Kuuma 16

Ngai eeyana mana

1 Antû ba Isiraeri baanjîîria rûgendo baumîîte Erimu. Kîrîndî kîonthe kîa aana ba Isiraeri gîakinya rwanda rwa Sini. Sini îrî gatîgatî ka Erimu na kîrîma gîa Sinai. Baakinyire agu ntugû ya îkûmi na îtaano mweri wa îîrî, mweri ûmwe, kuuma bakuuma Miisiri. 2 Wagu rwanda, kaîrî noogo kîrîndî gîa antû ba Isiraeri kîanung'unîîre Musa na Arûni. 3 Baabeeraga ûûgû, “Kaaba ûkeegua Mwathani aatûûragire rîra twarî nthî ya Miisiri! Rîra twarî noogo i twarîyaga nyama na irio bionthe bira twendaga tûkabaa. Îndî îîndî bwatûreeta rwanda rûrû bûtûûraga na yûûra.” 4 Rîru Mwathani eera Musa ûûgû, “Raitha wone, nthiîte kûbuurithîria irio kuuma îgûrû. Antû bakaathiiyaga wa ntugû bakathûkia bira bakaûmba kûrîa ntugû înu yonka batagûtigaria. Nkabathima noogu mbone wegua bakaathingata mawatho maakwa kana arî. 5 Beere ntugû ya ithanthatû wa kiumia, i bathûkagie maita maîrî nkûrûki ya bûra barathûkagia agu mbereeni.” 6 Kwoogu Musa na Arûni beera antû ba Isiraeri bonthe ata rî, “Îmunthî ûgoro, i rîo bûkaamenya i Mwathani aabûrutire bwauma nthî ya Miisiri, 7 na rûkîîrî i rîo bûkoona ûkumio bwa Mwathani. Mwathani neegîîtue kûnung'una kwenu, kûra na mma n'we bûranung'unagîra na ti tiû bûranung'unagîra.” 8 Na kaîrî Musa abeera, “Mwathani akabweyaga nyama imbingî cia kûrîa ûgoro na mîgaate îmiingî rûkîîrî, n'ûntû neegîîtue kûnung'una kûra bûmûnung'unîrîte. Yîî i Mwathani bûranung'unagîra na ti tiû.”

9 Rîru Musa eera Arûni ata rî, “Îra kîrîndî gîa antû ba Isiraeri ûûgû, ‘Thengeeraani kîrî Mwathani, n'ûntû n'egîîtue manung'una meenu.’ ” 10 Gwakarîkire ûgu, îgiita rîra Arûni aaragîria kîrîndî kîonthe gîa antû ba Isiraeri, bakûraithîîria rwanda, boona ûkumio bwa Mwathani gatîgatî ga îtu. 11 Na Mwathani aaria na Musa amwîra, 12 “I mbîgîîtue kûnung'una gwa antû ba Isiraeri. Îîndî beere ûûgû, ‘Ûgoro bûkaarîa nyama, na rûkîîrî bûkaarîa mîgaate bûbae. Rîru i rîo bûkaamenya i niû Mwathani Ngai wenu.’ ”

13 Na ûgoro bûbu tuumbuthûki twaya tûbuurûkîîte twagwîrîîra twaûyûra kambî teke. Rûûni rûkîîrî kwagîa maame kûthiûrûkîîra agu bambîîte marema. 14 Maame makûthira, wacooka nthîgûrû yakunîkwa i twinto tûniini tûûyerû ce ta îra tûkari ta maame mamatîîtue i mpîo. 15 Aana ba Isiraeri bakwona ûgu, baarigara banjîîria kûûrania “I mbi îno?” N'ûntû bataamenyaga i mbi yoo. Na Musa abeera, “N'irio bira Mwathani abwaa bûrîa. 16 Mwathani ariuga wa mûciî nwîthîranie irio kûringana na ûbatu bwao bûra bûgana. Ta irio biganîîrîîte antû bara ûrî nabo waku. Wa muntû rita ciîrî.” 17 Antû ba Isiraeri baarûtha wa ta bûra beerîîtwe. Kûrî baataire biingî, na bangî nabo baataa biikai. 18 Bakûbithima, ûra eethîraniirie biingî tika eegua arî na biingî nkûrûki. Na ûra eethîraniirie biikai tika aaga. Wa muntû aathûkagia biganîîrîîte antû baake. 19 Musa aacooka abeera, “Bûtigaatigarie nwa mbi bûraaria.” 20 Îndî bamwe baao twaka baathûkia bûbu bûrî na gîtûmi. Kûrî bo baaraariirie biao mwanka rûkîîrî. Gûgûkîa rûûni bakîraitha, nwa maginyo moonyonyaga ku na bikînunkaga mûno. Na Musa aathûûra mûno i bo. 21 Antû baaraûkaga kwîthîrania irio wa rûkîîrî, na wa muntû aathûkagia kîthimi kîganîîrîîte antû baake, irio bira biatigaraga bitarî bithûkie, riûa rîara i biararûkaga.

