Rûûyî kuuma rwaraani rwa iiga
17
1 Kîrîndî kîonthe kîa aana ba Isiraeri kîanjîîria rûgendo kuuma rwanda rwetagwa Sini, kuuma bantû amwe kûthi ara angî, wa ta bûra Mwathani aabaathaga. Baambire marema maao bantû eetagwa Refindimu, îndî gûtaarî na rûûyî rwa kûnyua noogo. 2 N'ûntû bwoogu baathetia Musa bakîmwîraga, “Tûnenkere rûûyî rwa kûnyua.” Musa abacookeria abaûria, “I mbi bûkûntheteria? I mbi n'ûntû bûkûgeria Mwathani?” 3 Îndî amwe na ûgu, i baathiire na mbere kûnung'unîra Musa n'ûntû bwa kûnyamaara i bûûta. Baamûûragia, “I mbi yatûmire ûtûruta nthî ya Miisiri? I mbi yatûmire ûtûreeta naaga? Tiû, aana beetû amwe na nyamû cietû cia ndîîthia twinthe tûkaathira i bûûta!”4 Rîru Musa n'we aakayîra Mwathani amûûria, “N'ata nkûrûthana na antû baba? Becû baambûraga na maiga!” 5 Mwathani aacookeria Musa amwîra, “Tongoreeria antû na ûthûkie akûrû bamwe ba Isiraeri, bûthi nabo. Na ûcooke ûkamate mûraagi ûra wacûniirie nau rûûyî rwa Naero. 6 Naani nkaarûngama mbere yaku rwaraani rûru rwa iiga naagu Orebu. Rîru naawe ûringe rwara rûru na mûraagi ûra, na rûûyî rûkauma ku antû banyue.” Na Musa aarûthire ûgu atongoria ba Isiraeri bakîonaga, na rûûyî rwauma iigaani rûru. 7 Na eetire bantû agu Masaa na kaîrî Meribab n'ûntû antû ba Isiraeri i baanung'unire na n'ûntû i baageriirie Mwathani rîra baugire, “Mwathani arî naati kana atirî naati?”
Gûturwa kwa Aamareki
8 Rîra antû ba Isiraeri baarî Refindimu, Aamareki baayire babaithûkîra. 9 Musa eera Njosua, “Thuura ncamba imwe cietû ithi ikarûe na Aamareki. Rûû nkaarûngama kîrîmaani kûra îgûrû ngwete mûraagi wa Ngai na njara ciakwa.” 10 Kwoogu Njosua aarûa na Aamareki wa ta bûra Musa aamwîrîîte; Musa n'we barî na Arûni, na Uri beetia kîrîmaani kûra îgûrû. 11 Mantû maakarire ta ûûgû, Musa aûkîîria njara îgûrû Aisiraeri bagacinda, eendamia njara, Aamareki bagacinda. 12 Musa akûnoga njara, baathûkia iiga bamûnenkera arîkarîra. Arûni na Uri baagwata Musa njara ciake baakara baciûkîîrîîtie, ûmwe amûûkîîrîîtie njara ya ûrîo na ûra ûngî njara ya kîmotho, njara ciakara ciûkîîrîtue mwanka riûa rîathûa. 13 Kwoogu Njosua aatura njûûrî ya ndûa ya Aamareki.
14 Rîru Mwathani n'we eera Musa ata rî, “Andîka mantû mama îbukuuni kaingo matûûra makîririkanagwa, na ûmaarie Njosua akîîgagua, n'ûntû nkaathiria Aamareki bathire buru, mwanka batige kûririkanagwa nthîgûrû yonthe mwanka gûtarî rîo.”