Mwanka wa mînda kûnogoka
(Kûri 15:1-11)
25
1 Rîra Musa aarî kîrîmaani gîa sinai Mwathani aariirie nwe amwîra, 2 “Aria na antû ba Isiraeri ûbeere ata rî, ‘Rîra bûkaathûngîra nthîgûrû îra nkûbûnenkera, bûbatîîrue gûntîîya na njîra ya kûrega kûûnga mînda yenu woora mwanka wa mûgwanja. 3 Gwa kagiita ka mîanka îthanthatû bûkaandaga mînda yenu ya mîcabiibû na bûkathereria mîcabiibû yenu na bûgaketha maketha meenu. 4 Îndî mwanka wa mûgwanja i mwanka wa mînda yenu kûnogoka, mwanka wa gûtîîya Mwathani. Bûtikaande mînda yenu kana bûthereria mîcabiibû yenu. 5 Wana bûtigaakethe irio bira bikauma naagu ngûndûûni biongwa kana bûketha ncabiibû ira igaaciarwa i mîcabiibû înu îtarî mîthererie, n'ûntû ûyu i mwanka wa nthîgûrû yenu kûnogoka kûrû. 6 Biakûrîa bira bikûrîrîîte kîthakaani bikabûgana biigû na nkombo cienu na aandîkwa beenu na ageni bara bûtwîre nabo 7 na nyamû cia ûrîîthi bwenu na nyamû cia kîthaka ira irî nthîgûrû yenu. Kîra kîonthe gîkauma naagu kîthakaani nwa kîrîîgwe.Mwanka wa gûcookanîîrua
8 “ ‘Bûgaataraga mîanka mûgwanja maita mûgwanja. N'yo înu i mîanka mîrongo îna na kenda. 9 Rîru rûgoci rûringwe nainya nthîgûrû yenu yonthe ntugû ya îkûmi ya mweri wa mûgwanja na n'yo ntugû ya kûthambua meeyia. 10 Bûkaathûrîra Mwathani mwanka wa mîrongo îtaano na buugîîrie kûthaûrwa kîrî antû bonthe ba nthîgûrû yenu. Ûyu i mwanka wa gûcookanîria, rîra into bionthe bira biendeetue bigaacookerua bara beendeetie bio kana nciarwa ciao, nkombo îra yeendeetue îgaacooka kwao mûciî ara yaciarîîrwe îtakûrîua. 11 Mwanka wa mîrongo îtaano i mwanka wa gûcookanîîrua, bûtikaande mînda yenu kana bûketha irio bira bikauma ngûndûûni biongwa kana bûketha ncabiibû ira igaaciarwa i mîcabiibû înu îtarî mîthererie. 12 Mwanka ûyu unthe i mwanka ûmûtheru wenu wa gûcookanîîrua, na bûkaarîîyaga bira bigaakûra naagu kîthakaani.
13 “ ‘Mwankaani ûyû ithaka bionthe bira biendeetue bigaacookerua eene boongwa. 14 Kwoogu rîra ûkwenderia kana ûkûgûrîra Mûisiraeri ûra ûngî mûnda, ûtikeende kûmwinyîîria. 15 Ûgûri bwa mûnda bûbatîîrue bûtuîgwa kûringana na mîanka îra muntû akaarîma mûnda ûyu na maketha mara agaaketha mbere ya mwanka wa gûcookanîria ûkinya. 16 Ûkeegua mîanka n'îmiingî ûgûri bûbatîîrue bwîgua bûrî bûûnene, îndî wegua mîanka n'îmîkai ûgûri wanabu bwîgue bûrî bûûkai, n'ûntû kîra kîongwa muntû eegagua akîendia i kîthimi kîa maketha mara mûnda ûyu ûkauma. 17 Bûtikeende kwinyanîîria îndî bûtîîye Ngai wenu. I niû Mwathani Ngai wenu.
