Nguo cia Athînjîri ba Ngai
39
1 Athînjîri ba Ngai i baatumîîrwe nguo inthongi cia ndigi cia rangi ya mburuu, cia rangi ya ûkûyû na cia rangi întuune, cia kûrutaga ngûgî nacio Bantû ara Atheru; baarûthîra Arûni nguo cia ûthînjîri wa ta bûra Mwathani aathîîte Musa. 2 Baarûtha ebondi bagîtûmagîra ndigi cia thaabu, cia rangi ya mburuu, cia rangi ya ûkûyû na cia rangi întuune na gatani înthongi. 3 Baatura kathathaû ga kabaati ka thaabu bagakaa nkao cia gûtumanîria na ndigi ira cia rangi ya mburuu, na cia rangi ya ûkûyû, na cia rangi întuune, amwe na gatani îra mbokothe bwega, itumwa na waara bûûnene. 4 Baarûthîra mîcibi yaibarî biîrî bia ituro îîrî ya ebondi yaagwatithanua na mîthia yaayo îrî îîrî. 5 Mûcibi ûra gwatumîîtwe bwega mûno ûra warûthîîtwe na into wa bibu biarûthîîte ebondi. Gwatumîîtwe na ndigi cia thaabu, ya mburuu, ya ûkûyû na întuune; na gatani înthongi wa ta bûra Mwathani aathîîte Musa. 6 Baathuuranîra twiga twa goro tûra twîtagwa Carindoniki na batuîkîra tûbureemuuni twa thaabu. Mariîtwa ma nthaka ira îkûmi na ciîrî cia Isiraeri macaîtwe na wara mûno îgûrû ya maiga mamu. 7 Baacooka baagwatithania maiga mamu na mîcibi ya kîbara ya ebondi wa ta bûra Mwathani aathîîte Musa, kaingo Mwathani akara akîririkanaga antû ba Isiraeri.Nguo ya kîbara
8 Baacooka baarûtha nguo ya kîbara na waara mûno wa ta bûra ebondi yaarûthîîtwe, na ndigi cia thaabu, ya mburuu, cia ûkûyû, na întuune, itumanîrîîtue na gatani îra nthongi. 9 Yaarî na ûraaya na wariî bûganeene bwa inci kenda na îkûûnjîîtwe. 10 Yaarî na mîstaarî îna ya maiga ma goro. Mûstaarî wa mbere wegua ûrî na rubi, topaci na beriri, 11 mûstaarî wa îîrî wegua ûrî na takwici, cabire na emerandi; 12 mûstaarî wa îthatû wegua ûrî na njacithi, agîte na amethisito; 13 mûstaarî wa îna wegua ûrî na kiricorite, carindioni na njacipa. Na maiga mama maarûmagîîrua îgûrû ya thaabu. 14 Warîra iiga rîegagua rîandîkîîtwe riîtwa rîa nthaka îmwe ya Njakubu kûrûngamîîra mîîrîga ya Isiraeri. 15 Baacooka baarûthîra nguo înu ya kîbara mîkathî îkari ta mîîndo ya thaabu îtaunganîîtue na gîntû kîngî. 16 Baarûtha tûbureemu twîrî twa thaabu na iguatû biîrî bia thaabu babirûmîîria mîthiani îîrî ya nguo înu ya kîbara. 17 Boogeera mîkathî îra ya thaabu iguatûûni bibu birî biîrî mîthiani ya nguo înu ya kîbara, 18 na mîthia îra îîngî ya mîkathî înu bamîogeera tûbureemuuni tûra twîrî, bagîtuoganagîîria na mîcibi îra ya ituro ya mbarî ya mbere ya ebondi. 19 Rîru baarûtha iguatû bia thaabu biîrî bamîrûmîîria mîthiani ya naiti ya nguo ya kîbara na mbarî ya ndeeni biraitheene na mûcibi wa ebondi. 20 Baarûtha iguatû biîrî bia thaabu babirûmîîria kîrî ebondi îgûrû ya mîcibi înu ya gîturo ya ebondi îgwatithanîîtue na ebondi îra ngemie. 21 Na wa ta bûra Mwathani aathanîîte booganîîria iguatû na mîthia ya naiti ya nguo ya kîbara na iguatû bia ebondi bagîtûmagîra mûkanda wa rangi ya mburuu, kaingo nguo înu ya kîbara îtikaarûgarûge yuuma kîrî ebondi.
