Kora, Ndathani na Abiramu baûmia kîongo
16
1 Nyumaani Kora mwana wa Isaarî, mwana wa Koathi, mwana wa Rawi, baabînda njûri na antû ba riiko rîa Rubeni: Ndathani na Abiramu, aana ba Eriabu, na Oni, mwana wa Perethi, 2 nabo baagwatanîra na atongoria ba Isiraeri ba gîtîîyo magana maîrî ma mîrongo îtaano bara baathuurîîtwe n'antû bonthe, baûkîîra Musa. 3 Beethîrana mbere ya Musa na Arûni, babeera, “Biû bûgûkûrûkia nceno! Kîrîîndî kîonthe i kîîtheru na woora muntû kîrîndîîni gîkî n'ûmûtheru, na Mwathani arî amwe naati twinthe. I kî îîndî biû n'ûntû bûkwîîrûtha anene ba kîrîîndî kîa Mwathani?”4 Musa akwîgua ûgu, eegwîthia nthî atiirithîîtie ûthiû bwake nthîgûrû. 5 Rîru eera Kora na athingati baake, “Rûû rûkîîrî, Mwathani akoonania n'ûû wake na n'ûû mûtheru, n'we ûra akaathuura, akamwîtîgîîria kûthengeera kîthînjîrooni. 6 Kwoogu, rûthaani ûgu, woû amwe na athingati baaku, bûkathûkia tûbakûri twa kûbîîthîria macoco, 7 na rûû bwîkîre makara ma mwanki ndeeni yaatu rîru bwîkîre macoco îgûrû rîatu, rîru bûbiire mbere ya Mwathani. Rîru tûkoona n'ûû athuurîîtwe i Mwathani. Biû Arawi bûkûthi mûno!”
8 Musa aathi na mbere kwîra Kora, “Thikîîriani, biû Arawi! 9 Îîndî, kabûkwona ta ûntû bûniini kwenu atî Ngai wa Isiraeri nabûthuurîîte biû kuuma mîgongo yonthe ya Isiraeri, kaingo bûûmba kûthi akubî, bûmûrutîre ngûgî ndeeni ya îrema rîa Mwathani na kûrûngama na gûtûmîkîra antû bonthe? 10 Nabûnenkerete gîtîîyo gîa kwîgua bûrî akubî n'we, biû amwe na Arawi bonthe. Îîndî ka bûkwenda kûthûkia kinya ûthînjîri? 11 Kwoogu woû na gîkundi gîaku i bûregete Mwathani. Biû bûrînung'unîra Arûni, îndî ûmma n'atî bûrînung'una îgûrû rîa Ngai.”
12 Musa atûmire ntûmwa kîrî Ndathani na Abiramu aana ba Eriabu kaingo beetwa, îndî bo bauga, “Tûtiiya! 13 ka bûrî ûntû bûniini gûtûruta Miisiri, nthîgûrû yûûyûrîîte îria na ûkî, kaingo ûûya gûtûûragîra rwanda rûrû? Kaîrî, ûrîîrûtha mûnene wetû! 14 Nkûrûki ya ûgu, ûtatûreeta nthîgûrû yûûyûrîîte îria na ûkî, kana gûtûneenkera rûgai rwa mînda na mîcabiibû. Ûrîona ta ûkaarûtha antû baba batuîke ntûngi? Tûtiiya!”
15 Musa aathûûra mûno, eera Mwathani “Ûtigeetîgîîrie biewa bia antû baba. Niû ntirathûkia îng'ooi rîa muntû nwa ûrîkû, kana nthûûkia muntû!”
16 Musa eera Kora, “Rûû ûtikaabîtie kûûya amwe na athingati baaku mbere ya Mwathani. Arûni wana we akeegua arîo. 17 Woora ûmwe wacienu athûkie kabakûri gaake, na gwîkîra macoco, rîru aire mbere ya Mwathani; bionthe birî amwe bikeegua birî into bia kûbîîthua magana maîrî ma mîrongo îtaano; woû na Arûni, woora ûmwe akeegua arî na kabakûri gaake.”
18 Kwoogu, woora ûmwe wabo aathûkia kabakûri gaake, eekîra makara ma mwanki na macoco, rîru baathi baarûngama mwîrîgaani wa Îrema rîa Kûrîîkanaga, amwe na Musa na Arûni. 19 Rîru Kora eethîrania antû bonthe amwe, baarûngama mbere ya Musa na Arûni bara baarî mwîrîgaani wa Îrema rîa Kûrîîkanaga. Na ûkumio bwa Mwathani bwaumîîra kîrîîndî kîonthe! 20 Rîru Mwathani aaria na Musa amwîra na Arûni, 21 “Îîbathûraneeni na kîrîndî gîkî, mbathirie wa îîndî ûgu.”
22 Îndî Musa na Arûni beegwîthia batirithîîtie moothiû maao nthîgûrû na kuuga, “Woû Mwathani kaumo ka mwoyo wa antû bonthe. Îîndî, muntû ûmwe akeeyia, ûthûûragîra kîrîîndî kîonthe?” 23 Mwathani aaria na Musa amwîra, 24 “Îra antû baume akubî na gîkaro kîa îrema rîa Kora, Ndathani na Abiramu.”
