Mawatho meegiî igongwana
15
1 Mwathani aaria na Musa amwîra, 2 “Nenkera antû ba Isiraeri mawatho mama mara bakaathîkîra rîra bakaathûngîra nthîgûrû îra nkûbanenkera batûûra. 3 Bakaandutagîra biewa bia gûtûma mûcinko ûmwega wa gûkenia Mwathani ûnkinyîra. Kîewa gîkî nwa kîîgue kîrî, kîgongwana kîra kîbîîthagua, kîgongwana gîa kûûyûria mûthiîtio ûra muntû athiîtîîtie, kîewa gîa kwîbendera kana kîewa gîa kagiita ka biatho bienu bira bitue, na nwa kiume ng'ombeeni, mbûriini kana ng'onduuni cienu. 4 Rîra bûkûruta biewa bibi, ibûbatîîrue bûreetera Mwathani biewa bia irio bia gîcuncî gîa îkûmi kîa ndebe ya mûtu ûmwinyu ûkimanîîtue na rita îmwe ya maguta. 5 Na kîrî wa kîra ntûrûme îkûrutwa îrî ya kîgongwana gîa kûbîîthua, muntû abatîîrue aruta rita îmwe ya ndibei îrî kîgongwana kîa biakûnyua. 6 Rîra muntû aaruta ntûrûme nabatîîrue aruta gîcuncî kîa bitaano kîa ndebe ya mûtu ûkimanîîtue na rita îmwe na nucu ya maguta ma mîceituuni kîrî kîewa kîa irio, 7 amwe na rita îmwe na nucu ya ndibei. Mûcinko wa igongwana bibi n'ûkenagia Mwathani.8 “Rîra ncamba ya kiumîri îkûrutîrwa Mwathani kîrî kîgongwana gîa kûbîîthia kana kîrî kîgongwana gîa kûûyûria mûthiîtio, kana kîrî kîgongwana kîa ngwatanîro, 9 kîewa kîa irio kîa icuncî bithatû bia îkûmi bia mûtu ûkimanîîtue na rita ciîrî cia maguta ma mîceituuni i kîbatîîrue kîrutwa 10 amwe na rita ciîrî cia ndibei. Mûcinko wa kîgongwana gîkî n'ûkenagia Mwathani.”
11 Into bibu i bio bibatîîrue kûrutwa amwe na ncamba ya kiumîri, ntûrûme, ng'ondu kana kabûri. 12 Wa bûra nyamû ira ikûrutwa ikoongeerekaga nwabu into bira bikûrutanîrua amwe nacio bibatîîrue kwongeereka. 13 Aisiraeri bonthe i babatîîrue kûrûthaga ûgu rîra bakûrutîra Mwathani kîgongwana na mwanki gîkaruta mûtararî ûra ûmûkenagia. 14 Na ûkaaya kwîgua ageni bara batwîre gatîgatî keenu, n'wîgue batwîre ku gwa kagiita gaakubî kana gwa kagiita kaaraaya, bakeenda kûrutîra Mwathani kîgongwana gîa kûbîîthua kîra kîrutaga mûtararî ûra ûkenagia Mwathani, nwa mwanka bathiingate mawatho mamu. 15 Biû amwe na ageni bara batwîre gatîgatî keenu, ibûbatîîrue kûthingata mawatho mamu magiita monthe. Biû nabo bûrî gîntû kîmwe meethooni ma Mwathani. 16 Biû nabo bûrî ruungu rwa mawatho mamwe.
17 Mwathani aaneenkera Musa 18 mawatho mama mara antû ba Isiraeri bakaathingataga barî nthîgûrû îra Mwathani athiîte kûbanenkera. 19 Antû baaketha irio kuuma mîndaani yao nthîgûrû înu i babatîîrue kûruta gîcuncî kîmwe bakarutîra Mwathani kîrî kîewa. 20 Rîra ûkûruga mîgaate, mûgaate wa mbere ûra ûrugîîtwe na mûtu wa irio bira biakethwa warîo, ûbatîîrue ûrutwa ûrî maruta ma mwanya kîrî Mwathani. Mûgaate ûyu ûbatîîrue ûrutwa wa ta bûra maruta ma mwanya kuuma kîrî irio bira bûbûûraga marutagwa. 21 Kagiita konthe nthuke cienu cionthe ikaarutagîra Mwathani kîewa gîkî kîa mwanya kuumania na mîgaate îra bwaruga.
