6
1 Rîru Mwathani eera Musa, “Îîndî ûkoona mantû mara nkaarûthîra Faraû. Nkamwinyîîria na inya înene ya njara yakwa mwanka arekeerie antû baakwa bathi. Na mma nkamwinyîîria na inya înene ya njara yakwa mwanka abeengatie baume nthîgûrû înu yake.”Ngai eeta Musa
2 Ngai aaria na Musa kaîrî amwîra, “I niû Mwathani. 3 I ndeebonaniirie kîrî Îburaîmu, kîrî Isaka na kîrî Njakubu ta Ngai Mwene Inya yonthe, îndî nteemenyithania kîrî bo na riîtwa rîakwa, ta rîo Mwathani. 4 Na kaîrî kûrî kîrîîkanîro ndaarîîkanîîre nabo ndabeera nkabaa nthîgûrû ya Kanaani, nthîgûrû îra baatwîre barî ageni. 5 Na nkûrûki i mbîgîîtue gûkaya kwa aana ba Isiraeri, bara batwîre barî nkombo cia antû ba Miisiri na nkaûyûria kîrîîkanîro gîakwa. 6 Kwoogu îraani aana ba Isiraeri ndabeera, ‘I niû Mwathani, nkaabûruta buume ûkombooni bwa antû ba Miisiri. Nkabûkûûra ku na inya yakwa înene, na nkaanenkera antû ba Miisiri îkaanûkia rîînene mûno. 7 Nkabûtuîkithia antû baakwa na nkeegua ndî Ngai wenu. Bûkaamenya i niû Mwathani Ngai wenu ûra aabûrutire bwauma ûkombooni bwa Miisiri. 8 Nkabuira nthîgûrû îra ndaathiîtiirie ndauga ngaapa, Îburaîmu, Isaka, na Njakubu; na n'yo nkaabwaa îtuîke rûgai rwenu. I niû Mwathani.’ ” 9 Musa neerire aana ba Isiraeri ûgu, îndî nabo bataamûthikîîria n'ûntû bwa bûra nkoro ciao ciarî ikûnyinkithara i kwinyîîrua n'ûkombo.
10 Rîru Mwathani aaria na Musa amwîra, 11 “Cooka kîrî Faraû mûnene wa Miisiri ûmwîre arekeerie aana ba Isiraeri baume nthîgûrû înu yake bathi.” 12 Îndî Musa eera Mwathani ûûgû, “Ûkaaya kwîgua antû baakwa ba Isiraeri batikûmbîgua rî, n'aata Faraû we akeegua bûra nkûmwîra? Niû ntiiyî kwaria bwega.”a
13 Mwathani n'we aaruta watho kîrî Musa na Arûni abeera bacooke kîrî Faraû, mûnene wa Miisiri, bamwîre nwa mwanka arekeerie aana ba Isiraeri baume Miisiri.
Rûrîîyo rwa Musa na Arûni
14 Mama i mo mariîtwa ma beethe ba mîîrîga ya Isiraeri; Rubeni, kîîmbere kîa Njakubu, aarî na nthaka inya. Mariîtwa maao ni Anoki, Paru, Esironi na Karimi. Rûrû i ru rûrîîyo rwa Rubeni. 15 Simioni aarî na nthaka ithanthatû. Nabo mariîtwa maao i mama: Njemueri, Njamini, Oandi, Njakini, Soari, na Saûrû ûra aarî wa mwekûrû Mûkanaani. Ino i cio nciarwa cia Simioni. 16 Rawi n'we aarî na nthaka ithatû na mariîtwa maao i mama: Ngerisoni, Koathi, na Merari. Înu n'yo yaatuîkire mîîrîga ya ndîîyo ciao. Rawi aatûûrire mwoyo mîanka îgana rîa mîrongo îthatû na mûgwanja. 17 Ngerisoni aarî na nthaka ciîrî: Ribuni na Simei, nabo i baarî na nciarwa ciao. 18 Koathi aarî na nthaka inya: Amuramu, Isaarî, Eburoni, na Usieri. Koathi aatûûrire mwoyo mîanka îgana rîa mîrongo îthatû na îthatû. 19 Merari n'we aarî na nthaka ciîrî: Maari na Musi. Înu n'yo mîîrîga ya Rawi kûringana na nciarwa ciao.
20 Amuramu aagûrire mwaragina wa îthe. Na riîtwa rîa mwekûrû ûyu eetagwa Njosebendi na n'we gina wa Arûni na Musa. Amuramu aatûûrire mîanka îgana rîa mîrongo îthatû na mûgwanja. 21 Isaarî aarî na nthaka ithatû: Kora, Nefegi, na Sikiri. 22 Usieri wan'we aarî na nthaka ithatû: Misaeri, Erisafani, na Sithiri. 23 Arûni aagûrire Eriseba. Eriseba aarî mwaragina wa Naasoni na îthe eetagwa Aminandabu. Aana ba Arûni na Eriseba baarî: Nandabu, Abiu, Eriasari, na Ithamarû. 24 Kora n'we aarî na nthaka ithatû: Asiri, Erikana, na Abiasabu. Rûrîîyo rwao i ru rwatuîkire mîîrîga ya Kora. 25 Eriasari, mwana wa Arûni, aagûrire mwarî ûmwe wa muntû eetagwa Putieri. Baagîa na mwana eetagwa Finiasi. Baba i bo antû ba rûrîîyo rwa mîîrîga ya Arawi kûringana na bûra mîciî yao yaakari.
26 Arûni na Musa i bo bara Mwathani aarîîrie abeera, “Tongoreeriani antû ba Isiraeri baume Miisiri, kûringana na ikundi biao.” 27 Na nwabo bara baariirie na Faraû, mûnene wa Miisiri, kaingo arekeeria aana ba Isiraeri bauma nthîgûrû ya Miisiri.
Ngai eera Musa na Arûni baarie na Faraû