Tûrumbeeta twa fetha
10
1 Mwathani aaria na Musa amwîra, 2 “Rûtha tûrumbeta twîrî twa fetha ya gûtura twagwîta antû beethîrana bantû amwe na twa gûkûûrithia antû nthaama. 3 Rîra tûrumbeta tûtu tûrî twîrî tûkaaringwa nainya kagiita kaaraaya, antû bonthe bakeethîrana mwîrîgaani wa Îrema rîa Kûrîîkanaga 4 Îndî rîra karumbeta kamwe gakaaringwa atongoria ba mîîrîga ya antû ba Isiraeri i bo bakeethîrana baaye kîrî woû. 5 Rîra karumbeta gakaaringwa nainya kagiita gaakubî, mîîrîga îra yambîîte marema mbarî ya uumîîro bwa riûa îgaakûûra nthaama. 6 Kaaringwa îgiita rîa maîrî, mîîrîga îra yambîîte marema mbarî ya naiti îkûûre marema. Kwoogu rîra karumbeta kaaringwa kagiita gaakubî i ga gûkûûra nthaama. 7 Rîra antû bakwîthîranua amwe karumbeta gakaaringagwa nainya kagiita kaaraaya. 8 Tûrumbeta tûkaaringagwa i nthaka cia Arûni athînjîri ba Ngai. Watho bûbû i bwa kûrûmagîîrwa magiita monthe mara makaaya. 9 Rîra kwagîa ndûa nthîgûrû yenu, bûkîrûa kuumania na anthû beenu babwithûkîrîîte, ringaani tûrumbeta tûtû. Na Niû, Mwathani wenu, nkabûteethia na mbwonokie kuuma kîrî anthû beenu. 10 Kaîrî, wana biathooni bienu bia kûyiûka kwa mweri, na biatho bira biingî bia kûgonga Ngai, bûkaariingaga tûrumbeta rîra bûkîruta igongwana bia kûbîîthua na igongwana bia ngwatanîro na tûkaaririkanagia Mwathani Ngai wenu kîrîîkanîro gîake naabi. Rîru nkabûteethia. I niû Mwathani Ngai weenu.”Aisiraeri baakûûra nthaama
11 Ntugû ya mîrongo îîrî ya mweri wa îîrî, mwankaani wa îîrî kuuma antû ba Isiraeri bakuuma Miisiri, îtu rîra rîarî îgûrû rîa Îrema rîa Kûrîîkanaga rîaûkîîra, 12 nabo Aisiraeri baanjîîria rûgendo rwao kuuma rwanda rwa Sinai. Îtu rîru rîathi rîagwîrîîra rwanda rwa Parani. 13 Baanjîîria kûthi wa ta bûra Mwathani aabaathaga gûkûrûkîîra Musa, 14 na wa îgiita rîra baathiiyaga, beegagua beebaangîîte ûntû bûmwe rîonthe. Bara baarî ruungu rwa kîbeendeera gîa gîkundi kîa mwîrîga wa Njunda i bo beegagua barî mbere. Wa gîkuundi bantû aakîo, barûûngamîîrîîtwe i Naasoni mwana wa Aminandabu. 15 Nethaneri mwana wa Suari n'we warûûngamîîrîîte mwîrîga wa Isakaari, 16 na Eriabu mwana wa Eroni n'we aarûûngamîîra mwîrîga wa Seburuni.
17 Rîru i rio îrema rîkaambûrwa, na antû ba mîîrîga ya Merari na Ngerisoni bara barîkamataga, bakaanjîîria rûgendo. 18 Bara bakaathiingatîîra i bara barî ruungu rwa kîbeendeera gîa gîkuundi kîra gîtongoragua i mwîrîga wa Rubeni, wa kîra gîkuundi kîrî bantû aakîo, barûûngamîîrîîtwe n'Erisuri mwana wa Sendeuri. 19 Serumieri mwana wa Surisandai arûûngamîîrîîte mwîrîga wa Simioni, 20 n'we Eriasabu mwana wa Ndeweri arûûngamîîrîîte mwîrîga wa Ngandi.
21 Rîru antû ba mwîrîga wa Koathi wa Arawi baumagarûke, bakamatîîte into bira bitheru. Na mbere bakinya kambîîni înu îîngî bakeethîra Îrema rîa Kûrîîkanaga rîambîîtwe. 22 Agu angî, bara barî ruungu rwa kîbeendeera gîa gîkuundi kîra gîtongoragua i mwîrîga wa Eburaimu baumagarûke, wa gîkuundi kîrî bantû aakîo, barûûngamîîrîîtwe n'Erisama mwana wa Amiundi 23 Ngamarieri mwana wa Pendasuri n'we warûûngamîîrîîte mwîrîga wa Manase, 24 na Abindani mwana wa Ngindioni n'we warûûngamîîrîîte mwîrîga wa Benjameni.
25 Na mûthia, antû bara barî ruungu rwa kîbeendeera gîa gîkundi kîra gîtongoreetue i mwîrîga wa Ndani, baathiingatîîra, wa gîkuundi kîrî bantû aakîo, kîrûûngamîîrîîtwe n'Ayeseri mwana wa Amisandaî. Gîkuundi gîkî i kîo kîarigagîria ikundi bira bingî. 26 Pagieri mwana wa Okirani n'we warûûngamîîrîîte mwîrîga wa Aseri 27 na Aira mwana wa Enani aarûngamîîra mwîrîga wa Nabutarî. 28 Ûgu i bu mîîrîga ya Isiraeri yaathiingatanaga îgiita rîonthe rîra baakûûraga nthaama, bakaanjîîria rûgendo.
29 Musa eera Obabu mwana wa Reueri, nthaka ya mûthonuue Njethiro, Mûmindiani, “Tûrî akubî kûthi gûntû kûra Mwathani augire agatûneenkera. N'aigire wîrane bwa kwingîia na gûtongia Isiraeri. Kwoogu ncû tûthiiyanie naawe na tûgakûgaûrîra ûtonga bwetû.” 30 Obabu amûcookeria, “Arî bai, niû i ngûcooka nthi nthîgûrû yetû na kîrî antû beetû.” 31 Musa n'we amwereka akîmwîraga, “Itû aba ûtigaatûtiganîrie, îthiiyania naati kaingo ûtwonagia tûyîra twa rwanda, woû wiyî rwanda rûrû bwega. 32 Na wona wathiiyania naati, tûkaagaana naawe ithaarimo bionthe bira Mwathani agaatûnenkera.”
33 Rîra antû baumire Sinai kîrîmaani kîra kîtheru, i baathiire rûgendo rwa ntugû ithatû. Îthandûkû rîa maathana ma kîrîîkanîro rîathiire rîrî mbere yao n'ûntû bwa kûbooneeria bantû ara baabatîîrue baamba marema. 34 Wa bûra baathiiyaga kuuma kambî îmwe kûthi îra îîngî n'wabu îtu rîa Mwathani rîathiiyaga rîrî îgûrû rîao magiita ma mûthenya. 35 Warîra rîonthe îthandûkû rîa maathana ma kîrîîkanîro rîaumagarûkaga, Musa augaga, “Ûkîîra Mwathani, ûnyagaarie anthû baaku na gwîngatie bara bakûthwîre.” 36 Wa rîarûngama augaga, “Mwathani, cooka gatîgatî ka magiri matatarîka ma mîciî ya Isiraeri.”