Kûmenyeera taa
24
1 Mwathani aaria na Musa amwîra, 2 “Atha antû ba Isiraeri bakûretagîre maguta ma mîceituuni mara mathongi mûno ma taa cia îrema rîa kûrîîkanaga kaingo taa ikaraga igîankanaga rîonthe. 3 Taa inu irî itugîîni bia thaabu îra îtaunganîîtue na gîntû kîngî. Arûni akaamenyagîîra taa ira irî ndeeni ya Îrema rîa Kûrîîkanaga ome ya gîtambaa kîra kîgaûkanîîtie îrema. Taa inu igaakaraga îgîakanaga kuuma ûgoro mwanka rûûni rûkîîrî. Bûbu i watho bwa kûthingatagwa i nciarwa cienu cionthe. 4 Taa inu irî mbere ya Mwathani itugîîni bia thaabu îra îtaunganîîtue na gîntû kîngî ikaamenyagîîrwa rîonthe.Mîgaate îmîtheru ya Îrema rîa Kûrîîkanaga
5 “Thûkia mûtu ûmwinyu ûkaande mîgaate îkûmi na îîrî. Woora mûgaate ûgaakandaga na gacuncî kamwe kuuma kîrî itaano ka ndebe ya mûtu. 6 Banga mîgaate înu mîtûrûtûrû îîrî îgûrû rîa meetha îra îrûthîîtwe na thaabu îra îrî mbere ya Mwathani woora mûtûrûtûrû ûbatîîrue wîgua ûrî na mîgaate îthanthatû. 7 Aigîîra macoco maatheru îgûrû rîa woora mûtûrûtûrû wa mîgaate. Macoco mamu i mo makaabîîthua bantû a mîgaate ta kîgongwana gîa kûbîîthua na mwanki kîrî Mwathani. 8 Weera ntugû ya Sabatû mîgaate îmîyerû îkaabangawa meethaani rîonthe nciarwani cionthe cia Isiraeri kîrî kîrîîkanîro gîa gûtûûra gîetû nabo. 9 Mîgaate îra mîkûrû n'ya Arûni na nciarwa ciake, na n'ûntû mîgaate îno i gîcuncî gîa kîgongwana kîra kîtheru mûno kîra kîrutagîrwa Mwathani na njîra ya kûbîîthia na mwanki. Kîbatîîrue kîrîîrwa bantû atheru. I rûgai rwao rîonthe.”
Îkaanûkia n'ûntû bwa kûruma Ngai
10 I kwarî na muntû ûmwe warî na îthe Mûmiisiri na gina Mûisiraeri. Ntugû îmwe naathiire kîrî antû ba Isiraeri baanjîîria kûrûa na Mûisiraeri ûmwe. 11 Bakîrûaga muntû ûyu gina aarî Mûisiraeri aaruma riîtwa rîa Mwathani. (Gina wa muntû ûyu eetagwa Seromithi mwarî wa Ndibiri wa mwîrîga wa Ndani.) Kwoogu antû bamûgwata bamwira kîrî Musa. 12 Muntû ûyu aingîrwa bantû antû beeteereete beegua bûra Ngai akaabeera barûthe na muntû ûyu.
13 Mûthiani Mwathani eera Musa ata rî, 14 “Umagariani muntû ûyu ome ya kambî. Na bara bonthe beegiirue muntû ûyu akîrumana baigîîre njara ciao îgûrû rîa kîongo gîake, îrî njîra ya kûruta ûkûûyî atî muntû ûyu neeyîîtie. Nyuma ya ûgu antû bonthe baûrage muntû ûyu na maiga. 15 Rîru ûcooke wîre antû ba Isiraeri ata rî, ‘Muntû kinya ûrîkû ûra akaaruma Ngai, agaacookwa n'ûthûûku bwake. 16 Muntû kinya ûrîkû ûra akaaruma Ngai, nakaûragwa. Antû bonthe ba Isiraeri bakamûûraga na maiga. Îtikûmakania wegua i Mûisiraeri kana i mûgeni ûra atwîre gatîgatîîni keenu.
17 “ ‘Muntû ûra akaûragana nwe nakaûragwa. 18 Muntû aûraga nyamû ya muntû ûra ûngî nwe gaakaarea muntû ûyu na nyamû îîngî îrî mwoyo, nyamû îrî mwoyo ya kûrea nyamû îra yûûragirwe. 19 Muntû ûra agaatoonya ûra ûngî nwe nagaatoonywa woogu. 20 Wegua muntû i ka auna muntû ûra ûngî mwîndî nwe abatîîrue aunwa mwîndî, aatûrana riitho nwe atûrwe riitho, aakûûrana îgego nwe akûûrwe îgego. Wa ruoro rûra muntû ageekanîra nwe i ru abatîîrue eekîrwa rîrî îkaanûkia. 21 Muntû ûra akaûraga nyamû yaitha gakaarea na nyamû yake îndî ûra akaûragana gakaûragwa. 22 Bûbû i watho bwa kûbwatha bwinthe bwîgue bûrî Aisiraeri kana bûrî ageni bara batûûraga amwe na biû, I niû Mwathani Ngai wenu.’ ”
23 Rîra Musa eerire antû ba Isiraeri ûgu, baumagaria muntû ûyu ome ya kambî bamûûraga na maiga, baarûtha wa ta bûra Mwathani aathîîte Musa.