Kîgongwana kîra muntû akaarutaga rîra eeyia atakwenda
22 Ûûgû i bu gûgaakarîka ûkaaya kwîgua muntû, atakwenda, kana atirathiingata mawatho mamu Mwathani aaneenkeere Musa, 23 kana magiitaani mara makaaya antû bakaremwa i kûthingata mawatho mamu Mwathani aabûnenkeere gûkûrûkîîra Musa. 24 Ûkeegua mabîtia mamu mooneka n'ûntû bwa kûrigwa gwa antû bonthe, bakaaruta ncamba kîrî kîgongwana gîa kûbîîthua amwe na biewa bia irio na ndibei bira bibatîîrue. Kîgongwana gîku gîkaaruta mûtararî ûra ûkenagia Mwathani. Na îgûrû rîa bibu bakaaruta nthenge kîrî kîgongwana n'ûntû bwa wîyia. 25 Mûthînjîri wa Ngai akaarûtha nyambura cia kûtheria antû bonthe ba Isiraeri nabo bakaarekerwa meeyia maao i Mwathani, n'ûntû beeyiirie batakwenda na i bareeteete kîgongwana n'ûntû bwa meeyia na kîewa kîa irio kîrî Mwathani. 26 Antû bonthe ba Isiraeri na ageni bara batwîre gatîgatî kaao bakaarekerwa, n'ûntû bonthe i baarûthire meeyia mamu batakûmenya.
27 Muntû akaaya kwîyia atakwenda, abatîîrue aruta mparika ya mwanka ûmwe kîrî kîgongwana n'ûntû bwa meeyia. 28 Mûthînjîri wa Ngai akaarûtha nyambura cia kûtheria muntû ûyu mbere ya Mwathani. N'we muntû ûyu akaarekerwa wîyia bwake. 29 Watho bûbu i bu bûkaathingatagwa i muntû wonthe ûra akeeyia atakwenda, eegue arî Mûisiraeri kanyiinyari kana arî ûmwe wa ageni bara batwîre gatîgatî kaao.
30 Îndî muntû ûra akeeyia na ûtûrî, eegue arî Mûisiraeri kanyiinyari kana arî ûmwe wa ageni bara batûûraga gatîgatî kaao, muntû ûyu arî na meeyia ma kûbûthîîria Mwathani. Nwe abatîîrue aûragwa. 31 N'ûntû n'areganîîte na bûra Mwathani augîîte na auna maathana maake na ûtûrî. Muntû ûyu n'we akeegua eecwîrîîte thîîna wengwa.
Muntû ûra aunire watho bwa Sabatû
32 Îgiita rîmwe antû ba Isiraeri barî rwanda muntû ûmwe n'onirwe akiuna nkû ntugû ya Sabatû. 33 Bara baamwonire i baamwirire kîrî Musa, Arûni na antû bonthe ba Isiraeri. 34 Muntû ûyu n'aingîîrwe bantû aakara arî mûcûûbîre n'ûntû gûtirî we aiyî bûra muntû ta ûyu aabatîîrue arûthîrwa. 35 Rîru Mwathani aaria na Musa amwîra ata rî, “Muntû ûyu nwa mwanka aûragwe; antû bonthe babatîîrue bamûringangîra ome ya kambî na maiga mwanka akua.” 36 Kwoogu antû bonthe baumagarûkia muntû ûyu ome ya kambî, bamûûraga na maiga, wa ta bûra Mwathani aathîîte Musa.
Mawatho meegiî makundo
37 Mwathani aaria na Musa amwîra, 38 eere antû ba Isiraeri, “Kuundîkaani makundo mîthiani ya nguo cienu na bwîkîre tûrigi twa rangi ya mburuu kîrî wa kîra îkundo. Na bûrûthage ûgu magiita monthe wana kinya nthukeeni înu îîngî îkaaya. 39 Makundo mamu magaatuîka gîntû gîa kûbûririkanagia maathana maakwa monthe, na bûkamaathîkîra. Na bwarûtha ûgu, bûtiintiganîria bûthiingata wendo na mawîrirîria ma nkoro cienu. 40 Makundo mamu makabûririkanagia kûthingata maathana maakwa na bûkeegua bûrî baakwa kûrû. 41 I niû Mwathani Ngai weenu. Ndaabûrutire Miisiri kaingo ntuîka Ngai wenu. I niû Mwathani.”