Pasaka
9
1 Mwathani n'arî akwaria na Musa arî rwanda rwa Sinai, mweri wa mbere wa mwanka wa îîrî kuuma antû ba Isiraeri bakuuma Miisiri. Amwîra, 2 “Ka antû ba Isiraeri bakeneere kîatho gîa Pasaka kagiita kara kabatîîrue, 3 nako i ntugû ya îkûmi na inya ya mweri ûyû riûa rîkîthûa, kûringana na mawatho ma kîo.” 4 Kwoogu Musa eera antû ba Isiraeri bakeneere kîatho gîa Pasaka, 5 na ntugû ya îkûmi na inya ya mweri wa mbere baarûtha waabu barî rwanda rwa Sinai. Antû ba Isiraeri baarûtha mantû monthe mara Mwathani aathîîte Musa. 6 Îndî i kwarî na antû bamwe baarî na mûgiro wa kûriingithia kiimba, na bataûmba gûkeneera Pasaka ntugû înu. Baathi kîrî Musa na Arûni ntugû wa înu 7 babeera, “Tûrî na mûgiro n'ûntû bwa kûriingithia kiimba, îndî i mbi îgaatûma tûrigîîrua kûrutîra Mwathani kîewa Aisiraeri babu baangî bakîmûrutîra?” 8 Musa abacookeria abeera, “Eteeraani mbaambe mbîgue bûra Mwathani akuuga îgûrû ya ûntû bûbu.”9 Mwathani aaria na Musa amwîra 10 eere antû ba Isiraeri, “Rîra ûmwe wa cienu kana wa nciarwa cienu akaagwatwa i mûgiro n'ûntû bwa kûriingithia kiimba, kana eegue arî rûgendooni na wîgue nwa akwenda gûkeneera Pasaka, 11 i bwîtîgîîrîîtue kûmîkeneera mweri ûmwe nyuma ya ntugû ya kûmîkeneera ya kûrûka, ûgoro bwa ntugû ya îkûmi na inya ya mweri wa îîrî. Bûmîkenagîîre na mîgaate îtarî îmiimbithie na tûmîtî tûrî gana. 12 Bûtikaaraarie irio bibu mwanka rûûni kana bûkaba maîndî ma nyamû îra bûkaathîînja. 13 Îndî muntû wonthe ûra atarî na mûgiro na atarî rûgendooni, ûra akaarega gûkeneera Pasaka, ûyu atiitaranîrua na antû baakwa kaîrî, n'ûntû atirandutîra kîewa îgiita rîra rîbatîîrue. We nwa we agaacookerwa n'ûthûûku bwake wengwa. 14 Ageni bakaaya gûtûûra gatîgatî keenu bakeenda gûkeneera Pasaka, babatîîrue kûmîkeneera bakîrûmagîîra mîbango na mawatho maayo. Kwoogu watho bûbû i bwa kûrûmîîrwa i bonthe, atûûri na ageni.”
Îtu îgûrû rîa Îrema rîa Kûrîîkanaga
15 Ntugû îra Îrema rîa Kûrîîkanaga rîenjîîrwe, îtu irîarîkunîkîîre. Kuuma ûgoro mwanka rûkîîrî îtu rîru rîonekanaga ta mwanki. 16 Na wa ûgu i bu rîathiire na mbere gûkara; îtu rîarîkunîkagîra mûthenya na ûtugû rîonekanaga ta mwanki. 17 Rîonthe rîra îtu rîaûkagîîra rîkarûûkîra îrema, antû ba Isiraeri i baathaamaga, na rîra îtu rîakinyûka îremaani, i baambaga marema kaîrî. 18 Baathaamaga Mwathani abaatha, na bakaamba marema Mwathani abaatha. Warîra rîonthe îtu rîakaraga rîrî îgûrû rîa îrema antû ba Isiraeri baakaraga kambîîni wa înu batakûthaama. 19 Wana rîra îtu rîakaraga îgûrû rîa îrema îgiita rîîraaya, antû ba Isiraeri i baathîkagîra Mwathani na bataathaamaga. 20 Magiita mamwe îtu rîakaraga îgûrû ya îrema ntugû igana ûna. Wana gwakara ta ûgu bataathaamaga kana bathi tatiga rîra Mwathani abeera. 21 Magiita mamwe îtu i rîakaraga rîrî îgûrû rîa îrema kuuma ûgoro mwanka rûûni rûkîîrî, na rîaûkîîra rûûni rûkîîrî nwarîo baakûûraga marema. Rîra rîonthe îtu rîaûkagîîra n'wîgue i mûthenya kana ûtugû nwaka baathaamaga. 22 Wana wegua i ntugû ciîrî, kana mweri, kana mwanka, bunka îtu rîtaûkîîrîîte antû ba Isiraeri batikîthaama, îndî rîaûkîîra i baathaamaga. 23 Baakûûraga na bakaamba marema bakîathîkagîra bûra Mwathani aabaathaga gûkûrûkîîra Musa.