Rûûyî kuuma rwaraani rwa iiga
20
1 Mweriini wa mbere wa mwankaa antû bonthe ba Isiraeri baakinya rwanda rwa Sini na kwamba marema bantû eetagwa Kandesi. Agu noogo Miriamu aakuîrîîre na aathikwa.2 Gûtaarî na rûûyî noogo, kwoogu kîrîndî kîonthe kîathi kîrî Musa na Arûni. 3 Babathetia bakiugaga, “Wana kaaba ûkeegua ga twakuuyanîîrie na antû beetû ba Isiraeri bara bakuîrîîre mbere ya Mwathani. 4 I kî n'ûntû ûtûreeteete naaga rwanda? Kaingo ma tûkuîra aaga na nyamû cietû cia ndîîthia? 5 I mbi yatûmire ûtûruta nthî ya Miisiri ûtûreeta gûntû gûkû kûthûûku ûûgû gûtakûraga nwa mbi? Naaga gûtirî irio, kana mîkûyû, kana mîcabiibû kana mîkûkûmanga. Na gûtirî nwa rûûyî rwa kûnyua!”
6 Musa na Arûni baataarataarîria antû. Baarûngama mwîrîgaani wa Îrema rîa kûrîîkanaga. Baatiirithia moothiû maao nthîgûrû. Nabu werû bwa Mwathani bwabaumîîra. 7 Mwathani aaria na Musa amwîra, 8 “Thûkia mûraagi ûra ûrî mbere ya îthandûkû rîa maathana ma kîrîîkanîro, woû na Arûni wîthîranie antû bonthe. Agu mbere yao bonthe warîrie iiga rîîra rîrî aara na rûûyî rûkauma kûrî rîo. Ûgu i bu ûkaaruta rûûyî kuuma iigaani n'ûntû bwa antû, kaingo bo na nyamû ciao banyua.”
9 Musa aathi aathûkia mûraagi ûyu wa ta bûra Mwathani aamwathîîte. 10 Musa na Arûni beethîrania antû bonthe mbere ya iiga rîra. Musa auga, “Thikîîriani, ndemi ino, nwa mwanka tûbûrutîre rûûyî kuuma iigaani rîrî?” 11 Rîru Musa aûkîîria mûraagi aaringa iiga rîru maita maîrî. Rûûyî rwingî rwauma iigaani rîru. Antû bonthe na nyamû cianyua.
12 Îndî Mwathani aathetia Musa na Arûni abeera ata rî, “N'ûntû i bwagire wîtîgio bûûganu bwa kwonania inya yakwa întheru mbere ya antû ba Isiraeri, naabi bûtibatongoreeria mwanka bakinya nthîgûrû îra ndaugire nkabaa.”
13 Mantû mama maakarîkîîre bantû eetagwa Meriba,b ara antû ba Isiraeri banung'unîîre Mwathani n'we aboonia atî we n'ûmûtheru.c
Mûnene wa Endomu aaperia antû ba Isiraeri njîra
14 Musa aatûma atûmwa kuuma Kandesi kîrî mûnene wa Endomu akîîraga mûnene wa Endomu ata rî:
“Ntûmwa îno yuumîîte kîrî aruanyûkwe Isiraeri: I bwiyî mathîîna mara twoneete na bûra tûnyamaarîîte. 15 I bwiyî bûra biûyûyû bietû biathiiyangire Miisiri naara baatûûrire mîanka îmiingî. Antû ba Miisiri i bainyîîrie biûyûyû bietû wana tiû beene, 16 mwanka twarîrîra Mwathani atûteethia. N'eegiirue kîrîro gîetû na aatûma mûraîka ûra aatûtongoriirie kuuma Miisiri. Îîndî ûgu tûrî Kandesi taûni îra îrî mwankaani wa nthîgûrû yenu. 17 Itû twîtîgîîrieni tûkûrûkîîre nthîgûrû yenu. Tiû na nyamû cietû tûtiathûkîra tuuma barabaraani kana tûthûngîra ithakaani kana mîndaani yenu ya mîcabiibû, kana tûnyua rûûyî ithimaani bienu. Tûkaathi na barabara tûtakwathûkîra mwanka tuumagarûke nthî yenu.”
18 Îndî mûnene wa Endomu abacookeria:
“Nkûrega! Tûtibwîtîgîîria bûkûrûkîîra nthîgûrû yetû! Bûkagerekeeria gûkinya ku, itûkaabwithûkîra.”
19 Antû ba Isiraeri babeera:
“Tûkaathi na barabara tûtakwathûkîra, na tiû kana nyamû cia ndîîthia cietû ikaaya kûnyua rûûyî rwenu, tûkabûrea ru. Kîra tiû tûkwenda nwa gûkûrûka akî.”
20 Îndî mûnene wa Endomu abacookeria auga:
“Tûkûrega!”
Na baumagarûka njûûrî ya ndûa îînene na îrî inya na baathi kûrigîîria antû ba Isiraeri batikaathûngîre. 21 Na n'ûntû Endomu n'yaregire antû ba Isiraeri bakûrûkîîra nthîgûrû yao, antû ba Isiraeri baathi njîra îîngî.
Gîkuû kîa Arûni
22 Antû bonthe ba Isiraeri bakuuma Kandesi baathi mwanka baakinya kîrîmaani kîa Ori, 23 kîra kîrî mwankaani wa Endomu. Mwathani aaria na Musa na Arûni, 24 “Arûni atiithûngîra nthîgûrû îra ndaugire nkaanenkera antû ba Isiraeri. Agaakua n'ûntû biû bûrî baîrî i bwaregire kwathîkîra bûra ndaabwathire bûrî Meriba. 25 Woû Musa, îthiini na Arûni na nthaka yake Eriasari bûtwe kîrîmaani kîa Ori. 26 Ûrute Arûni nguo ciake cia ûthînjîri gwîkîre Eriasari cio. Arûni agaakuîra agu kîrîmaani.”
27 Musa aarûtha wa ta bûra Mwathani aamwîrîîte: Baatwa kîrîma kîa Ori bakîonagwa n'antû bonthe ba Isiraeri. 28 Musa aaruta Arûni nguo ciake cia ûthînjîri eekîra Eriasari nthaka ya Arûni cio. Arûni aakuîra naagu kîrîmaani îgûrû. Musa na Eriasari baagûrûka. 29 Rîra antû bonthe baamenyire Arûni n'ûmûkuû antû bonthe ba Isiraeri bamûrîrîra bantû a ntugû mîrongo îthatû.