Antû baanung'unîra Mwathani
11
1 Antû baanjîîria kûnung'una kîrî Mwathani n'ûntû bwa mathîîna maao. Rîra Mwathani aabeegiirue aathûûra aatûma mwanki gatîgatî kaao. Wabîîthia nteere imwe cia kambî. 2 Antû baarîrîra Musa n'we aaromba Mwathani na mwanki woora. 3 Kwoogu bantû agu eetwa, Taberaa n'ûntû agu noogo mwanki wa Mwathani wakanîîre gatîgatî kaao.Musa aathuura atongoria mîrongo mûgwanja
4 I kwarî na ageni baathiiyanîîtie na Aisiraeri. I beegagua bata ya nyama mûno mwanka Aisiraeri kinya bo baanjîîria kûnung'una bakiugaga, “Ûkeegua nwa twone nyama! 5 Tûrî Miisiri twarîyaga makûyû wa bûra muntû eebîgagua na gûtirî kîo muntû aarîaga. I tûkûririkana mîûngû, matanka, matûngûrû na matûngûrû saumu mara twarîyaga! 6 Îndî îîndî wana kathûri gûtirî, gûtirî gîakûrîa, nwa mana îra muntû akûrîa wa kîra ntugû.”
7 Mana yakari ta tûpîndî tûniini twa rangi ya mûruruku yungeene na ûyerû. 8 Antû baathiiyaga bakîîthîranagia mana bagacooka bakamîthia na kîthii, kana bakamîkima na ntirî. Baamîrugaga na nyûngû kana bakamîkaanda tûmîgaate. Muntû amîcama, eegagua ta gîntû kîrugîîtwe na maguta ma mîceituuni. 9 N'yo mana yaagwîyanagîria na maame ûtugû, antû bagîûka bakeethîra înyageere nthîgûrû.
10 Musa eegua bûra antû bakûnung'una barî tûkuundi tûkuundi barûûngi mîîrîgaani ya marema maao. Mwathani aathûûra mûno, na Musa aataangîka. 11 Musa aûria Mwathani ata rî, “I mbi îtûmîîte ûûndûtha naaî ûûgû? I mbi îtûmîîte ûmpa mûrigo wa antû baba bonthe? 12 Niû ntaabaûmba kana mbaciara! I mbi îgûtûma ûmbîîra ndûthe ta mûgwati wa mwana, mbakamata na njara ta ngenke mwanka nthîgûrû îra werire biûyûûyû biao ûkabaneenkera. 13 I kû mbûûmba kûrutîra antû baba bonthe nyama ikûbagana? Ingî barîkara bakînyinyiraga bagîîtagia nyama. 14 Ntiûmba kûûragana na gûkamata antû baba bonthe ndî ninka, ûyû mûrigo n'ûkûûndema! 15 Wegua ûgu i bu ûkaathi na mbere kûûndûtha na kaaba ûkaambûraga wendî; ûmbîgue kîao, ntikaaye kûthi na mbere kwinyîîrîka.”
Musa aathuura atongoria mîrongo mûgwanja
16 Mwathani aaria na Musa amwîra ata rî, “Îthîrania akûrû mîrongo mûgwanja ba Isiraeri bara wiyî i batîîyagwa n'antû ta atongoria ba antû ûbareete kîrî niû Îremaani rîa Kûrîîkanaga, ûbeere barûûngame naawe. 17 Nkeendama mbarie naawe na mbagaûrîre Kîrundu ûra arî ndeeni yaku eegue arî ndeeni yao. Rîru bakaûmba gûgûteethia gûkamata mûrigo wa antû baba ûtige kûûragana nabo gwenka. 18 Îîndî îra antû, ‘Îîtherieni n'ûntû bwa rûû, bûkaagîa na nyama cia kûrîa. Mwathani n'egîîtue kûnyinyira kwenu na kuuga bûra bûkuuga, Na kaaba ûkeegua i bûkwona nyama na atî na kaaba rîra bwarî Miisiri. Îîndî Mwathani akabûneenkera nyama na bûcirîe. 19 Nwa mwanka bûcirîe na ti ntugû îmwe kana ciîrî, kana itaano, kana îkûmi, kana mîrongo îîrî; 20 îndî i mweri unthe, mwanka i bûkore na bûgwatwe i kînyiria gîa cio. Gûgaakarîka ûgu n'ûntû i bûregeete Mwathani ûra we arî gatîgatîîni keenu na i bûtheteete kîrî we bûkiugaga bûtaabatîîrue buuma Miisiri.’ ”
21 Musa eera Mwathani, “Aaga ntongoreeretie antû ngiri magana mathanthatû na i woû ûyû ûkuuga ûkabaneenkera nyama kwa îgiita rîa mweri ûmwe? 22 Nwa kwoneke ng'ombe kana ng'ondu ciûmba kûbaganîria nyama? Wana makûyû mara marî îriani monthe makeethîranua rî, mabagana?”
