Antû baanung'una
14
1 Kîrîndî kîonthe kîa Aisiraeri kîarîra nainya mûno, antû baarîra ûtugû bunthe. 2 Baanung'unîîre Musa na Arûni bakiugaga, “Kaaba tûgîkuîra Miisiri! Kaaba tûgîkuîra aaga rwanda! 3 I mbi n'ûntû Mwathani atwirîîte nthîgûrû înu? Tûrîûragîrwa ndûani, na aka na aana beetû bakaagwatwa mîgwate! Ti kaaba tûgacooka Miisiri?” 4 Kwoogu baanjîîria kwîrana, “I tûthuure mûtongoria, tûcooke Miisiri.” 5 Rîru Musa na Arûni beeturania nthî na nda mbere ya kîrîndî kîa aana ba Isiraeri bakîromba. 6 Na Njosua mwana wa Nuni, na Karebu mwana wa Njebune, bara baarî bamwe ba bara baathigaanire nthîgûrû înu, baatembûranga nguo ciao i kîeba; 7 baaria na kîrîndî kîonthe kîa aana ba Isiraeri bauga, “Nthîgûrû înu twakûrûkîîre gatîgatî kaayo kaingo tûmîthigaana, i nthîgûrû îmbega mûno ya kûrigaria. 8 Ûkeegua Mwathani n'agûkena i tiû, agatûthûûngîria ndeeni ya nthîgûrû îno atûneenkere yoo îtuîke yetû, n'yo i nthîgûrû yûûyûrîîte îria na ûkî. 9 Bunka bûtigaatiganîrie Mwathani, na bûtigaakuthûke atûûri ba nthîgûrû înu. N'ûntû tûkabatura na mpwî; kûrigîîrua kwao i kûrîkîîtie kûrutarutwa oogo, n'we Mwathani arî amwe naati; bûtigaakuthûke.” 10 Îndî kîrîîndî kîonthe kîabanga kûbaringanga na maiga. Nthûti îmwe, ûkumio bwa Mwathani bwonekana îgûrû rîa îrema rîa kûrîîkanaga, mbere ya Aisiraeri bonthe.Musa aarombera antû
11 Rîru Mwathani aaria na Musa amwîra, “Antû baba bakaambagîra gîtîîyo mwanka rî? Na, i mwanka rî bakaathi na mbere kûrega kûmbîtîgia, kinya nyuma ya biama bionthe bira ndaaringa gatîgatî kaao? 12 Nkabaringa na mîrimo îmîthûûku na nkabata kûraaya; îndî, kuumania naawe, nkaathuuranîra mûgongo ûngî ûmûnene, ûrî na inya nkûrûki yao.”
13 Îndî Musa eera Mwathani, “Warutire antû baba nthîgûrû ya Miisiri na inya yaku. Rîra antû ba Miisiri bakeegua ûgu, 14 bagaapa antû ba nthîgûrû îno ntheto. N'ûntû antû baba i beegîîtue atî woû, Mwathani, ûrî amwe naati; n'ûntû woû, Mwathani, n'ûkwoneka bwega îtuuni rîaku rîra rîrûngamaga îgûrû rîetû, na atî woû ûtûtongoragîîria mûthenya na gîtugî gîa îtu na ûtugû na gîtugî kîa mwanki. 15 Îndî îîndî, ûkaûraga antû baaku bonthe îgiita rîmwe, mîgongo îra îîgîîtue nkuma yaku îkauga, 16 ‘Mwathani naûragîîre antû baake rwanda n'ûntû n'aremirwe kûbaira nthîgûrû îra augîîte akabaneenkera.’ 17 Kwoogu, îîndî ngûkwereka, woû Mwathani, ûtwonie inya yaku ûrûthe bûra watwîrire rîra waugire, 18 ‘Niû Mwathani ntithûûrangaga na mpwî, na ndî kîao kiingî, na indekagîra ûthûûku na wîyia. Îndî gûtirî bu kûûmbîka ndega gûkaanûkia aana na aana ba aana mwanka rûciaro rwa ithatû na rwa inya n'ûntû bwa meeyia ma aciari baao.’ 19 Ngûkwereka rekera antû baba meeyia maao, kûringana na kîao gîaku kiingî wa ta bûra ûbarekagîra kuuma bakuuma Miisiri mwanka îîndî.”
