînja ithima magombeeni ma muuro n'ûntû bataûmbaga kûnyua rûûyî rwa muuro. 25 Na ntugû mûgwanja ciathira kuuma Mwathani akûgarûra rûûyî rwatuîka nthakame.