Miriamu na Arûni baanung'unîra Musa
12
1 Rîru Miriamu na Arûni baanjîîria gûcaambia Musa n'ûntû bwa mûka wa kuuma Kusi ûra aagûrîîte. 2 Bauga, “Aabu ka Mwathani akwaria na njîra ya kwatha Musa wenka? Anga, atiaragia naati?” Mwathani eegua mîgambo înu. 3 Musa aarî muntû eenyiiagia nkûrûki ya antû bara bangî bonthe bara baarî nthîgûrû. 4 Rîru na mpwî, Mwathani eera Musa, Arûni na Miriamu, “Ncûûni Îremaani rîa Kûrîîkanaga, biû bûrî bathatû.” Kwoogu, bonthe barî bathatû baathi mwîrîgaani wa Îremaani rîa Kûrîîkanaga. 5 Rîru Mwathani eendama arî gîtugîîni gîa îtu, aarûngama mwîrîgaani wa Îrema, eeta Arûni na Miriamu. Barî baîrî baumîra mbere. 6 Rîru Mwathani abeera, “Thikîîriani mîgambo yakwa: Rîra kûrî na kîroria gatîgatî keenu, Niû Mwathani ndîîbonanagia kîrî kîo na kîoneki na kwaria nakîo na njîra ya irooto. 7 Îndî îgûrû rîa mûruti ngûgî wakwa Musa, tibu gûkari ûgu. We arî na mûrigo wa kûmenyeera antû baakwa bonthe. 8 Niû mbaragia n'we tûcûûbeene na meetho, bwega na ti na njîra ya ngerekano. Wee nambonaga niû Mwathani wa bûra nkari. I mbi îîndî, bûtaakuthûka kwaria kîînyume na mûruti ngûgî wakwa Musa?”9 Rîru Mwathani aathûûra mûno n'ûntû bwao, auma agu, eethiîra. 10 Îtu rîkuumauma agu îgûrû rîa Îrema rîa Kûrîîkanaga, Miriamu oonekana arî na mûtigiri, ayerwîte ce ta îra. Arûni akûûndûka aacûûba Miriamu, aarigara akwona Miriamu n'aarî akûgwatwa i mûtigiri. 11 Rîru, Arûni eera Musa, “Woû mwathi wakwa, ûtigaatûkaanûkie n'ûntû itûrûthîîte mantû ma waa na tweyia. 12 Ûtikaareke Miriamu akara ta muntû aaciarirwe arî mûkuû, ûra akubî nucu ya mwîrî wake akiuma nda ya gina warî ûkwora.” 13 Musa aakayîra Mwathani auga, “Ngûkwereka, itû Ngai, mworie.” 14 Îndî Mwathani aaria na Musa amwîra, “Ûkeegua îthe i ka amûtuîra mata ûthiû, aanga tika, agîa îgi ntugû mûgwanja? Kwoogu, mûrute ome ya kambî akare noogo kagiita ga ntugû mûgwanja, rîru waûmba kûmwîtîgîîria acooka kambîîni.” 15 Kwoogu, Miriamu eengatua auma ome ya kambî kagiita ga ntugû mûgwanja. Antû bataanjîîria rûgendo rwao kaîrî mwanka rîra Miriamu aacookiirue kambîîni. 16 Nyuma ya ûgu, antû baathi kuuma Aserothi, na baamba marema rwanda rwa Parani.