20 Mwathani aacookia, “Nkûbarekera ta bûra waromba. 21 Îndî na mma wa ta bûra ntûûraga mwoyo na ta bûra nthîgûrû yonthe yûûyûri ûkumio bwakwa, 22 gûtirî kinya ûmwe waciao ûra aaroona ûkumio bwakwa na biama biakwa bira ndaaringire Miisiri na rwanda na aathi na mbere kûngeria maita mama monthe atakwathîkîra kayû gaakwa, 23 akoona nthîgûrû îra ndaathiîtiirie kûnenkera biûyûûyû biao; na kinya bara batakûmbathîkîra wana bo batimîona. 24 Îndî n'ûntû mûruti ngûgî wakwa Karebu i mwanya, na n'antîîyaga na nkoro yake yonthe, nkamûkinyithia nthîgûrû înu athûûngîre ku na nciarwa ciake ikamîgaa. 25 N'ûntû Aamareki na Akanaani batûûraga ndeeni ya ibonde bia nthîgûrû înu, rûû ûndûkaani nyuma bûthi rwanda, bûtarîîte îria Rîtuune.”
Mwathani aakaanûkia Aisiraeri
26 “Rîru Mwathani aûria Musa na Arûni, 27 Kîrîndî gîkî gîa antû baathûûku bakaathi na mbere kûnung'unîra mwanka rî? I mbîgîîtue kûnung'una gwa antû baba ba Isiraeri. 28 Îîndî bacookerie ûûgû: Ta bûra ntûûraga mwoyo, niû Mwathani ndiuga, nkabûrûthîra wa bûra ndeegiirue bûkiuga. 29 Bûgaakua na mîîrî yenu îgateewa wa gûkû rwanda, n'ûntû bwa kûnung'una îgûrû rîakwa, gûtirî kinya ûmwe weenu ûra arî na ûkûrû bwa kwanjîîria mîanka mîrongo îîrî na nkûrûki, 30 ûra akaathûngîra nthîgûrû înu îra ndaathiîtiirie nkabanenkera îtuîke yao, tatiga Karebu mwana wa Njebune, na Njosua mwana wa Nuni. 31 Biû bwaugire atî aana beenu bakaagwatwa mîgwate, îndî niû ngaakinyithia aana beenu nthîgûrû îra bûkûbûthîîria, kaingo bamîmenya na îtuîka gîkaro kîao. 32 Îndî biû, bûgaakuîra wa gûkû rwanda. 33 Aana beenu bakaaruruutha na banyamaarîre gûku rwanda gwa kagiita ka mîanka mîrongo îna n'ûntû bwa kwaga wîtîgio kwenu mwanka muntû weenu wa mûthia agaakuîra rwanda. 34 Kuumania na meeyia meenu, bûkanyamaara gwa kagiita ka mîanka mîrongo îna, bûmwe na ntugû ira mîrongo îna bwathigaanire nthîgûrû îra, mwanka ûmwe kwa weera ntugû îmwe; bûkaamenya atî i niû nthûûrîîtue. 35 Niû Mwathani ndauga: na mma nkabûrûthîra ûgu biû bwinthe bara bwîthîreene aaga gûnkararia. Bonthe bakaathirîra wa gûkû rwanda na i ku bagaakuîra.”
36 Antû bara Musa aatûmîîte bathi kûthigaana nthîgûrû înu, bara baacookire na gûtûma antû banung'unîra Mwathani n'ûntû bwa kûreeta ntûmwa înthûûku îgûrû rîa nthîgûrû, 37 antû babu baareetire ntûmwa ya ûthûûku îgûrû rîa nthîgûrû înu, baakuire kuumania na mûrimo ûmûthûûku ûra waaretirwe i Mwathani. 38 Îndî Njosua mwana wa Nuni, na Karebu mwana wa Njebune, i bo baatigarire barî mwoyo gatîgatî ga antû bara baathiire kûthigaana nthîgûrû. 39 Musa eera Aisiraeri bonthe. Nabo baarîra na ûrûrû bwingî.
Îgeria rîa mbere rîa kwithûkîra nthîgûrû
(Kûri 1:41-46)
40 Rûûni, baûkîîra rûkîîrî gacaitîrî baathi mbarî cia irîma, bakiugaga, “Îîndî itwîthuuranîrîte kûrû kûthi ara Mwathani aatwîrîîte. I tûkuumbûra atî itwîyîîtie.”
41 Îndî Musa auga, “Îîndî i kî n'ûntû bûtakwathîkîra Mwathani? Kwoogu bûtiûmbana! 42 Bûtikaathi naagu irîmaani giria bûûya kûringwa mana n'anthû beenu, n'ûntû Mwathani atirî amwe naabi. 43 Bwonana na Aamareki na Akanaani, bûgaakuîra ndûani; n'ûntû bûgaatiga kûthingata Mwathani, we atiîgua arî amwe naabi.”