Nguo ira ciingî cia Athînjîri ba Ngai
22 Nguo îndaaya îra îîgagua îrî ruungu rwa ebondi yarûthwa na gîtambaa kîa rangi ya mburuu. 23 Yeegua îrî na mwanya wa kûthûngagîîria kîongo gatîgatî. Mwanya ûyu wa kûthûngagîîria kîongo watîrîtwa giria ûkaaya gûteembûka. 24 Beekîra maûa makari ta matunda ma kûngûmanga ma rangi ya mburuu, rangi ya ûkûyû na rûrigi rûûtuune mûthia wa nguo înu na gatani înthongi îmbokothe. 25 Baarûtha nkengere cia thaabu îtarî mbunganie na gîntû kîngî, na baciîkîra gatîgatî ka maûa mamu makari ta matunda ma kûngûmanga; nkengere ya thaabu, kûngûmanga, nkeengere ya thaabu, kûngûmanga 26 nkengere ya thaabu ûkathiingatia kûngûmanga, nkengere ya thaabu ûkathiingatia kûngûmanga ithiûrûkîrie mûthia wa naiti unthe wa nguo înu, Arûni ageekagîra nguo înu rîra agûtûmîka ta mûthînjîri.
27 Baarûthîra Arûni na nthaka ciake kanjû cia gatani îra nthongi, 28 na iremba bia gatani îra nthongi, na nkoobia cia gatani îra nthongi na curuarî cia gatani îra nthongi, 29 na mîcibi yarûthwa na gatani îra nthongi îgemeetue na ndigi cia rangi ya mburuu, ya ûkûyû, na rûrigi rûûtuune, wa ta bûra Mwathani aathîîte Musa. 30 Baacooka baarûtha kabaati ka thaabu îtaunganîîtue na gîntû kîngî, baandîka gacuumaani gaku, “Ûyû n'we mûtheru aathûrîrîîtwe Mwathani.” 31 Bakoogeera mbarî ya mbere ya kîremba kîa Arûni bagîtûmagîra mûkanda wa rangi ya mburuu, wa ta bûra Mwathani aathîîte Musa.
Ngûgî yaarîîkia
32 Kwoogu antû ba Isiraeri baarîîkia kûrûtha into bionthe wa ta bûra Mwathani aathîîte Musa birûthwe. 33 Baareetera Musa îrema rîa Ngai na into biarîo bionthe, tûpogoro twarîo, mbureemu, ciarîo mata, itugî, na ikinyithio biarîo, 34 kîgoora kîra gîa kûguîkîra îgûrû kîa rûûo rwa ng'ondu rûrî rwake rangi întuune, gîku kîngî kîa njûo cia nyamû ira nene cia îria, na gîtambaa gîa gûcuuria; 35 îthandûkû rîa maathana rîrî na mîtî ya kûrîkamataga, na gîtî gîa kîao; 36 meetha na into bionthe biayo, amwe na mûgaate ûra mûtheru; 37 gîtugî kîa thaabu na taa ciakîo na into biakîo bionthe; tûkombe twakîo na maguta ma gwîkîra taani n'ûntû bwa werû; 38 kîthînjîro kîa thaabu; maguta ma gwakana; macoco mara manuunkaga bwega; itambaa bia gûcuuria bia mwîrîga wa îrema; 39 kîthînjîro kîa rûthuku; rûtara rûra rûrûthîîtwe na rûthuku; mîtî ya gûgîkamata na into bibu bingî biakîo bionthe; kîraî gîa kûthambîra, bantû ara gîtûûgagîrua; 40 itambaa bia gûcuuria bia ome, itugî biakîo, na ikinyithio, na gîtambaa gîa gûcuuria mwîrîgaani wa ome, mîkanda yakîo na tûtugî twakîo; na into bionthe bia gûtûmîra îremaani rîa Ngai, 41 nguo ira ciatumîîtwe bwega mûno cia gwîkîrwa n'athînjîri rîra bagûtûmîka Bantû ara Atheru, na i cio nguo ira ntheru Arûni na aana baake beekagîra rîra bakûruta ngûgî ya ûthînjîri. 42 Antû ba Isiraeri baarutîîte ngûgî yonthe wa ta bûra Mwathani aathîîte Musa. 43 Musa akûraitha oona baarutîîte ngûgî yonthe wa ta bûra Mwathani aamwathîîte, abathaarima.