Biama bia inya ya Mwathani
4
1 Musa eera Mwathani ata rî, “Atongoria babu batiimbîtîgia kana bathikîîria bûra nkuuga, n'ûntû bakauga, ‘Mwathani ateebonania kîrî woû.’ ” 2 Mwathani n'we amûûria, “Iimbi înu ûgwete?” Musa amwîra, “I mûraagi.” 3 Mwathani amwîra, “Curekie nthîgûrû.” Musa agûcurekia nthîgûrû, mûraagi ûra wagarûka watuîka njoka. Augia rwîro amîkuthûka. 4 Rîru Mwathani amwîra, “Taambûrûkia njara ûmîgwate mûtiro ûmîthûkie.” Kwoogu Musa aataambûrûkia njara na amîgwata, na yaagarûka yatuîka mûraagi kaîrî. 5 Mwathani amwîra, “Îthi ûrûthe kîama gîku wonie atongoria babu kaingo beetîgia atî Mwathani, Ngai wa biûyûûyû biao, Ngai wa Îburaîmu, Isaka na Njakubu, n'eebonanîîtie kîrî woû.” 6 Mwathani aaria na Musa kaîrî amwîra, “Îkîra njara yaku kîbaraani.” Musa aarûtha bu. Na akûruta njara yake kîbara akûmîraitha oona n'îwatirwe i mûtigiri yaathera ce ta îra. 7 Mwathani aacooka amwîra, “Cookia njara yaku kîbaraani kaîrî.” Musa aarûtha wa bûra Mwathani aamwîrire. Akûmîruta kîbaraani kaîrî, akîraitha oona njara nîgarûkire yaabua yabuanaana na mwîrî ûra ûngî. 8 Mwathani amwîra, “Wegua batigwîtîgia kana beetîgia kîama gîku kîa mbere, nwa wîgue bageetîgia gîku kîa biîrî. 9 Na bakaaya kûrega wîtîgia biama bibu birî biîrî kana bakarega gûkwathîkîra, ûkaathi ûtae rûûyî muurooni wa Naero ûrutûûre nthîgûrû îmbûmo. Rûûyî rûru rûkaagarûka rûtuîke nthakame.” 10 Îndî Musa eera Mwathani ata rî, “Mwathani, niû kuuma woo tene ntitwîre mbiyî kwaria. Wana kinya mbere waria naani, kana nyuma ya ûkwaria naani, niû ntitwîre mbaragia bwega. N'ûntû niû ndwa kîthantaurû na gîtirekaga mbaria bwega.” 11 Mwathani amûûria, “N'ûû waûmbire kanyua ka muntû? Kana n'ûû, ûtûmaga muntû atuîka maamu kana gîpûra? Kana n'ûû ûtûmaga oona kana atuîka ntûngi? Anga twa niû Mwathani, ndûthaga ûgu? 12 Kwoogu îthi! Ngakûrutana ûmenye kwaria, na i niû ngaakwîraga bûra ûkauga.” 13 Îndî Musa n'we amwîra, “Itû Mwathani ngûkwereka tûma muntû ûngî bantû aakwa.” 14 Mwanka agu Mwathani athûûra mûno i Musa, na amûûria, “I ka mûruanyûkwe Arûni ûra Mûrawi atarî oogo? N'ûntû imbiyî we n'aiyî kwaria bwega. N'aayîîte bûkomane n'we, na rîra agaakwona, agaakena mûno. 15 Ûkaaria n'we na ûmwîre bûra akauga. Nkabûteetheeria kûmenya kwaria na nkabwîra bûra bûkaarûtha. 16 N'we agaatuîka muntû wa kwarîria antû bantû aaku. Rîru naawe wîgue ûkari ta Ngai wa kûmwîraga bûra akauga. 17 Ûkaathûkia mûraagi ûyû ûkamate ûthi nau; n'ûntû n'uu ûgaatûmîra kûringa biama.”Musa aacooka Miisiri
18 Rîru Musa aacooka kwa mûthonuue Njethiro amwîra, “Itû aba mbîtîgîîria ncooke kîrî antû beetû Miisiri mbone wegua barî mwoyo mwanka agu.” Njethiro amwîtîgîîria amwîra, “I ka ûkaathi bwega.” 19 Musa wa arî nthîgûrû ya Mindiani, Mwathani amwîra, “Cooka nthîgûrû ya Miisiri n'ûntû bara beendaga gûkûûraga i baakuû.” 20 Kwoogu Musa aathûkia mwekûrû wake, na twana twake twa twîyî abatwethia îng'ooini na aacooka nabo nthîgûrû ya Miisiri wa akamatîîte mûraagi ûra Ngai aamwîrire akamate na njara.
21 Kaîrî Mwathani eera Musa, “Îîndî n'ûntû n'ûcookeete Miisiri, ûririkane biama bira bionthe ndaakwere inya ya kûbiringa, ûbiriinge Faraû akîonaga. Îndî naani ngaatûma aûmie nkoro yake na arege kûrekeeria antû bathi. 22 Rîru naawe wîre Faraû, ‘Mwathani ariuga, Isiraeri i kîîmbere gîakwa. 23 Ndaakwîrire ûrekeerie mwana wakwa athi, kaingo angoonga, îndî naawe warega. Îîndî i nkaûraga kîîmbere gîaku gîa kaîyî.’ ”
24 Gwakarîkire ûgu, rîra baarî njîraani bathiîte Miisiri bagûkinya bantû ara beendaga kûraarîîra, Mwathani aakomana na Musa na eenda kûmûûraga. 25 Îndî Sipoora aathûkia nkengecû ya iiga rîûmo aataana mwîyî wake n'yo na aatongithia magûrû ma Musa na nkonde înu akîmwîraga, “Na mma ûrî mûkûrû wakwa wa nthakame.”a 26 N'ûntû bwoogu Mwathani aatîîra kûûraga Musa. (Kagiita gaku mwekûrû augaga “mûkûrû wakwa wa nthakame,” aaragîîria mantû ma rûtaano.)
27 Mwathani eera Arûni aume athi agakomane na Musa rwanda. Arûni n'we auma aathi aakomana na Musa kîrîmaani kîa Ngai amûkeethia na njîra ya kûmûcunca. 28 Rîru Musa aacooka eera Arûni mantû monthe mara Mwathani aamwathîîte rîra aamwîrire acooke Miisiri. Na aacooka amwîra mantû ma biama bira Mwathani aamwathîîte ariinge. 29 Kwoogu Musa na Arûni baathi bwa Miisiri na beethîrania atongoria ba Isiraeri bonthe amwe. 30 Arûni eera atongoria babu ba Isiraeri mantû monthe mara Mwathani eerîîte Musa. Na Musa n'we aacooka aaringa biama bionthe bakîonaga, wa ta bûra Mwathani aamwîrîîte. 31 Atongoria babu ba Isiraeri beetîgia i Mwathani watûmîîte Musa na Arûni kîrî bo. Na bakûmenya Mwathani n'amenyire bûra baanyamaarîîtue bûgana, baatiirithia moothiû maao nthî baagonga.