Ngûgî cia athînjîri ba Ngai na Arawi
18
1 Mwathani eera Arûni ata rî, “Woû, nthaka ciaku, na Arawi i biû bûkaagambithua n'ûntû bwa mabîtia monthe meegiî kûruta ngûgî Îremaani rîa Kûrîîkanaga. Îndî i woû na nthaka ciaku akî bûkaagambithîrua mabîtia meegiî kûruta ngûgî ya ûthînjîri bwa Ngai. 2 Reete antû ba mûciî waku, ba mwîrîga wa Rawi babûteethagie rîra woû na nthaka ciaku bûkûruta ngûgî ira cia ûthînjîri mbere ya Îrema ria Kûrîîkanaga. 3 I babatîîrue baruta ngûgî ira bûkaabanenkagîra na ira bagaîrîîtwe îremaani îndî batibatîîrue batongithia into bira bitheru bira birî Bantû ara Atheru kana batongithia kîthînjîro. Bakarûtha ûgu bakaanîîtue kûrûtha, bo, na biû beene i bûgaakua. 4 Babatîîrue baruta ngûgî naawe na baruta ngûgî yao îra bagaîrîîtwe Îremaani îndî antû bara batarî beetîgîîrie batibatîîrue baruta ngûgî na biû. 5 Nwa woû na nthaka ciaku bwinka bûbatîîrue kûruta ngûgî kîthînjîrooni na Bantû ara Atheru giria mûthûûro wakwa ûgaatûûmûkîra antû ba Isiraeri kaîrî. 6 I niû ningwa nthuurîîte antû baba beenu ba mwîrîga wa Arawi kuuma kîrî antû ba Isiraeri barî kîewa kîa mwanya kîrî biû. Mbathûrîrîîtwe bo kaingo barutaga ngûgî ira babatîîrue baruta Îremaani rîa Kûrîîkanaga. 7 Îndî woû na nthaka ciaku bwinka i biû bûkaarutaga ngûgî cia ûthînjîri ciîgiî kîthînjîro na into bira birî Bantû ara Atheru mûno. Inu i cio ngûgî cienu n'ûntû imbûneenkereete kîewa kîa ûthînjîri. Na muntû ûngî ûra agaakinya akubî na into bira bitheru i ka akaûragwa.”Rûgai rwa athînjîri ba Ngai
8 Mwathani eera Arûni, “Ngûkûnenkera biewa bionthe bia mwanya bira ndutagîrwa n'antû ba Isiraeri tatiga igongwana bira bibîîthagua. Ingûkûnenkera bio woû na nthaka ciaku rûrî rûgai rwenu tene na tene. 9 Tatiga biewa bira bibîîthagua, bibu biingî bitheru i bienu. Na bio i bio bibi: biewa bia irio, igongwana n'ûntû bwa wîyia na kîgongwana n'ûntû bwa îbîtia. Gîntû kîonthe kîra ndutîrîîtwe kîrî kîewa kîîtheru, i gîaku na nthaka ciaku. 10 Bûbatîîrue kûrîîra biewa bibi bantû atheru. Na nwa aana ba antû arûme baaku baûmba kûbirîa. Ûbatîîrue kûbithûkia i biitheru.
11 “Wana bibi nabio i biaku: Maruta ma mwanya mara Aisiraeri bakaandutîra magaatuîka maaku. Inkûmanenkanîra kîrî woû na nthaka na aarî baaku kagiita konthe. Antû bonthe bara batarî na mûgiro ba mûciî waku nwa barîe maruta mama.