18 “ ‘Athîkîraani mawatho na maathana maakwa kaingo bûgaatûûra nthîgûrû îno mayîîga. 19 N'yo nthîgûrû îgaaciara irio na bûkeegua bûrî na biakûrîa bia kûbûgana bira bionthe bûkeenda na bûgaatûûra ku mayîîga. 20 Nwa bûûrie, “Tûkaarîa mbi mwanka wa mûgwanja aabu, wegua tûtianda kana tûketha?” 21 Nkaathaarima nthîgûrû yenu na mwanka wa îthanthatû îgaaciaraga maketha maaganu ma kûbûgana kagiita ka mîanka îthatû. 22 Na bûkîanda mwanka wa înaana bûkeeguyaga wa bûkîrîîyaga maketha ma mwanka wa îthanthatû na bûkeegagua bûrî na biakûrîa bia kûbûgana mwanka rîra bûgaaketha maketha maayerû.
Gûcookua wa into
23 “ ‘Ithaka bienu bitibatîîrue biendua kûrû n'ûntû ti bienu bwingwa, i biakwa, na biigû i taka bûrî ageni bûneenkeretwe rûûtha rwa kûbitûmîra. 24 Rîra muntû eendia kîthaka, muntû ûyu arî na rûûtha rwa gûkûûra kîthaka gîku gîtuîka gîake kaîrî. 25 Mûisiraeri akaaya kûthîîna agatuîka nwa eendiirie kîthaka gîake muntû wa mûciî wao ndeeni ûra bakuanîrîîtie nwe mûno nwe abatîîrue gûkûûra kîthaka gîku. 26 Muntû ûra atarî na muntû wa mûciî aûmba gûkûûra kîthaka gîku nwa akare akaaya kwona mbia ikûgana nwa akûûre kîthaka gîake wengwa. 27 Gûkaaya gûkarîka ûgu muntû ûyu wendeetie mûnda abatîîrue area muntû ûra aamûgûrîrîîte uu îrîi rîriingeene na mîanka îra îtigeere mbere ya mwanka wa gûcookanîria rîra kîthaka kîbatîîrue kûmûcookera atakûmûrea. 28 Îndî muntû akaaya kwîgua atiûmba gûkûûra kîthaka gîake gîgaakara na muntû ûyu akîgûrîîte mwanka mwanka wa gûcookanîria rîra muntû ûra akîgûrîîte agaagîcookia kîrî mwene wengwa.
29 “ ‘Muntû akaaya kwendia nyomba yake îrî taûniini imbirigîre na rûthiingo rwa maiga muntû ûyu arî na mwanya wa mwanka ûmwe kuuma ntugû îra eendia nyomba înu wa kûmîkûûra. 30 Îndî akaaya kûrega kûmîkûûra kagiitaani ka mwanka ûyu muntû ûyu atirî na mwanya wa kûmîkûûra kaîrî. Îtuîkaga ya mûgûri na nciarwa ciake na îticookagua kîrî mwendia mwankaani wa gûcookanîria. 31 Îndî nyomba ira itarî taûni îmbirigîre na rûthingo rwa maiga, inu ikaathûkagua wa ta mînda. Eene bara baciendeetie barî na rûûtha rwa gûcikûûra na ibatîîrue icookagîrua eene mwankaani wa gûcookanîria. 32 Îndî rî, Arawi barî na rûûtha kagiita konthe rwa gûkûûra into biao taûniini ira bagaîrîîtwe. 33 Nyomba îkaaya kwendua i Mûrawi taûniini ta înu na nyomba înu îkarega gûkûûrwa, n'îbatîîrue îcookua mwankaani wa gûcookanîria n'ûntû nyomba cia Arawi taûniini ciao i rûgai rwao rwa gûtûûra gatîgatîîni ga antû ba Isiraeri. 34 Îndî gûntû gwa kûrîîthia kûra kûthiûrûkîrîîte taûni cia Arawi gûtibatîîrue kwendua, rûru i rûgai rwao rwa gûtûûra.
