Gûciarwa na gûkûra kwa Musa
2
1 I kwarî na muntû ûmwe Mûrawi, na aagûra mwarî Mûrawi.a 2 Mwekûrû ûyu aagîa nda aaciara kaana ga kaîyî. Oona kaana gaku karî keega, kwoogu akaitha bantû a mîeri îthatû. 3 Îndî akwona atiûmba gûkara akaithîîte, agacwîra gakabû ga nkîndû akoorokeria ku na aakaanda gakabû gaku na rami na mûûra na akaiga nthanjeeni ira ciarî rûûyîîni rûteere rwa muuro wa Naero. 4 Mwaragina wa kaana gaku aarûngama gataaria akîenda kwona n'ata gûgaakarîka kîrî ko.5 Nyuma ya ûgu, mwarî wa Faraû aathi kûthamba muurooni ûyu, na aarî bara aathiiyanagia nabo ba ngûgî banjîîria gûkuria na muuro. Rîra mwarî ûyu wa mûnene oonire gakabû karî mathanjeeni, eera mwarî ûmwe mûruti ngûgî amûthûkîrie gakabû gaku amûretere. 6 Mwarî wa mûnene agûkunûra gakabû gaku eethîra i kaana ga kaîyî kaarî ndeeni. Kîrîro gîa kaana gaku i kîaringithiirie nkoro ya mwarî ûyu wa mûnene auga, “Nwa mwanka kaana gaka wîgue karî kamwe ga twana twa Kîibirania.”
7 Rîru mwaragina wa kaana gaku aathi kîrî mwarî ûyu wa Faraû amûûria, “Nwa nthi ngagûcereria mwekûrû ûmwe wa Kîibirania agakûmenyeera kaana gaka?” 8 Mwarî ûyu wa Faraû amûcookeria amwîra, “Yîî, rûtha ûgu!” Mwaragina ûyu wa Musa augia rwîro mûciî eeta gina. 9 Mwarî wa Faraû eera gina wa kaana, “Thûkia kaana gaka wînûke nako, ûkaamenyeere ko na ngakûrea.” Kwoogu mwekûrû ûyu aathûkia kaana gaake eenûka nako akamenyeera. 10 Nyumaani, kaana gagûkûra, gina akathûkia akaira kwa mwarî ûra wa Faraû, n'we akathûkia arî ta gina wako. Ageeta Musa,b n'ûntû augire, “Ndaakarutire rûûyîîni.”
Musa atoorokera Mindiani
11 Nyuma ya mîanka îmiingî mma, Musa agûkûra, auma agu aathi gûkeethia antû baao ba Isiraeri na oona bûra antû baao baanyamaaragua. Aacooka oona Mûmiisiri ûmwe agîtura Mûibirania wa antû ba ba Musa. 12 Akwangaangia meetho oona gûtirî muntû aamwene, aûraga Mûmiisiri ûyu na amuumbîka mûthangaani. 13 Rûûni kaîrî, Musa ariûngîrîte antû baao, oona Aibirania baîrî bakîrûa. Aûria ûra warî na mabîtia, “I kî n'ûntû ûkûringa muntû ûyû wenu ûgu?” 14 Muntû ûyu amûcookeria amûûria, “Nûkûthûgaania ûrî ûû? N'ûû agûtuîkithîîtie mûnene wetû na mûtûgiitîri magamba? N'ûkûthûgaania kûmbûraga ta bûra ûraûragire Mûmiisiri?” Musa akwîgua ûgu, aamaka mûno aamenya antû bonthe i baramenyire bûra ararûthire.
15 Faraû akwîgua bûra Musa aarûthire, aaruta watho Musa agwatwa na aûragwa. Musa n'we aatoorooka aathi bwa Mindiani.
Musa agûkinya Mindiani, aakara nthî rûteere rwa kîthima. 16 Na rî, i kwarî na mûthînjîri wa Ngai wa nthîgûrû ya Mindiani. N'aarî na aarî mûgwanja bara baayaga gûtaa rûûyî bagîîkagîra ara nyamû cia ndîîthia cia îthe cianyuunyagîra.c 17 Îndî arîîthi bamwe baayaga bakabeengatia. Ntugû înu Musa abateethia, aarigîîria arîîthi batikaabeengatie, na abateethia gûtaa rûûyî na aanyuithia nyamû ciao.
18 Aarî babu bagûcooka mûciî kwa îthe Reueri, abaûria, “N'ata îmunthî bwanyuithangia bwacooka nthûti ûgu?” 19 Bamûcookeria bamwîra, “Kûrî Mûmiisiri ûtûtuunyûkiirie kîrî arîîthi, na kinya atûtaîra rûûyî na atûnyuithîria mbûri na ng'ondu cietû.” 20 Îthe abaûria, “Mûmiisiri ûyu îîndî arîkû? Bûmûtigire naagu woogu? Îthiini bûmwîte aaye mûciî agaagûrwe!”
21 Musa n'akeneere kûthookua kwa Reueri na aakara ku. Nyumaani, Reueri amwaa mwarî wake Sipoora aatuîka mwekûrû wake. 22 Sipoora n'aagîîre na kaana ga kaîyî na Musa ageeta Ngerisomu.d Na Musa auga, “Ndî mûgeni nthîgûrû îno.”
23 Nyuma ya kagiita kaaraaya mma, mûnene wa Miisiri aakua. Na aana ba Isiraeri nabo beekayîra mûno n'ûntû bwa bûra baarî ûkombooni. Baarîra na kîrîro kîao gîakinyîra Ngai. 24 N'ûntû bwa wîrane bûra eere Îburaîmu, Isaka na Njakubu, Ngai eegua gûkaya kwao. 25 Aaraithîîria aana ba Isiraeri, abeegîîrua kîao.