Mûraagi wa Arûni
17
1 Mwathani aaria na Musa amwîra, 2 “Îra antû ba Isiraeri bakûreetere mîraagi îkûmi na îîrî, mûraagi ûmwe kuuma kîrî woora mûtongoria wa mwîrîga. Waandîke riîtwa rîa muntû mûraagiini wake. 3 Na mûraagî wa mwîrîga wa Rawi waandîke riîtwa rîa Arûni. Woora mûtongoria wa mwîrîga wa Isiraeri akeegua arî na mûraagi. 4 Wire mîraagi înu Îremaani rîa Kûrîîkanaga ûmîaige mbere ya îthandûkû rîa maathana ma kîrîîkanîro, na noogo nkaarîîkana naawe. 5 Rîru mûraagi wa muntû ûra nthuurîîte ûkaaririma. Na ûgu i bu nkaathiria îtheto na nkarari ino itarî mûthia cia antû ba Isiraeri.”6 Kwoogu Musa aaria na antû ba Isiraeri, na woora mûtongoria amûneenkera mûraagi. Yaarî mîraagi îkûmi na îîrî, woora mwîrîga warî na mûraagi ûmwe. Na mûraagi wa Arûni wagaigwa amwe na înu îîngî. 7 Rîru Musa aiga mîraagi yonthe îremaani, mbere ya îthandûkû rîa maathana ma kîrîîkanîro.
8 Rîra Musa aathûûngîîre îremaani rûûni oona mûraagi wa Arûni ûra aarî kaanyaani ka mûciî wa Arawi n'ûraririmire, waraa na waciara matunda meeru meetagwa Marosi. 9 Musa aathûkia mîraagi înu yonthe kuuma îremaani oonia antû ba Isiraeri. Boona bûra gwakarîkîîte, na woora mûtongoria aathûkia mûraagi wake. 10 Mwathani aaria na Musa amwîra, “Cookia mûraagi wa Arûni ûkare agu mbere ya îthandûkû rîa maathana ma kîrîîkanîro, gîkî gîkeegua kîrî kîoneeria kîrî antû bara akararia gatîgatî ga antû ba Isiraeri, bamenyage i bagaakua baarega gûtiga kûringaga gîtuma.” 11 Musa aarûtha wa ta bûra Mwathani aathanîîte.