Kuuma 3

Musa oona gakando gaakanaga Mwanki

1 Ntugû îmwe Musa arîîthîîtie mbûri na ng'ondu cia mûthonuue Njethiro, ûra aarî mûthînjîri wa Ngai nthîgûrû ya Mindiani, acitongoreeria aciira bwa rwanda, mwanka aakinya kîrîmaani kîa Ngai kîra gîîtagwa Orebu. 2 Mûraîka wa Mwathani amuumîîra arî rûrîrîmbîîni rwa mwanki rwankanaga kaunguuni, na Musa akûraitha, oona mwanki îndî ûtaabîîthagia kathaka gaku. 3 Musa oona ûntû bwa kûrigaria eebûûria, “I mbi n'ûntû mwanki ûtakûbîîthia kaungu gaka? Inkûthi aakubî ndîîbonere.” 4 Mwathani akwona Musa aayîîte arî akubî gûkinya amwîta arî kaunguuni gaku gatîgatî, “Musa! Musa!” Musa eetîga auga, “Yîî ndî aaga.” 5 Ngai amwîra, “Ûtikaaye aakubî. Ruta iraatû n'ûntû agu ûrûngi i bantû aatheru. 6 Niû ndî Ngai wa biûyûûyû bienu, Ngai wa Îburaîmu, Isaka na Njakubu.” Kwoogu Musa aakunîkîra ûthiû bwake, n'ûntû n'akuthûkaga gûcûûba Ngai na meetho.

7 Rîru Mwathani amwîra, “I mboneete kînyamaara kîra antû baakwa bakûrîa Miisiri, na i mbîgîîtue kîrîro kîao bûra bainyîîrîtue n'arûngamîîri baao ûkombooni, na inkûmenya mathîîna maao. 8 Kwoogu mbîndamîîte kaingo mbatuunyûkia kuuma njaraani cia Amiisiri na mbarute nthîgûrû înu mbaire nthîgûrû înoru na înene, yûûyûrîîte îria na ûkî. N'yo i nthîgûrû ya Akanaani, Aiti, Amori, Aperisi, Aibi, na Anjebusi. 9 Na îîndî, nkwîgua kîrîro kîa aana ba Isiraeri, na nkwona bûra bakûnyamaarua n'antû ba Miisiri. 10 Kwoogu îîndî, ingûgûtûma kîrî Faraû mûnene wa Miisiri ûkarute antû baakwa ba Isiraeri ku.” 11 Îndî Musa n'we aûria Ngai, “Niû rî, ndî ûû wa kûthi kîrî mûnene wa Miisiri na nduta aana ba Isiraeri noogo?” 12 Ngai amwîra, “Îthi nkeegua ndî naawe, na waruta aana ba Isiraeri Miisiri, bûkaangongera kîrîmaani gîkî. Na ûgu i kwonania i niû ngûtûmîîte.” 13 Îndî Musa n'we amûcookeria amwîra, “Nkathi kîrî Aisiraeri nkabeera, ‘I Ngai wa booyûûgu ûntûmîîte kîrî biû,’ nabo bakambûûria, ‘N'ata eetagwa?’ n'ata nkaabeera?” 14 Ngai eera Musa, “niû ndî ûra rîonthe ntûûraga ndî. Na ûthi wîre aana ba Isiraeri, ‘niû ûra ntûûraga ndî agûûntûma kîrî biû.’ ” 15 Na kaîrî Ngai eera Musa, “Beere, ‘Mwathani, Ngai wa biûyûûyû bienu, Ngai wa Îburaîmu, Isaka na Njakubu, agûûntûma kîrî biû.’ Rîru i rîo riîtwa rîakwa mwanka tene na tene, ntwîre ngîîtagwa ûgu, na i bu ngeetagwa i nciarwa cionthe.

16 “Îthi wîte atongoria ba Isiraeri amwe bonthe. Ûbeere ûûgû, ‘Mwathani, Ngai wa booyûûgu, Ngai wa Îburaîmu, Isaka, na Njakubu, n'eebonaniirie kîrî niû akiugaga, “Nkûûya ndoona bûra aana ba Isiraeri bakûrûthwa n'Amiisiri. 17 Naani ndoona nkabûruta buume kînyamaaraani kîa Amiisiri mbwire nthî îrî na mûthetu ûmûnoru, nthîgûrû ya antû ba Kanaani, Aiti, Amori, Aperisi, ba Aibi, na ba Njebusi, nthîgûrû yûûyûrîîte îria na ûkî.” ’

18 “Atongoria ba Isiraeri bagakûthikîîria ûbeere ntûmwa yakwa. Rîru bûcooke bûthi na atongoria ba antû ba Isiraeri kîrî mûnene wa Miisiri na bûmwîre ûûgû, ‘Mwathani, Ngai wa Aibirania akwîbonania kîrî tiû. Kwoogu îîndî, tûrekeerie tûthi rûgendo rwa ntugû ithatû rwanda tûkarutîre Mwathani, Ngai wetû, kîgongwana.’ 19 Inkûmenya mûnene wa Miisiri atibwîtîgîîria bûthi nwanga arî mûkinyîîrie kûrûtha ûgu. 20 Kwoogu ngaatûmîra inya yakwa neenkere antû ba Miisiri îkaanûkia na ndûthe mantû ma kûmakania ku. Nyuma yoogu akabûrekeeria bûthi. 21 Naani ngaatûma antû ba Miisiri ba bwaa gîtîîyo, kaingo bwatua kûthi bûtikaathi njara i ntheri. 22 Mwekûrû wonthe Mûisiraeri akaathi kîrî mwekûrû Mûmiisiri ûra batûûranîîre n'we na kinya aka bangî bara batûûraga nyomba cia atûûri nabo abarombe into bia thaabu, na bia fetha na nguo, bira bûgeekagîra aana beenu ba antû arûme na ba aarî. Na ûgu i bu bûgaataîra a Miisiri into biao.”