Nguo cia ûthînjîri
28
1 Îta mûruanyûkwe Arûni na aana baake Nandabu, Abiu, Eriasari na Ithamarû. Baathûre kuuma kîrî antû bara bangî ba Isiraeri kaingo baantûmîkîra barî athînjîri baakwa. 2 Rûthîra mûruanyûkwe Arûni nguo cia mûthînjîri kaingo eegua arî na îgweta na gîtîîyo. 3 Îra antû bonthe bara barî na wara, bara neenkereete ûûgî mantûûni ta mamu, batumîre Arûni nguo, kaingo akaathûrwa arî mûthînjîri wa gûntûmîkagîra. 4 Beere bamûrûthîre nguo ya kîbara, ebondi, nguo îndaaya, kanjû îngemie bwega îrî na marooro, kîremba na mûcibi. Babatîîrue batumîra Arûni na aana baake nguo inu kaingo bantûmîkagîra barî athînjîri baakwa. 5 Ûbeere batûmîre ndigi cia rangi ya thaabu, ya mburuu, ya ûkûyû na întuune kûrûtha gîtambaa kîîthongi.Ebondi
6 Batume ebondi ya gîtambaa kîra kîîthongi kîîgemie na waara bagîtûmagîra ndigi cia rangi ya mburuu, rangi ya ûkûyû, rûrigi rûûtuune na rûrigi rwa thaabu. 7 Îkeegua îrî na ibarî biîrî bia ituro, bigwatithanîrîîtue mîthiani yaayo îrî îîrî bûra îkeegua îrî gîntû kîgwateeene. 8 N'îbatîîrue îtumanîîrua na mûcibi ûrûthîîtwe na into wa bibu birûthîîte ebondi, igwatane bwega mwanka îkare ta gîntû kîmwe. 9 Ûthûkie twiga twîrî twa goro tûra twîtagwa Carindoniki wandîke mariîtwa ma nthaka ira îkûmi na ciîrî cia Isiraeri îgûrû rîatu. 10 Wa kara kaiga gakeegua karî na mariîtwa mathanthatû mathiingateene kûringana na ûkûrû bwao. 11 Ceria muntû ûra wiyî gûcaa maiga ma goro acae mariîtwa mamu ma nthaka cia Njakubu îgûrû rîa twiga tûtu, naawe utuîkîre tûbureemuuni tûrûthîîtwe na thaabu. 12 Ûtuîkîre mîcibiini îra ya ebondi kûrûngamîîra mîîrîga îra îkûmi na îîrî ya Isiraeri. Ûgu i bu Arûni agaakamataga mariîtwa ma antû ba Isiraeri iturooni biake, naani Mwathani, ngaakara nkîririkanaga antû baakwa. 13 Ûtume tûbureemu twîrî twa thaabu, 14 na tûmîkathî twîrî twa thaabu îra ntheru, tûkari ta mîîndo rîru ûtumîîre tûmîkathî tûtu tûbureemuuni tûtu.
Kaguo ga kîbara
15 Rûthîra mûthînjîri ûra mûnene wa Ngai nguo ya kîbara kaingo akaamîtûmagîra kûmenya bûra Ngai akwenda. Îbatîîrue îrûthwa na into ta bira birûthîîte ebondi bagîtûmagîra gatani înthongi îgemeetue na ndigi cia rangi ya mburuu, rangi ya ûkûyû, rûrigi rûûtuune na rûrigi rwa thaabu. 16 Îîgue îganeene nteere cionthe îrî inci kenda na îkûûnjîîtwe. 17 Ûrûmîîrie nguo înu mîstaarî îna ya maiga ma goro. Mûstaarî wa mbere wîgue ûrî na rubi, topaci na beriri, 18 mûstaarî wa îîrî wîgue ûrî na takwici, cabire na emerandi; 19 mûstaarî wa îthatû wîgue ûrî na njacithi, agîte na amethisito; 20 na mûstaarî wa îna wîgue ûrî na kiricorite, carindioni na njacipa. Na maiga mama makaarûmagîîrua îgûrû rîa thaabu. 21 Warîra iiga rîkeegagua rîcaîtwe riîtwa rîa nthaka îmwe ya Njakubu kûrûngamîîra mîîrîga ya Isiraeri. 22 Ûcooke ûrûthîre nguo înu ya kîbara mîkathî îkari ta mîîndo ya thaabu îtaunganîîtue na gîntû kîngî. 23 Ûrûthe iguatû biîrî bia thaabu ûbirûmîîrie mîthiani îîrî ya nguo înu ya kîbara. 24 Wogeere mîkathî îra ya thaabu iguatûûni bibu birî mîthiani ya nguo înu ya kîbara. 25 Mîthia îra îîngî ya mîkathî înu ûmîogeere tûbureemuuni tûra twîrî, ûgîtuoganagîîria na mîcibi îra ya ituro ya mbarî ya mbere ya ebondi. 26 Rîru ûrûthe iguatû bia thaabu biîrî ûbitumîîre mîthiani ya naiti ya nguo ya kîbara na mbarî ya ndeeni iraitheene na mûcibi wa ebondi. 27 Ûrûthe iguatû biîrî bia thaabu ûbitumîîre kîrî mîcibi înu ya ituro ya ebondi, îgûrû ya ara mûcibi wa kauna ûgwatithanîrîtue na wa ebondi. 28 Woganîîrie iguatû bia mîthia ya naiti ya nguo ya kîbara na iguatû bia ebondi ûgîtûmagîra mûkanda wa rangi ya mburuu, kaingo nguo înu ya kîbara îtikaarûgarûge yuuma kîrî ebondi.
