Rûûyî Rwa Kûtherania
19
1 Mwathani aaria na Musa na Arûni abeera; 2 baneenkere antû ba Isiraeri mawatho mama, Antû babu ba Isiraeri bairîre Musa na Arûni moori întuune îtarî na nwa koothûûku na îtaaro yoogeerwa îcoki. 3 Bamînenkanîre kîrî Mûthînjîri wa Ngai Eriasari; Moori înu yuumagarue ome ya kambî na muntû ûngî amîûrage Eriasari araithîrîîte. 4 Rîru Eriasari atombeke kîara nthakameeni yaayo amincamiince nthakame înu eerekereetie mbarî ya Îrema maita mûgwanja. 5 Moori înu îbîîthue; ndwara, nyama, nthakame na into bia nda; îbîîthue Mûthînjîri araithîîte. 6 Rîru athûkie kîmûtî kîa mûthithinda, kamûtî ka mûtî wîtagwa ucopo na ndigi intuune kîrûkûthî agere bionthe mwankiini ûyu. 7 Nyuma ya ûgu, abûûre nguo ciake na athaambe na rûûyî. Rîru nwa athûûngîre ndeeni ya kambî, îndî akeegua arî na mûgiro mwanka ûgoro bwa ntugû înu. 8 Wana muntû ûra arîrîkîîre ng'ombe înu na mwanki nwa mwanka abûûre nguo ciake na athaambe na rûûyî, îndî wan'we akeegua arî na mûgiro mwanka ûgoro bwa ntugû înu. 9 Rîru muntû atarî na mûgiro agaakûra muu ûyu athi acugaige bantû atarî mûgiro ome ya kambî. Agu noogo antû ba Isiraeri bakaurûmaga bakauruga rûûyî rwa kûtheragia naru meeyia. 10 Muntû ûra agaakûra muu abatîîrue abûûra nguo ciake îndî akeegua arî na mûgiro mwanka ûgoro bwa ntugû înu. Watho bûbu i bwa kûthingatawa tene na tene, n'Aisiraeri na antû bara batwîre gatîgatî kaao.11 Ûra agaatongithia kiimba akeegua arî na mûgiro ntugû mûgwanja. 12 Nwa mwanka eetherie na rûûyî rûra rwa kûtherania ntugû ya ithatû na ya mûgwanja na rîru akaathera. Îndî akarega kwîtheria ntugû ya ithatû na ya mûgwanja irî ciîrî atiithera. 13 Muntû ûra agaatongithia ntungu ya muntû na arege kwîtheria agaakara arî na mûgiro n'ûntû atimiincîrîtue rûûyî rwa kwîtheria. Muntû ta ûyu n'eekagîra Îrema rîa kûrîîkanaga mûgiro na n'akeengatua aume antûûni ba Isiraeri.a
14 Muntû akaaya gûkuîra îremaani, antû bonthe bara beegagua barî îremaani rîru agîkua bakeegua barî na mûgiro ntugû mûgwanja, 15 ithiri bionthe na nyûngû cionthe ira irî ku, itarî nkunîke nacio ikaagîa mûgiro.
16 Muntû akaaya gûtongithia muntû arî mûûrage kana akuîte gîkuû gîa kîîwîthîre, kana agatongithia mwîndî wa muntû kana nthiko, muntû ûyu akeegua arî na mûgiro ntugû mûgwanja.
17 N'ûntû bwa kûruta mûgiro, muntû akaarûma muu wa ng'ombe îra ntuune yaabîîthiirue n'ûntû bwa kûthiria meeyia eekîre nyûngûûni acooke eekire rûûyî rûûtheru. 18 Rîru muntû ûra atarî na mûgiro akaathûkia kamûtî ga ucopo agatoombeke rûûyîîni rûru, amincamincîrie îrema na into bira birî ku na antû bara baarî ku. Na amiincîrie muntû wonthe ûra aatongithiirie mwîndî wa muntû, nthiko, kana muntû ûmûûrage kana akuîte wengwa. 19 Muntû ûra atarî na mûgiro abatîîrue amincîria muntû ûyu arî na mûgiro rûûyî rûrû ntugû ya ithatû na ya mûgwanja amûtherie. Muntû ûra akûtherua abatîîrue abûûra nguo na athamba na rûûyî, na akeegua arî na mûgiro mwanka ûgoro bwa ntugû înu. 20 Muntû ûra akaagwatwa i mûgiro îndî arege kwîtheria agaakara arî na mûgiro n'ûntû atiramincîrua rûûyî rwa kûtherania. Wee n'eekagîra Îrema rîa Mwathani rûko na akeengatua aume gatîgatî ga antû ba Ngai. 21 Bûkaathingataga watho bûbu rîonthe.
Muntû ûra akaamincanîria rûûyî rwa kûtherania nwa mwanka abûûre nguo ciake. Muntû woora agaatongithua i rûûyî rûru akeegua arî na mûgiro mwanka ûgoro bwa ntugû înu. 22 Gîntû kîonthe muntû arî na mûgiro agaatongithia gîkaagwatwa i mûgiro. Na muntû wonthe ûra agaatongithia gîntû gîku akeegua arî na mûgiro mwanka ûgoro bwa ntugû înu.