22 Ntugû ya ithanthatû îgûkinya beethîrania maita maîrî ma irio bibu wa muntû rita inya bantû a ciîrî. Na atongoria baao baathi beera Musa mantû mamu. 23 Musa n'we aacooka abeera, “Mwathani auga ûûgû; ‘Rûû gûkeegua kûrî ntugû ya kûnogoka, Sabatû întheru ya kûririkana Mwathani. Kwoogu rugaani bira bûkwenda na bia kûgana îmunthî. Bira bigaatigara bûbiaige mwanka rûû rûkîîrî.’ ” 24 Kwoogu bira biatigarire babiaiga mwanka rûûni rûkîîrî, wa ta bûra Musa aabeerîîte. Na irio bibu bitaagea maginyo kana binuunka. 25 Musa abeera, “Îrîani irio bibi îmunthî, n'ûntû îmunthî i ntugû ya Sabatû ya kûririkana Mwathani. Gûtirî irio bûkoona bia kwîthîrania. 26 Îthîraniani irio ntugû ithanthatû, îndî ntugû ya mûgwanja i Sabatû. Gûtirî irio bûkoona bia kwîthîrania ntugû înu.”

27 Amwe na kwîrwa ûgu, kûrî bo baumagarûkire baathi kwîthîrania irio ntugû wenu ya Sabatû. Îndî batoona nwa mbi. 28 Mwathani aûria Musa, “I mwanka rî antû baba bagaakara batakwathîkîra mawatho maakwa kana beegua bûra nkûbeera? 29 I ka batakûmenya ndaabeere ntugû ya mûgwanja îrî Sabatû, ntugû ya kûnogoka? Gîku i kîo gîtûmi ntugû ya ithanthatû mbweyaga irio maita maîrî nkûrûki ya bûra bweyawa ntugû ira iingî, kaingo bwîgua bûrî na irio bia ntugû ciîrî gûtarî thîîna. Ntugû ya Sabatû bûtibatîîrue buuma kambîîni yenu. Bûtikaumagare maremaani meenu ntugû înu.” 30 Kwoogu antû baanogoka ntugû ya mûgwanja.

31 Antû ba Isiraeri beetire irio bibu “mana.” Biarî biiyerû ta mpîndî cia mûtî wetagwa korianda biacamaga ta tûkeki tûruganîrîtue na ûkî bwa njûkî. 32 Musa abeera, “Mwathani eeyanîte watho bûkuuga ûûgû, ‘Thûkiani rita ciîrî cia irio bibu biîtagwa mana, bwaigîre yoo nciarwa ira ikaaya, kaingo bakoona irio bira ndaabwere bûrîa rîra bwarî rwanda rîra ndaabûrutire bwauma nthî ya Miisiri.’ ” 33 Kwoogu Musa eera Arûni ata rî, “Thûkia kaûngû wîkîre rita ciîrî cia mana ku. Rîru ûcooke waige kaûngû gaku mbere ya Mwathani n'ûntû bwa kûririkania nciarwa cionthe ira ikaaya.” 34 Na wa ta bûra Mwathani eerire Musa kûrûthwe, ûgu nwa ta bu Arûni aigire mana înu mbere ya îthandûkû rîa maathana, kaingo yaigwa. 35 Antû ba Isiraeri baarîîre manna înu mîanka mîrongo înna, mwanka rîra baakinyire nthîgûrû îra yatwîre antû, na baamîrîîre mwanka baakinya mwankaani wa Kanaani. 36 Omeri îmwe i gacuncî kamwe ga îkûmi ga efa.