29 “Rîra Arûni akaathûngagîra Antû ara Atheru, akeegagua eekîrîîte nguo ya kîbara. Nguo înu, îkeegua îrî na mariîtwa ma mîîrîga ya Isiraeri akubî na nkoro yake, kaingo Niû Mwathani, ngaakara nkîririkanaga antû baakwa. 30 Wîkîre Urimu na Thumimua mûbukooni wa nguo ya kîbara, ikamatagîrwe aakubî na nkoro ya Arûni rîra athiîte mbere ya Mwathani. Kwoogu, Arûni akeegagua akamatîîte into bia gûtûma amenya bûra Mwathani akwenda îgûrû ya antû baake, rîra rîonthe akûthi mbere ya Mwathani.
Nguo iingî cia mûthînjîrî wa Ngai
31 “Ûtume îra ndaaya îîgagua îrî ruungu rwa ebondi, na gîtambaa kîa rangi ya mburuu. 32 Îîgue îrî na mwanya wa kûthûngagîîria kîongo gatîgatî. Mwanya ûyu wa kûthûngagîîria kîongo ûbatîîrue ûtîrîtwa giria ûkaaya gûteembûka. 33 Mûthiani wa naiti wa nguo înu ûmîthiûrûûkîîrie na maûa makari ta matunda ma mûkûmanga ma rangi ya mburuu, rangi ya ûkûyû na rûrigi rûûtuune, ûkîmaathûranaga na nkeengere cia thaabu. 34 Ûgeekagîra nkengere ya thaabu, ûkathiingatia kûngûmanga, nkengere ya thaabu, ûkathiingatia kûngûmanga; ûthiûrûûkîrie mûthia wa naiti unthe wa nguo înu. 35 Arûni ageekagîra nguo înu rîra agûtûmîka ta mûthînjîri. Nkeengere îkeeguîkaga rîra akûthûûngîra na akiumagarûka Bantû ara Atheru mbere ya Mwathani, kaingo atakua. 36 Ûcooke ûrûthe kabaati ka thaabu îra ntheru mûno, ûcae gacuumaani gaku ûûgû, ‘Ûyû n'we mûtheru aathûrîrîîtwe Mwathani.’ 37 Ûkoogeere mbarî ya mbere ya kîremba kîa Arûni ûgîtûmagîra kamûkanda ka rangi ya mburuu. 38 Kabaati gaku gagaakaraga karî kîreeraani kîa Arûni rîonthe, kwonania akûthûkia meeyia monthe mara antû ba Isiraeri barûthîîte bakîîndutîra igongwana, na ngeetîgagîîria igongwana bionthe bira bakaandutagîra. 39 Ûtumîre Arûni kanjû ya gatani îra nthongi, kîremba gîa gatani îra nthongi na mûcibi ûmûgemie bwega. 40 Ûrûthîre nthaka cia Arûni kanjû, mîcibi na nkoobia cia mwanya kaingo beegua barî na îgweta na gîtîîyo n'ûntû n'athînjîri ba Ngai. 41 Wîkîre Arûni na aana baake kanjû inu rîru ûbaake maguta ma mîceituuni ûbaathûre na ûbatherie. Ûbathûngîrie ngûgîîni kaingo baandutagîra ngûgî barî athînjîri. 42 Ûbatumîre curuarî cia ndeeni cia gîtambaa kîra kîthongi ikûbakunîkîra kuuma kauna mwanka bierooni batikoonwe ûtheri. 43 Bageekagîra curuarî inu rîonthe rîra bakûthûûngîra îremaani ria Ngai, rîra bagûtûmîka kîthînjîrooni kana bakîthûûngîra Bantû ara Atheru. Baarega kûrûtha ûgu i bakaabîtia na bagaakua. Watho bûbû bûkaathingatawa rîonthe n'Arûni na nciarwa ciake.”