KUUMA
Kûnyamaarua kwa rûrîîyo rwa Njakubu barî Miisiri
1
1 Mama i mo mariîtwa ma aana ba Njakubu bara aathiire nabo Miisiri. Wa muntû aathiiyaga na antû ba mûciî wake. 2 Nabo baarî: Rubeni, Simioni, Rawi, Njunda, 3 Isakaari, Seburuni na Benjameni, 4 Ndani na Nabutarî, Ngandi na Aseri. 5 Îndî wana mbere bathi, Njosebu ûra aarî ûmwe wao nwa aarî naagu Miisiri. Antû bonthe ba mûciî wa Njakubu baarî antû mîrongo mûgwanja.6 Na nyuma ya îgiita rîgana ûna Njosebu na aruagina bonthe baakua, na antû ba nthuke înu bonthe baathira. 7 Îndî aana ba Isiraeri baathagaya mûno, baagîa inya mûno nkûrûki na baûyûra gîteere gîetagwa Ngoseni.
8 I kwagîîre mûnene ûngî Miisiri ataiyî Njosebu. 9 N'we eera antû baake ata rî, “Antû baba ba Isiraeria i baingî mûno, na n'ûgwati kiri tiû. 10 Nwa mwanka tûcwe bwa kûrûtha antû baba, n'ûntû ndûa îkaaya gûûka, bagwatanîra na anthû beetû bakabagwatia kûrûa naati, na nyuma bagakuthûka bakauma nthîgûrû îno.”
11 Kwoogu, babaigîra arûngamîîri ba kûbarutithagia ngûgî, babanyamaaragie na babakamatithagie mîrigo îtakamatîka. Nabo baakîra Faraûb taûni cia kwaigaga irio, nacio cietagwa Pithomu na Ramesesi. 12 Îndî wa bûra baathiîte mbere na kûbainyîîria, nwabu aana ba Isiraeri baathiire mbere na kûthagaya baûyûra nthî. Nabo Amiisiri baakuthûka aana ba Isiraeri mûno. 13 Amiisiri baarutithia antû ba Isiraeri ngûgî na inya mûno batarî na kîao. 14 Antû ba Miisiri bateegagîîrua antû ba Isiraeri kîao nwa aniini baatûmire mûtûûrîre wao ûûma mûno. Baabakinyagîîria na taka kûûmba matubaarî, gûkoroga ntaga ya gwaka, na kûrîma mîndaani.
15 Rîru Faraû, mûnene wa Miisiri, aaria na Sibura na Pua, eekûrû bamwe ba bara baathûkagîria eekûrû ba Kîibirania twana bakîgîa natu, abarutîra watho abeera, 16 “Bûkîthûkîria eekûrû ba Kîibirania twana, gaaciarwa kaana ga kaîyî, bûkaûrage nthûti îmwe. Bûtige twana twa twarî akî.” 17 Îndî n'ûntû eekûrû babu i baatîîyaga Ngai, bataathîkîra mûnene wa Miisiri baûraga twana twa twîyî ta bûra beerîîtwe. 18 Mûnene wa Miisiri eeta eekûrû babu abaûria ata rî, “N'aata bûrûthîîte bwarega kûûraga twîyî bwatureka tûtûûra mwoyo?” 19 Eekûrû babu bamwîra, “Mûnene, eekûrû ba Kîibirania barî na inya ya mwîrî mûno, bagîîyaga na twana na mpwî, batikari ta eekûrû ba Miisiri. Mwana aumaga na mpwî mbere mûthûkia wa kaana akinyîra gina.”
20 Kwoogu Ngai aathaarima eekûrû babu athûkia ba twana, na antû ba Isiraeri baathi na mbere na kwingîa na baagîa inya nkûrûki. 21 Na n'ûntû eekûrû babu i baatîîyire Ngai, Ngai abathaarima baagîa na mîciî yao. 22 Faraû eera antû baake bonthe ata rî, “Kaana konthe ga kaîyî ga Kîibirania kara gagaaciarwa, kagereeni muurooni ûra gwîtawa Naero. Îndî bûrekane na twana twa twarî tûtûûre mwoyo.”