Athigaani
(Kûri 1:19-33)
13
1 Rîru Mwathani aaria na Musa, amwîra, 2 “Tûma antû, kaingo bathi bakathigaane nthîgûrû ya Kanaani, îra nkûnenkera antû ba Isiraeri; kuuma wa kîra mwîrîga wa beethe bûgaatûma muntû ûmwe, woora muntû eegue arî mûtongoria gatîgatî kaao.” 3 Kwoogu Musa abatûma kuuma rwanda rwa Parani wa ta bûra aathîîtwe i Mwathani; bonthe baarî antû bara baarî atongoria ba aana ba Isiraeri. 4 Na mariîtwa maao i mama;kuuma mwîrîga wa Rubeni, Samua mwana Sakuri.
5 Kuuma mwîrîga wa Simioni; Safati mwana wa Ori.
6 Kuuma mwîrîga wa Njunda, Karebu mwana wa Njebune.
7 Kuuma mwîrîga wa Isakaari; Igari mwana wa Njosebu.
8 Kuuma mwîrîga wa Eburaimu; Osea mwana wa Nuni
9 Kuuma mwîrîga wa Benjameni; Pariti mwana wa Rafu.
10 Kuuma mwîrîga wa Seburuni, Ngandieri mwana wa Sondi.
11 Kuuma mwîrîga wa Njosebu; na i ta kuuga, kuuma mwîrîga wa Manase, Gandi mwana wa Susi.
12 Kuuma mwîrîga wa Ndani, Amieri mwana wa Ngemari.
13 Kuuma mwîrîga wa Aseri; Sethuri mwana wa Mikaeri.
14 Kuuma mwîrîga wa Nabutarî; Nabi mwana wa Bobusi.
15 Kuuma mwîrîga wa Ngandi; Ngeweri mwana wa Maki.
16 Mamu i mo mariîtwa ma antû babu baatûmîîtwe i Musa bathi kûthigaana nthîgûrû înu. Na Osea mwana wa Nuni, eetwa i Musa Njosua.
17 Musa abatûma kaingo bathigaana nthîgûrû ya Kanaani, abeera, “Îthiini îîndî ndeeni ya Negebu bûtwe irîmaani, 18 bûkaraithe i nthîgûrû ya mûthemba ûkari ata; na antû bara bakaraga ndeeni yaayo, wegua i bara barî inya kana i batarî na inya, wegua i baingî kana i baakai; 19 na nthîgûrû îra batûûraga wegua n'îmbega kana n'înthûûku na wegua bakaraga kambîîni kana i taûni imbirigîre na nthingo; 20 n'yo nthîgûrû n'ya mûthemba ûkari ata, wegua i nthîgûrû ya ûtonga kana n'ya ûkîa; wegua îrî na mîthitû kana îtirî n'yo. Geriani nainya, bûkareete matunda ma nthîgûrû înu.” (Kwoogu îgiita rîru rîarî îgiita rîa kwîrua gwa ncabiibû cia mbere.) 21 Kwoogu beetia baathigaana nthîgûrû kuuma rwanda rwa Sini kûthi Reobu, mwanka kûthûngîra Amathi. 22 Beetia Negebu, baakinya Eburoni; naara antû ba mîciî ya Aimani, na Sesai, na Tarumai aana ba Anaki, baarî. N'yo Eburoni yaakîîtwe mîanka mûgwanja mbere ya Soani ya Miisiri. 23 Baakinya kîbondeeni gîa Kîgaro, na naagu baatema rwong'i rwarî na kîgaro kîmwe gîa ncabiibû, bagîkamata na mûtî gatîgatî ga antû baîrî; baareeta kûngûmanga wanacio, na nkûyû. 24 Bantû agu eetwa Kîbonde gîa Esikoria n'ûntû bwa kîgaro gîku aana ba Isiraeri baatemeete naagu.
Ntûmwa ya athigaani
25 Baacooka nyuma ya kûthigaana nthîgûrû, mûthiani wa ntugû mîrongo îna. 26 Baathi baakinya kîrî Musa, Arûni, na kîrî antû bonthe ba aana ba Isiraeri, naagu rwanda rwa Parani, naagu Kandesi; babaretera ntheto, bo na antû bonthe, baboonia matunda ma nthîgûrû înu. 27 Beera Musa ûûgû, “Twakinyire nthîgûrû înu waatûtûmîîte, na mma, i nthîgûrû yûûyûrîîte îria na ûkî, na gîa gûkûûyîîra, mama i mo matunda maayo. 28 Îndî antû bara bakaraga ndeeni ya nthîgûrû înu i bara barî inya, na taûni ciao îrî na nthingo inene mûno; na nkûrûki ya ûgu itwonire nciarwa cia Anaki noogo. 29 Aamareki batûûraga ndeeni ya nthîgûrû ya Negebu; na Aiti, na Anjebusi, na Amori bakaraga gatîgatî ka irîma, na Akanaani batûûraga akubî na îria rîa Menditarîniani; na rûteere rwa Njorondani.” 30 Karebu aakiria antû bara baanung'unagîra Musa, auga, “Tûthi nthûti îmwe tûkamiithûkîre; n'ûntû nwa tûûmbe kûûmbana gûtarî nkanja.” 31 Îndî antû bara baathiîte amwe n'we bauga, tûtiûmba kûthi kûrûa na antû baba; n'ûntû barî na inya nkûrûki yetû. 32 Baareetera aana ba Isiraeri ntheto inthûûku cia nthîgûrû înu baathigaanîîte, bauga, “Nthîgûrû înu twakûrûkîîre gatîgatî kaayo kaingo tûmîthigaana, i nthîgûrû îthiragia antû baayo; na antû bonthe bara twonire ndeeni yaayo n'antû baanene mûno. 33 Kinya, naagu itwonire Anabiri, nciarwa cia Anaki, bara baumîîte kîrî Anabiri; twebona tiû twingwa tûkari ta mpandi; nabo nwabu baatwonaga tûkari.”