Kîthînjîro gîa kîgongwana gîa kûbîîthia
27
1 “Ûrûthe kîthînjîro na mûtî wa mûgaa, gîkeegua kîganeene mbarî cionthe, ûraaya bwa biiti mûgwanja na nucu na wariî bwa biiti mûgwanja na nucu na ûraaya bwa wîtia biiti inya na nucu. 2 Na ûrûthe gîntû gîkari ta rûgoci kîrî weera koona irî inya cia kîthînjîro kaingo ngoci na kîthînjîro ciîgua cionthe irî gîntû kîmwe. Rîru ûkaande kîthînjîro na ngoci inu cia kîo na rûthuku. 3 Na ûrûthe nyûngû cia kûruta muu, iciko bia mûthetu, iraî, mîkua îmîmatu ya kûruta nyama, na tûraî twa mwanki na bionthe bikaarûthwa na rûthuku. 4 Na ûcooke ûrûthe rûtara rwa rûthuku, ûrwîkîre kîguatû kîa rûgambi rwa rûthuku kîrî wa kîra koona. 5 Aruîkîra itiiti ya rûtheng'eeng'a rwa kîthînjîro rûkîîndamaga rûgakinya gatîgatî ka ûraaya bwa kîthînjîro. 6 Na ûcooke ûrûthîre kîthînjîro gîku mîtî ya gûkamata, n'yo îkeegua îrî ya mûgaa, na ûmîkaande na rûthuku; 7 na n'yo îkoorokerua iguatûûni, kaingo îîgua îrî îgûrû nteere irî ciîrî cia kîthînjîro, rîra gîkamatîîtwe. 8 Îrûthwe îrî ya mbaaû, îrî na muunguru ndeeni; wa ta bûra woniirue kîrîmaani, i bu bakaamîrûtha.Ome ya îrema rîru rîa Ngai
9 “Rîru ûcooke ûrûthe ome ya gîkaro gîku. Rûteere rwa iti, wîgue gûcuurîîtue itambaa birûthîîtwe na ndigi inthongi mûno. Itambaa bibu ûkeegua bitambûrûkîîte biiti îgana rîa mîrongo îtaano. 10 Bikaawatîîrwa n'itugî mîrongo îîrî na ikinyithio biabio mîrongo îîrî bionthe birûthîîtwe na rûthuku, îndi tûpogoro na mata birûthîîtwe na fetha. 11 Nwabu ûkeegua gûkari woogu rûteere rwa îgûrû noome; itambaa bia biiti îgana na mîrongo îtaano bigwetue n'itugî mîrongo îîrî biîkîrîtwe ikinyithioni bia rûthuku, na tûpogoro twa fetha na mata ma fetha. 12 Na itambaa bia rûteere rwa ûthwîro bwa riûa mûthiani wa ome înu, ûkeegua birî bia biiti mîrongo mûgwanja na itaano ûraaya bitiirîîtwe n'itugî îkûmi biîkîrîtwe ikinyithio îkûmi. 13 Na rûteere rwa uumîîro bwa riûa kinya ru ûkeegua rûrî na ûraaya bwa biiti mîrongo mûgwanja na itaano. 14 Itambaa bira bigaacuurua rûteere rwa mwîrîga bikeegua birî bia ûraaya bwa biiti mîrongo îîrî na ciîrî na nucu, bigwetwe n'itugî bithatû bikinyithîîtue ikinyithioni bithatû 15 Itambaa bia rûteere rûra rûngî kinya bio ûkeegua birî bia ûraaya bwa biiti mîrongo îîrî na ciîrî na nucu, bigwetwe n'itugî bithatû bikinyithîîtue ikinyithioni bithatû.
16 “Mwîrîga wa ome wa gîkaro gîku, ûcuurie gîtambaa kîa ûraaya bwa biiti mîrongo îthatû. Kîrûthe na gîtambaa na gatani îra nthongi, na ûkîgemie na mûgemerie ûmûthongi na ndigi cia mburuu, rangi ya ûkûyû, na ndigi inthongi imbokothe. Ikagwatithanua na itugî bina biîkîrîîtwe ikinyithio bina. 17 Na itugî bionthe bira bithiûrûkîîrîîte ome nwa mwanka bigwatithanue na mata ma fetha. Tûpogoro twabio tûkeegua tûrûthîîtwe na fetha. Ikinyithio nabio bikeegua birî bia rûthuku. 18 Kwoogu ome ya gîkaro gîku, akeegua arî na ûraaya bwa biiti îgana na mîrongo îtaano, wariî bwa biiti mîrongo mûgwanja na itaano na ûraaya bwa kuuma nthî wîtia i biiti mûgwanja na nucu. Itambaa bia gûcuuria bantû agu bikeegua birî bia gîtambaa kîîthongi mûno na ikinyithio biîgue birî bia rûthuku. 19 Into bionthe bira bigaatûmagîrwa Îremaani na tûtugî twa îrema na ome ya gîkaro gîku, tûbatîîrue tûrûthwa na rûthuku.
Maguta ma gwîkîra taani
20 “Waathe antû ba Isiraeri bakûreetere maguta mara mathongi mûno ma mîceituuni ma gwîkîra taani kaingo taa ikaraga igîankanaga rîonthe. 21 Îremaani rîru rîa Ngai mbere ya gîtambaa kîra kîgaakanîîtie Bantû ara Atheru na Bantû ara Atheru Mûno, ara îthandûkû rîa maathana rîaigagwa, Arûni na nthaka ciake bakaamenyagîîra boone taa îgaakara îgîankanaga kuuma ûgoro mwanka rûûni rûkîîrî. Bûbû i watho bwa gûtûûra bûthiingatagwa n'antû ba Isiraeri na nciarwa ciao cionthe.”