Musa na Arûni bairîra Faraû ntûmwa ya Ngai
5
1 Nyuma ya ûgu, Musa na Arûni baathi kîrî Faraû bamwîra, “Mwathani, Ngai wa Isiraeri ariuga, ‘Rekeeria antû baakwa bathi, kaingo barûtha kîatho rwanda n'ûntû bwa gûntîîya.’ ” 2 Îndî Faraû aûria, “Mwathani ûyu n'arî ûû? Ndîmwathîkîra arî ûû kaingo ndekeeria aana ba Isiraeri bathi? Ntiiyî Mwathani ûyu niû, na ntiirekeeria aana ba Isiraeri bathi.” 3 Musa na Arûni bamûcookeria bamwîra, “Ngai ûra tiû Aibirania tûgongaga n'we wîbonanîîtie kîrî tiû. Tûrekeerie tûthi rûgendo rwa ntugû ithatû mwanka tûkinye rwanda tûkarutîre Mwathani Ngai wetû igongwana. Tûkarega kûrûtha ûgu, agatûthiria na mîrimo kana ndûa.” 4 Mûnene wa Miisiri aagondokera Musa na Arûni abaûria, “I ka bûkûthûgaania bûrî baaû, biû bûkûrigîîria antû bakîruta ngûgî? Cookaani bûkarute ngûgî! 5 Raithaani bwone, kûrî na antû ba Isiraeri baingî aaga Miisiri na i bûkwenda batiga kûruta ngûgî yao!”6 Ntugû wa înu Faraû aaruta watho kîrî arûngamîri bara baakaragia nkombo na atongoria ba arûngamîîri babu abeera, 7 “Bûtigaacooke kûneenkera antû rûûa rwa kûûmba matubaarî. Rekanaani nabo bathi bageecwîre ru barî bongwa. 8 Îndî bûmenyeere bûtikaabagaûrîre îtubaarî nwa rîmwe. I baûmbe magana wa bûra baûmbaga rîra rîngî. Barîonania batirî na ngûgî înganu ya kûruta i kîo n'ûntû bakuuga barekeerue bathi bakarutîre Ngai wao igongwana. 9 Rutithiani antû baba ngûgî îndito nkûrûki ya bûra bararutaga kaingo batoona thaa cia kûthikîîria mantû ma ûrongo.”
10 Kwoogu arûngamîîri bara baakaragia nkombo na atongoria ba arûngamîîri babu, beera antû, “Faraû augîîte atibûnenkera rûûa kaîrî. 11 Bûkaathiiyaga gwîcwîra rûûa rûru bwingwa wa ara bûkaaruona na ngûgî yenu îtiinyiiua nwa aniini. Bûkaûmbaga matubaarî magana wa bûra bûûmbaga.” 12 Kwoogu antû baanyagaara nthîgûrû înu ya Miisiri yonthe bagîcwaga rûûa. 13 Arûngamîîri baao babathûûkîîra mûno bakîenda wa muntû aruta ngûgî ya kûgana ntugû wata wîthîre. 14 Arûngamîîri ba nkombo bara baarî Amiisiri banjîîria kûgoondora atongoria ba nkombo bara baathuurîîte bongwa ba Isiraeri bakîbaûragia, “I mbi n'ûntû bûtakûûmba matubaarî magana wa bûra bûraûmbaga?”
15 Rîru arûngamîîri babu ba nkombo ba Isiraeri baathi gûkayîra Faraû bamwîra, “Itû aba tiga gûtûnyamaaria ûûgû. 16 Raitha wone îîndî ûûgû tûtikwegwa rûûa, na tûrîîrwa nwa mwanka tûûmbe matubaarî magana wa ta ma mbere. Tûrîringwa n'ûntû bwa thîîna îtarî yetû! Thîîna înu n'ya antû baaku.” 17 Faraû n'we abacookeria abeera, “Biû i ka bûrî ithao! Na bûtikwenda kûruta ngûgî na i kîo gîtûmi bûkûmbîîra mbûrekeerie bûthi bûkarutîre Mwathani wenu igongwana. 18 Cookaani bûkarute ngûgî! Na gûtirî rûûa bûkeegwa na nwa mwanka weera ntugû bûûmbe matubaarî maaganu.” 19 Arûngamîîri babu ba nkombo ba Isiraeri bakûregerwa îromba rîao i Faraû, boona barî thîînaani îmbîî.
20 Bakuuma agu kîrî Faraû, beethîra Musa na Arûni babeeteereete agu ome. 21 Arûngamîîri babu ba nkombo ba Isiraeri beera Musa na Arûni, “Mwathani aroona bûra bwarûtha na akabwa îkaanûkia n'ûntû bwa gûtûma Faraû na aniini baake batûmena. I biû bûratûmire beenda gûtûûraga.”
Musa anung'unîra Ngai
22 Nyuma ya ûgu Musa aacooka kîrî Mwathani kaîrî amûûria, “Mwathani, i mbi n'ûntû watûma antû baba bagwatwa i kînyamaara na ûrûrû bûgana ûûgû? I mbi ûrantûmagîra? 23 Kuuma warîra ndaayire ndeera Faraû ntûmwa ciaku, ataatigana na kûbanyamaaria. Nwaka athiiyaga na mbere kûbanyamaaria nkûrûki. Na woû gûtirî bu warûtha nwa aniini ûkûûra antû baaku bauma thîînaani.”