25 Kwoogu, Musa aûkîîra aathi kwa Ndathani na Abiramu, na aathiingatwa n'akûrû ba Isiraeri. 26 Agûkinya, eera antû, “Itû umaani maremaani ma antû baba baathûûku na bûtigatongithie gîntû nwa kîrîkû kîao, bûûya gûkondoranîrua amwe nabo n'ûntû bwa meeyia maao monthe.” 27 Kwoogu antû bauma gîkaro gîa Kora, Ndathani na Abiramu.
Ndaathani na Abiramu bauma maremaani maao na kûrûngama agu mwîrîgaani wa marema maao, barî na eekûrû baao na aana baao bonthe kinya bara bagwonka. 28 Kwoogu Musa eera antû, “Ûgu i bu bûkaamenya atî Mwathani n'we aantûmire kûrûtha mantû mama monthe, na ti kwenda gwakwa ningwa. 29 Antû baba bagakua gîkuû kîa wîthîre, kana bakagwatwa i kînyamaara ta antû bara bangî, bûmenye atî Mwathani atirantûma. 30 Îndî Mwathani akaarûtha ûntû bûtaarorûthîka, nthîgûrû igaatûka na kûmeria antû baba amwe na into biao bionthe, kaingo baathi nthikooni barî mwoyo, rîru bûkaamenya atî antû baba batiratîîyaga Mwathani.”
31 Na warîo akûrîîkia kwaria mîgambo înu yonthe, nthîgûrû yaatûka ruungu waagu Ndaathani na Abiramu baakinyîîte, 32 na kûmeria antû babu, mîciî yao, amwe na athingati bonthe ba Kora na into biao bionthe. 33 Kwoogu, bo, amwe na bionthe bira biarî biao beeroromeria bwa ndeeni ya îrinya wo barî mwoyo. Nthîgûrû yabakunika, bonthe baûra. 34 Aisiraeri bonthe bara babathiûrûkîrîte, bakwîgua irîro biao, baugia bakiugaga, “Tuugie, nthîgûrû îtikaaye gûtûmeria wana tiû.”
35 Na mwanki wauma kîrî Mwathani wabîîthia antû bara magana maîrî ma mîrongo îtaano, bara baathiîte kûruta macoco.
36 Nyuma ya ûgu, Mwathani aaria na Musa amwîra, 37 “Îra Eriasari mwana wa Arûni, mûthînjîri wa Ngai, arute ngîo inu cia kûbîîthia macoco mwankiini. Rîru anyagaarie mwanki ûyu kûûraaya, n'ûntû ngîo inu n'intheru. 38 Ngîo cia antû babu baûragirwe n'ûntû bwa meeyia maao, iciturwe ituîke mabaati ma kûguîkîra kîthînjîro, n'ûntû ireetirwe mbere ya Mwathani na n'intheru. Ga ituîke kîoneeria kîrî Aisiraeri.” 39 Kwoogu, mûthînjîri Eriasari aathûkia into bia kûbîîthia bibu bia rûthuku bira biareetirwe mbere ya Mwathani n'antû bara baabîîthiirue biathondekwa bia kûguîkîra kîthînjîro. 40 Bûbû bwarî ûntû bwa kûririkania Aisiraeri atî muntû nwa ûrîkû ûra atarî mûthînjîri, ûra atarî wa riiko rîa Arûni atikaathi kîthînjîrooni kûrutira Mwathani macoco. Wegua t'ûgu agaakara ta Kora na athingati baake.
Arûni oonokia antû
41 Rûûni, Aisiraeri bonthe banung'unîra Musa na Arûni bakiugaga, “Ibûraûragire antû ba Mwathani.” 42 Bakwîthîrana mbere ya Musa na Arûni kaingo bareeta moobatu maao, baûndûka baraithîîte Îrema rîa Kûrîîkanaga. Boona îtu rîkunîkîîte Îrema rîru, na ûkumio bwa Mwathani bwonwa agu. 43 Musa na Arûni baathi, baarûngama mbere ya Îrema rîa Kûrîîkanaga, 44 na Mwathani aaria na Musa amwîra, 45 “Îbathûrane na antû baba, mbathirie nthûti îmwe!” Na beegwîthia batirithîîtie moothiû maao nthî. 46 Musa eera Arûni, “Thûkia mbakûri yaku, mîîkîre mwanki kuuma kîthînjîrooni, na gwîkîre macoco rîru ûthi n'yo na mpwî kîrî antû na ûbatherie. Rûtha bûrî mpwî! Mûthûûro wa Mwathani n'ûbakinyîîrîîte na mûthiro wanjîîria kûbaithûkîra.” 47 Kwoogu, Arûni aarûtha bûra eerirwe i Musa. Aathûkia mbakûri yake na augia mwanka gatîgatî ga antû bara beethîreene amwe. Akwona mûthiro ûkwanjîîria, eekîra macoco mbakûriini na kûbatheria. 48 Akûrûtha ûgu, mûthiro ûyu wathira, n'we aatigwa gatîgatî ka bara baakwire na bara barî mwoyo. 49 Mûtari wa antû bara baakwire n'ûntû bwa mûthiro baarî ngiri îkûmi na inya na magana mûgwanja, na gûtarî gûtara bara baakuire kuumania na ûûragani bwa Kora. 50 Mûthiro ûkûthira, Arûni aacooka kîrî Musa mwîrîgaani wa Îrema rîa Kûrîîkanaga.