Gûteethia nkea
35 “ ‘Ûkeegua Mûisiraeri ûra bûtûûranîîre nwe agûtuîka nkea na aaremwa igwîtiirîîra mûteethieni wa ta bûra ûûmba gûteethia mûgeni, kaingo aûmba gûkara gwaku. 36 Ûtikaamûrîie baita ya mbia ira wamûkoobithia, îndî kuthûka Mwathani Ngai waku kaingo ûreka Mûisiraeri wa cienu akara gwaku. 37 Ûtikaamwîtie baita ya mbia ira bwamûkoobithia kana bûmwenderia irio na baita. 38 I niû Mwathani Ngai wenu, ûra aabûrutire nthîgûrû ya Miisiri mbûnenkera nthîgûrû ya Kanaani na ntuîka Ngai wenu.
Kûrekeerua gwa nkombo
39 “ ‘Mûisiraeri wacienu ûra atwîre akubî naawe akaaya gûtuîka nkea mwanka akeebendia kîrî woû akûrutîra ngûgî ûtibatîîrue ûmûrutithia ngûgî ta nkombo. 40 Ûbatîîrue ûkara nwe ta mwandîkwa waku kana mûgeni ûra akaraga waku mûciî agîkûrutagîra ngûgî mwanka mwanka ûyu ûngî wa gûcookanîrua. 41 Kagiita gaku ûkamûrekeeria we na aana baake baume wathooni bwaku bathi mûciî wao kîrî into bia biûyûûyû biao. 42 N'ûntû antû ba Isiraeri n'aruti ngûgî baakwa bara ndaarutire nthîgûrû ya Miisiri, batibatîîrue beendua ûkombooni. 43 Ûtikaabaathe na taka îndî ûkuthûke Ngai wenu.
44 “ ‘Nkombo cienu cia aka na arûme ibatîîrue ciuma kîrî mîgongo îra îbûthiûrûkîrîîte. Kuuma kîrî mîgongo înu nwa bûgûre nkombo. 45 Nwa bûgûre nkombo kuuma kîrî ageni bara batwîre gatîgatîîni keenu, kinya aana baao bara baciarîrîîtwe nthîgûrû yenu. Babu bonthe nwa batuîke into bienu. 46 Nwa ûgaîre nthaka ciaku bo batuîke nkombo ciao magiita monthe ma ûtûûro bwa cio. Îndî gûtirî we abatîîrue kwatha Mûisiraeri wa cienu na taka.
47 “ ‘Mûgeni ûmwe wa bara batwîre gatîgatîîni keenu akaaya gûtonga na Mûisiraeri wa cienu agatuîka nkea mwanka akeebeendia kîrî mûgeni ûyu kana kîrî muntû wa mûciî wao, 48 Mûisiraeri ûyu arî na rûûtha rwa gûkûûrwa i mûruagina 49 kana îthe mûkûrû kana îthe mwanake kana muntû ûngî wa mûciî wake nwa amûkûûre. Wana we wengwa akagîta mbia cia kûgana nwa eekûûre. 50 Wee na ûra aamûgûrire babatîîrue batara i mîanka îgana kuuma rîra aamûgûrire mwanka mwanka wa gûcookanîria. Îrîi rîa kûthaûrwa wake rîgaatarîîrwa kûringana na mîanka îra îtigeere na bûra mwandîkwa arîagwa woora mwanka. 51 Wegua i mîanka îmiingî îtigeere, akaarea gîcuncî kîînene kîa mbia ira aagûrirwe nacio. 52 Îndî wegua i mîanka îmîkai îtigeere akaarea gacuncî kaaniini ka mbia ira agûrirwe nacio, agaatara na arîe îrîi rîa kûthaûrwa wake kûringana na mîanka îra îtigeere. 53 Muntû ûyu abatîîrue athûkua ta mwandîkwa wa kîî mwanka. Bûtigeetîgîîrie Mûisiraeri wa cienu aathwa na taka. 54 Na akaaya kwîgua ationa njîra nwa îmwe ya inu ya gûkûûrwa n'yo, we na mûciî gwake bakaarekeerua mwanka wa gûcookanîria wakinya. 55 N'ûntû antû ba Isiraeri n'aruti ngûgî baakwa bara ndaarutire nthîgûrû ya Miisiri. I niû Mwathani.