12 “Ingûkûnenkera into bira bithongi bia maciaro ma mbere bira Aisiraeri baandutagîra woora mwanka. Na bio i ta, maguta ma mîceituuni, ndibei na irio. 13 Ncabiibû na nkûyû i ciaku. Na antû bonthe ba mûciî waku bara batarî na mûgiro nwa babirîe. 14 Gîntû kîonthe ndeeni ya Isiraeri kîra kînenkanîrîîtwe kîrî Mwathani i kîenu. 15 Itûra îria bionthe bia aana kana bia nyamû bira antû ba Isiraeri bakaandutagîra i bienu. Îndî nwa mwanka bwîtîgagîîrie antû gûkûûra itûra îria bia aana na gûkûûra itûra îria bia nyamû ira irî mûgiro. 16 Aana babatîîrue bakûûrwa barî ba ûkûrû bwa mweri ûmwe na îrîi rîa fetha sekeri itaano.a
17 “Îndî itûra îria bia ng'ombe, ng'ondu na mbûri bitikûûrîka. Nyamû ta inu, i ciakwa kûrû na ibatîîrue irutwa kîgongwana. Ûmincîrie kîthînjîro nthakame yacio na ûbîîthie maguta ma cio kîrî kîewa kîa irio kîrî na mûcinko ûgûnkenia. 18 Nyama cia cio, wa ta i bara na magûrû ma nyuma ma ûrîo cia kîgongwana gîa gûûkîîrua i cienu. 19 Maruta ma mwanya mara antû ba Isiraeri baandutagîra nkûmanenkanîra kîrî woû na nthaka ciaku, na aarî baaku tene na tene. Gîkî i kîrîîkanîro kîa mwonyob gîa gûtûûra ndaarûtha na woû na nciarwa ciaku.”
20 Mwathani eera Arûni, “Woû ûtiigaîrwa nthîgûrû nwa îrîkû ya Isiraeri. Niû Mwathani, I niû rûgai rwaku.”
21 Mwathani auga, “Nkûnenkera Arawi tûcuncî tunthe twa îkûmi tûra antû ba Isiraeri bandutagîra. Rîrî i rîo îrîi rîao n'ûntû bwa kûruta ngûgî îremaani rîa kûrîîkanaga 22 Antû babu bangî ba Isiraeri batibatîîrue bakinya kana batheengeera îrema baaya gûkua n'ûntû bwa kûrûtha ûgu. 23 Kuuma îîndî kûthi na mbere Arawi i bo bakaamenyagîîra Îrema rîa Kûrîîkanaga na gûkagîa na mabîtia ngûgî înu i bo bakaûrua. Bûbû i watho bwa tene na tene. Arawi batibatîîrue bagaîrwa into bia gûtûûra nthîgûrû ya Isiraeri, 24 n'ûntû imbaneenkereete maruta ma mwanya na icuncî bia îkûmi bionthe bira Aisiraeri baanenkagîra biatuîka rûgai rwao. Gîku i kîo gîtûmi ndaabeerire: bo batiîgua barî na ûtonga bwa into bia gûtûûra Isiraeri.”
Icuncî bia îkûmi bîra birutagwa n'arawi
25 Mwathani aaria na Musa amwîra, 26 eere Arawi ata rî: “Rîra bwagwata icuncî bia îkûmi bia antû ba Isiraeri bira Mwathani abûneenkereete biatuîka bienu, ibûbatîîrue kûruta gîcuncî gîa îkûmi kîrî kîewa kîrî Mwathani. 27 Mwathani agaatara maruta mama ta bûra ataraga maruta ma maciaro ma mbere mara mûrîmi arutaga ma irio kana ndibei. 28 Ûûgû i bu bûkaarutaga maruta kîrî Mwathani kuuma kîrî tûcuncî twa îkûmi tûra bûkaagwataga kuuma kîrî antû ba Isiraeri. Nenkagîraani Mûthînjîri wa Ngai Arûni maruta mama ma mwanya ma Mwathani. 29 Bûrutage gîcuncî gîku kîrî Mwathani, kuuma kîrî into bira bithongi mûno bûnenkeretwe.
30 “Bwarîîkia kûruta bira bithongi mûno, tigagwani na bibu biingî wa ta bûra mûrîmi atigagwa na into bibu biingî aarîîkia kûruta kîewa gîake. 31 Biû na mîciî yenu nwa bûrîîre into bibu bigûtigara bantû onthe ara bûkeenda, n'ûntû rîru n'îrîi rîenu n'ûntû bwa ngûgî îra bûrutaga Îremaani rîa Kûrîîkanaga. 32 Kûrîa into bibu ti mabîtia, bunka woû bwambire kûrutîra Mwathani kîra kîthongi. Îndî bûtikaaye gwaka biewa bia Isiraeri biitheru rûko bûthiîte kûbirîa mbere bwamba kûrutîra Mwathani bira bithongi. Wona bwarûtha ûgu i bûkaûragwa.”