23 Mwathani aacookeria Musa amwîra, “Anga inya yakwa îrî kîthimi? Ibweteereete kwona wegua bûra mbugîîte bûgaakarîka kana bûtiikarîka.”
24 Kwoogu Musa aumagarûka eera antû bûra Mwathani aamwîrîîte. Na eethîrania atongoria baao mîrongo mûgwanja na abeera barûngame bathiûrûkîîrîîte îrema. 25 Rîru, Mwathani aagûrûka arî îtuuni na aaria n'we. Rîru aathûkia gîcuncî gîa kîrundu kîra aarî akûnenkera Musa, abaa woora ûmwe wa akûrû mîrongo mûgwanja. Rîra baûyûrirwe i kîrundu ûyu, akûrû babu baanjîîria kûroria, îndî bataacookera kûrûtha ûgu.
26 Akûrû baîrî gatîgatî ka bara mîrongo mûgwanja bara baathuurîîtwe, Erindandi na Mendandi, baarî bagûtigwa kambîîni akûrû babu bangî bakûthi Îremaani. Kîrundu abaayîîra gûku kambîîni, na baanjîîria kûroria agu baarî kambîîni. 27 Mûthaka ûmwe auma na rwîro na eera Musa, “Erindandi na Mendandi i bakûroreria maremaani maao.” 28 Rîru, Njosua, mwana wa Nuni, ûra aarî mûteetheeria wa Musa kuuma wîthî bwake, eera Musa, “Musa, mwathi wakwa, bakaanie!” 29 Îndî Musa amûcookeria, “Îîndî, ka ûkwîgua rûriitho n'ûntû bwakwa? Ûtakîîgua Mwathani aaneenkera antû baake bonthe kîrundu wake nabo bagatuîka iroria!” 30 Rîru Musa aacooka kambîîni amwe na akûrû bara mîrongo mûgwanja ba Isiraeri.
Mwathani aatûma tuumbuthûki
31 Nyumaani Mwathani areeta ruuo na mpwî, rwareeta tuumbuthûki kuuma îriani na aatûma tûbuurûûka rûteere rwa kambî ûraaya bwa biiti ithatû kuuma nthîgûrû, ta bantû a rûgendo rwa ntugû îmwe ûgu weera mbarî kûthiûrûkîra kambî, twaûyûra twakunîka nthi ta biiti îmwe ûgu kûthi bwa îgûrû. 32 Kwoogu, ntugû înu yonthe, ûtugû bunthe na ntugû îra yaathingatîîte, antû beerutanîria kwîthîrania tuumbuthûki; gûtirî muntû eethîrania ruungu rwa ikabû îgana rîmwe. Batuanîka gûntû kunthe naagu kambîîni kaingo batûûmithia. 33 Wa nyama irî oogo kwa wingî, mbere antû barîîkia kûrîa, Mwathani aathûûrîra antû, abarumia ndumio îînene mûno. 34 Kwoogu bantû agu eetwa Kiburothi-Ataabab n'ûntû agu noogo baathikire antû bara baarî na guuru.
35 Kuuma Kiburothi-Ataaba antû baathi mwanka Aserothi, baamba marema maao nagûkara noogo.