Ithaarimo n'ûntû bwa kwathîka
(Kûri 7:12-24; 28:1-14)
26
1 “ ‘Bûtikaarûthe ngai cia ûrongo kana mîbuanaano kana itugî, kana maiga ma gûcaa nthîgûrû yenu kaingo bûbigonga. N'ûntû i niû Mwathani Ngai wenu. 2 Menyagîîraani Sabatû ciakwa na bûtîîyage bantû aakwa atheru. I niû Mwathani.3 “ ‘Bûkathingata watho bwakwa na bûkaathîkîra maathana maakwa bûkarûtha bûra makuuga 4 nkabuurithîria mbura kagiita kara kaagîrîîte kaingo nthîgûrû îciara irio na mîtî îciara matunda. 5 Irio bienu bikeegua birî biingî mwanka bwîgue bûkîbiketha îgiita rîa maketha ma ncabiibû, na bûkeegua wa bûgîkethaga ncabiibû îgiita rîa maanda ma mbura înu yîngî. Bûkeegua bûrî na biakûrîa bia kûbûgana na bûgaatûûra mayîîga.
6 “ ‘Nkabûnenkera ûkiri nthîgûrû yenu na bûkaathiiyaga kûmaama bûtarî na ûguaya. Nkaarutaruta nyamû imbîî ciume nthîgûrû yenu na bûtiîgua bûrî na mbaara kaîrî. 7 Bûgaacindaga anthû beenu na bûbaûragîre ndûani. 8 Antû bataano beenu bakaûmbaga gûcinda antû îgana na antû îgana beenu bakaûmbaga gûcinda antû ngiri îkûmi, bûkaûraga anthû beenu na mpiû.
9 “ ‘Nkabûthaarima na bûkaathagaya, niû nkaûyûria kîrîîkanîro kîra ndaarîîkanîîre naabi. 10 Maketha meenu makeegua marî maingî. Makaathiragia mwanka ng'ara mwanka gûgatuîka nwa bûrutarutire irio bira bikûrû kaingo bwona mwanya wa gûkethera biiyerû. 11 Nkaarûtha gîkaro gatîgatîîni keenu na ntibûûndûkîria mûgongo. 12 Nkaathiyanagia naabi. Nkeegua ndî Ngai wenu, naabi bûrî antû baakwa. 13 I niû Mwathani Ngai wenu, ûra aabûrutire nthîgûrû ya Miisiri kaingo buuma ûkombooni. Indaunangire îcoki rîra rîabûthaîkîîte ndabûthaûra bwathi bûtarî na îgi.
Îkaanûkia n'ûntû bwa kûrega kwathîka
(Kûri 28:15-68)
14 “ ‘Îndî ûkeegua bûtinthikîîria na bwathîkîra maathana mama maakwa monthe, 15 na bûrege mawatho maakwa na kwoogu bwînyangie kîrîîkanîro kîra ndaigire naabi, 16 nkabûnenkera îkaanûkia. Nkabûretera kînyamaara. Bûkaayua mîrimo ya kûbwonjia na kîara kîra gîgaatûma meetho moorokera bwa ndeeni na bûûre mana woogu. Bûkaandaga irio na bûtagunîke n'ûntû anthû beenu bakabûtuunya bio barîe. 17 Nkabûûndûkîria mûgongo na bûgaaturagwa n'anthû beenu rîonthe. Bûkaathagwa i bara babûthwîre na bûkaagwatwa n'ûguaya mwanka bûkuthûkage kinya rîra gûtarî we wîngeene naabi.
18 “ ‘Na wegua kinya nyuma ya mantû mamu bûtimbathîkîra, nkoongeera îkaanûkia rîenu maita mûgwanja n'ûntû bwa meeyia meenu. 19 Nkaathiria mûthûnûko wenu, ntibuurithîria mbura na nthîgûrû yenu îkaûma ng'û ta yiiga. 20 Ngûgî cionthe ira bûkaarutaga ikeegua irî cia mana n'ûntû nthîgûrû yenu îtiiciara irio na mîtî yenu îtiigîa na maciaro.
21 “ ‘Na kinya wegua wana nyuma ya ûgu bûkaarega kûmbathîkîra nkoongeera îkaanûkia rîenu maita mûgwanja n'ûntû bwa meeyia meenu. 22 Nkaarekeeria nyamû cia kîthaka imbîî gatîgatîîni keenu. Ikaaya irîe aana beenu, ithirie nyamû cia ûrîîthi bwenu na ibûrîe biû eene bûtigare baakai ûû atî wana njîra cienu igaakara ta itathiiyagwa.
23 “ ‘Na wegua kinya nyuma ya îkaanûkia rîru rîonthe wanarîo bûtiithikîîria nwaka bûkaathi na mbere kûûmia kîongo, 24 naani nkaathi na mbere kûbûûmîria na mbûneenkere îkaanûkia maita mûgwanja nkûrûki ya rîra rîa mbere kûringana na meeyia meenu. 25 Nkaareeta ndûa kîrî biû ya kûbûkaanûkia n'ûntû bwa kwînyangia kîrîîkanîro gîetû, na rîra bwathi kwîbitha taûniini cienu, ngaatûma mûrimo ûmûthûûku gatîgatîîni keenu, mwanka bwînenkanîre njaraani cia anthû beenu. 26 Ngaatûma bwaga irio, mwanka aka îkûmi barugagîre mîgaate yao bantû amwe. Bakaabûgaagîra kang'enyûrû kaniini, na muntû arîa rûgai rwake agatigwa wa abûûti.
