Îrema rîarûgamua into biekîrwa ku
40
1 Mwathani eera Musa ata rî: 2 Ntugû ya mbere ya mweri wa mbere bûrûgamie îrema rîa Ngai. 3 Na bwîkîre îthandûkû rîa maathana ku, na bûcuurie gîtambaa kîthiîke îthaandûkû rîa maathana. 4 Na bûthûûngîrie meetha na bûbange into biayo îgûrû rîayo. Bûthûngîrie gîtugî gîa taa na bwaige taa inu îgûrû yakîo. 5 Bwaige kîthînjîro kîra kîa thaabu gîa kûbîîthia macoco mbere ya gîtambaa kîra kîgaûkanîîtie bantû ara atheru na Bantû Ara Atheru Mûno, ara îthandûkû rîa maathana rîaigagwa, na bûcuurie gîtambaa gîa kwinga mwîrîga wa îrema rîa Ngai. 6 Bwaige kîthînjîro kîa igongwana bia kûbîîthia na mwanki mbere ya mwîrîga wa îrema. 7 Bwaige kîraî gîa kûthambîra gatîgatî ka îrema rîa Ngai na kîthînjîro, na gwîkîre rûûyî gûku kîraîni. 8 Rîru bwirigîre into bibu na itambaa bia gûcuuria bia kîarago na bûcuurie gîtambaa gîa kwinga mwîrango wa kîarago.9 Ûcooke ûthûkie maguta ma gwîtûûranîria na gwîtûûrîrie îrema rîru rîa Ngai na into bira birî ku, ûbiathûre bituîke i biakwa na bikeegua birî biitheru. 10 Ûcooke gwîtûûrîrie maguta kîthînjîro kîa igongwana bia kûbîîthua na mwanki na into biakîo bionthe, ûtherie kîthînjîro gîku; na gîkeegua kîrî kîtheru nkûrûki. 11 Ûcooke gwîtûûrîrie kîraî gîku gîa kûthambîra maguta na bantû ara gîtûûgagîrua, na ûbiathûre. 12 Rîru ûreete Arûni na nthaka ciake mwîrîgaani wa îrema rîa Ngai na ûbathaambie na rûûyî, 13 gwîkîre Arûni nguo ira ntheru cia kîûthînjîri, ûmwîtûûrîrie maguta na ûmwathûre kaingo aantûmîkîra ta mûthînjîri wa Ngai. 14 Ûcooke ûthûkie nthaka ciake wanacio ûciîkîre makanjû. 15 Na ûbeetûûrîrie maguta wa ta bûra gwetûûrîîrie îthe, kaingo baantûmîkîra barî athînjîri; na gwîtûûrîrua maguta kwao gûgaatûma nciarwa ciao ituîka athînjîri baakwa nciarwani ciao cionthe.
16 Musa aarûtha bunthe bûra Mwathani aamwathîîte. 17 Kwoogu ntugû ya mbere ya mweri wa mbere mwankaani wa îîrî kuuma bakuuma Miisiri, îrema rîa Ngai rîenjîrwa. 18 Musa eenjîra îrema; aataandîka gîkinyithio, aarûngamia mbureemu, acigwatithania na mata, na aarûngamia itugî biarîo. 19 Arîkunîkîra na njûo ira ntagute, wa ta bûra Mwathani aamwathîîte.
20 Rîru aathûkia mbaariû cia maiga ira ciandîkîîtwe maathana mara îkûmi ameekîra îthandûkûûni, aathûngîria mîtî îra ya kûrîkamata iguatûûni bira biarî îthandûkûûni rîru, na arîkunîka na gîtî gîa kîao; 21 arîthûngîria îremaani rîa Ngai na acuuria gîtambaa kîa ndeeni gîa kûrîguîkîra rîtikoonawe, wa ta bûra Mwathani aathîîte Musa. 22 Musa aiga meetha îremaani rîa Ngai, mbarî ya neegûrû ya îrema, nja ya gîtambaa kîa ndeeni kîra gîcuuragua. 23 Rîru aigîîra mûgaate bwega îgûrû ya meetha mbere ya Mwathani, wa ta bûra Mwathani aathîîte Musa. 24 Aiga gîtugî gîa taa îremaani rîa Ngai mbarî ya naiti, kîraitheene na meetha, 25 na aatûûgîria taa inu gîtugîîni mbere ya Mwathani, wa ta bûra Mwathani aathîîte Musa. 26 Musa aiga kîthînjîro kîra kîa thaabu gîa kûbîîthîria macoco mbere ya gîtambaa kîra gîa gûcuuria, 27 na abîîthia macoco mara manunkaga bwega, wa ta bûra Mwathani aathîîte Musa. 28 Acuuria gîtambaa kîra gîcuuragua mwîrîgaani wa îrema rîa Ngai. 29 Na aiga kîthînjîro kîa igongwana bira bibîîthagua mwîrîgaani wa îrema rîru rîa Ngai, na aaruta kîgongwana gîa kûbîîthia na kîgongwana kîa irio wa ta bûra Mwathani aamwathîîte. 30 Aiga kîraî gîa kûthambîra gatîgatî ka îrema rîru rîa Ngai na kîthînjîro, na eekîra rûûyî ku rwa kûthamba. 31 Musa, Arûni na nthaka ciake, baatûmîîre kîraî gîku kûthamba njara ciao na magûrû. 32 Rîonthe rîra baathûngagîra îremaani, kana kîthînjîrooni, i baathambaga wa ta bûra Mwathani aathîîte Musa. 33 Musa n'aakire gîkaro kûthiûrûkîîra îrema rîa Ngai amwe na kîthînjîro, na acuuria gîtambaa kîra gîcuuragua mwîrîgaani wa gîkaro gîku. Kwoogu Musa aarîîkia ngûgî yonthe.
Mwago wa Mwathani
34 Rîru îtu rîaguîka îrema rîa Ngai, na mwago wa Mwathani waûyûra ku. 35 Musa aaremwa i kûthûngîra îremaani rîru rîa Ngai, n'ûntû îtu i rîarîkunîkîîte, na mwago wa Mwathani nwaûyûrîîte ku. 36 Rîra îtu rîru rîaûkagîîra rîkarûûkîra îrema rîru rîa Ngai, antû ba Isiraeri i baathiiyaga mbere na rûgendo rwao: 37 îndî îtu rîru rîgîkara rîrî îgûrû rîa îrema, batikîthaama, baakaraga waagu beeteereete mwanka rîra rîgaûkîîra. 38 Rûgendooni rwa antû ba Isiraeri runthe, îtu rîa Mwathani rîegagua rîrî îgûrû ya îrema rîa Ngai mûthenya, na ûtugû rîegagua rîrî na mwanki, antû ba Isiraeri bonthe bakarîonaga.