27 “ ‘Na wegua kinya nyuma ya mantû mama monthe bûkaathi na mbere na kûrema na bûrege kûmbathîkîra, 28 rîru nkabûûndûkîria mûthûûro wakwa na ncooke mbûnenkere îkaanûkia maita mûgwanja nkûrûki ya mbereeni n'ûntû bwa meeyia meenu. 29 Yûûra rîenu rîkeegua rîrî rînene mûno mwanka bûrîe aana beenu. 30 Nkeenyangia gûntû kûra bûgongagîra kûra gûûkîîru na mbomorange ithînjîro bira bûbîîthagîria macoco, na ncooke mbûmbe ithûmba bia biimba bienu îgûrû ya mîbuanaano înu yenu îtarî mwoyo. Na ntiîgua ndî bata naabi. 31 Ngaatuîkithia taûni cienu ira nene maganjo, mbînyangie gûntû kûra bûrutagîra igongwana na ntiikeneera mûcinko wa igongwana bienu. 32 Nkeenyangia nthîgûrû yenu mwanka anthû beenu bara batwîre ku bamake n'ûntû bûbu. 33 Nkaareeta ndûa kîrî biû na mbûnyagaarie naagu mîgongooni. Nthîgûrû yenu îgaatigwa întheri na taûni cienu ira nene itigwe irî maganjo. 34 Rîru i rîo nthîgûrû yenu îgaakeneera kûnogoka kagiita gaku îgaakara îrî ntiganîrie bûrî nthîgûrû cia anthû beenu. Rîru nthîgûrû yenu îkaanogoka na îkeneere kûnogoka gûku. 35 Na kagiita gaku konthe nthîgûrû yenu îgaakara îrî ntiganîrie îkeegua îrî na kûnogoka; kûnogoka kûra bûtaamînenkagîra ta bûra bwabatîîrue kûmînenkagîra mwanka ûmwe nyuma ya mîanka mûgwanja, rîra bwatwîre ku.
36 “ ‘Na ngaatûma biû bûtigeere na bûrî nthîgûrû cia kûûraaya bûgwatwa n'ûguaya bûûnene mûno mwanka muntû akaugagia eegua muugio wa kathangû gakamatîîtwe i ruuo. Bûkaugagia taka bwîngeenwe naabi ndûani na bûkagwîyaga gûtarî mûnthû arî akubî naabi. 37 Bûgaakooranagia bwingwa bûkagwa taka bûkuthûkîîte kûûragwa kinya gûtarî we wîngeene naabi; na bûtiûmba kwîrwîrîîra kuumania na anthû beenu. 38 Bwinthe bûkaathirîra naagu bûtaîtwe, bûmerue i nthîgûrû ya anthû beenu. 39 Na bara beenu baakai bagaatigara nthîgûrû ya anthû beenu bakaûra mana woogu n'ûntû bwa meeyia maao na ma biûyûûyû biao.
40 “ ‘Îndî mûthiani antû baakwa bakeerira meeyia maao na meeyia ma biûyûûyû biao bara bankarariirie na baarega kûmbathîkîra, 41 baatûma nthûûra i bo, ndaatûma bataîgwa bairwa nthîgûrû cia anthû baao, wegua nkoro inu ciao mbûmo ikeenyiia na beetîgîîrie îkaanûkia rîa ûremu na meeyia maao, 42 nkaaririkana kîrîîkanîro gîakwa na Njakubu na Isaka na Îburaîmu na nkeerûia wîrane bwakwa mbûcookie nthîgûrû yenu. 43 Îndî mbere nwa mwanka nthîgûrû îîgue îrî na kagiita ga gûkeneera kûnogoka rîra îkeegua îrî ntiganîrie. Nabo bakaagwata îkaanûkia rîra rîbabatîîrie n'ûntû bwa meeyia maao, n'ûntû bwa kûregana na mawatho maakwa na kûbûthia maathana maakwa. 44 Îndî wana gûkari ûgu, barî wa naagu nthîgûrû cia anthû baao ntibatiganîria kûrû kana mbathiria gûtuîka atî kandaathûûkia kîrîîkanîro gîakwa nabo. I niû Mwathani Ngai wao. 45 N'ûntû bwao nkaaririkana wîrane bwa tene bûra ndaagaigire na biûyûûyû biaao rîra ndaabarutire nthîgûrû ya Miisiri mîgongo yonthe îkîonaga, kaingo ntuîka Ngai wao. I niû Mwathani.’ ”
46 Mamu i mo mawatho, mataaro na maathana mara Mwathani aaneenkeere antû ba Isiraeri gûkûrûkîîra Musa kîrîmaani gîa Sinai ma kûbatongoria ngwatanîrooni yao na Mwathani.