Arawi 27

Gûkûûra into bira birutîrîîtwe Mwathani

1 Mwathani aaria na Musa amwîra ata rî, 2 “Aria na antû ba Isiraeri ûbeere ûûgû, ‘Rîra muntû aanenkanîrwa kîrî Mwathani n'ûntû bwa kwingia mûthiîtio wa mwanya, muntû ûyu nwa akûûrwe gûkûrûkîîra marîi ma mbia ta ûûgû, 3 Muntû mûrûme wa gatîgatî ka mîanka mîrongo îîrî na mîanka mîrongo îthanthatû ûyu n'wa sekeri mîrongo îtaano cia fetha kûringana na kîthimi kîa Nyomba ya Ngai. 4 Ûkeegua muntû wa ûkûrû ta bûbu i mûka îrîi rîake i sekeri mîrongo îthatû cia fetha. 5 Mwana wa muntû mûrûme wa gatîgatî ka mîanka îtaano na mîanka mîrongo îîrî, îrîi rîake i sekeri mîrongo îîrî cia fetha, na mwana wa mwarî wa ûkûrû bûbu i sekeri îkûmi. 6 Nako kaîyî ka ruungu rwa mîanka îtaano gakaarîagîrwa sekeri itaano cia fetha, kaarî nako gakarîîrwa sekeri ithatû cia fetha. 7 Muntû mûrûme wa ûkûrû bwa mîanka mîrongo îthanthatû na nkûrûki, akaarîagîrwa sekeri îkûmi na itaano cia fetha na mûka wa ûkûrû ta bûbu nwe i sekeri îkûmi. 8 Ûkaaya kwîgua muntû ûyu waathiîtiirie i nkea na atiûmba kûrea marîi mamu matue, muntû ûyu akaathi kîrî mûthînjîri wa Ngai na muntû ûra aneenkanîîre. N'we mûthînjîri wa Ngai agatuîra muntû ûyu îrîi rîra akwona akaûmba kûrîa.

9 “ ‘Na ûkaaya kwîgua mûthiîtio warî îgûrû rîa nyamû îra yûûmba gwîtîgîîrîka kîrî kîgongwana, îtikûûrîka. Gîku i kîewa na n'ya Mwathani. 10 Nyamû înu îtiûmba gûkûûrwa na îîngî îmbega kana înthûûku. Akaaya kûmîkûûrania na nyamû îngî, nyamû inu irî ciîrî igaatuîka cia Mwathani.

11 “ ‘Îndî ûkeegua mûthiîtio ûyu warî îgûrû rîa nyamû îrî mûgiro, îra îtaûmba gwîtîgîîrîka kîrî kîewa kîrî Mwathani, muntû ûyu akaira nyamû înu kîrî mûthînjîri wa Ngai. 12 Mûthînjîri wa Ngai agaatua îrîi rîa nyamû înu kûringana na mawega na moothûûku maayo. Îrîi rîru agaatua i rîo rîa mma. 13 Muntû ûyu akeenda gûkûûra nyamû, abatîîrue area îrîi rîru rîayo na oongeera gacuncî kamwe ga itaano ka îrîi rîa nyamû înu.

14 “ ‘Muntû akaaya kwathûra nyomba yake îtuîka întheru kîrî Mwathani, mûthînjîri wa Ngai akamîtuîra îrîi kûringana na mawega na moothûûku maayo na îrîi rîru i rîo rîa mma. 15 Ûkeegua ûra wamîneenkanîîre n'akwenda kûmîkûûra, abatîîrue arîa îrîi rîru rîayo rîonthe na oongeera gacuncî kamwe ga itaano ka îrîi rîru.

16 “ ‘Muntû akaaya kûnenkanîra gîcuncî kîa mûnda wake kîrî Mwathani, îrîi rîakîo rîgaatuîgwa kûringana na i mbeû îgana ata yûûmba kwandwa ku. Sekeri mîrongo îtaano cia fetha ikaagûra bantû ara aûmba kwandwa ndebe îkûmi cia sayiri. 17 Ûkeegua muntû aaneenkanîra kîthaka gîake kuuma mwankaani wa gûcookanîîria îrîi rîakîo rîkeegua rîrî warîru. 18 Ûkaaya kwîgua aanenkanîra kîthaka gîake nyuma ya mwanka wa gûcookanîîria, mûthînjîri wa Ngai agaatarîîra îrîi rîakîo kûringana na mîanka îra îtigeere mbere mwanka wa gûcookanîîria ûkinya, na akaagiitîrwa îrîi rîau. 19 Wegua ûra wanenkanîîre kîthaka nwe akwenda gûgîkûûra, abatîîrue arîa îrîi rîakîo rîûyûri rîra rîatwirwe n'athînjîri ba Ngai na oongeere gacuncî kamwe ga itaano. 20 Îndî ûkeegua atikwenda gûkûûra mûnda ûyu kana ûkeegua wendereetue muntû ûngî, muntû ûyu atiûmba gûcukûûra. 21 Na rîra kîthaka gîku gîkaarekeerua mwanka wa gûcookanîîria, gîgaatuîka kîa Mwathani kûrû. Gîgîtuîka ûtonga bwa athînjîri ba Ngai.

22 “ ‘Muntû akaaya kûnenkanîra mûnda ûra agûrîîte kîrî Mwathani, 23 mûthînjîri wa Ngai agaatarîîra îrîi rîa uu kûringana na mîanka îra îtigeere mbere ya mwanka wa gûcookanîîria ûkinya. Muntû ûyu abatîîrue arîa îrîi rîru ntugû wenu; mbia inu i cia Mwathani. 24 Mwanka wa gûcookanîria waakinya mûnda ûyu ûgaacookera ûra aakîendeetie na nwe mwene. 25 Marîi monthe mataragîîrwa kûringana na sekeri ya Nyomba ya Mwathani. Sekeri îmwe n'ya gera mîrongo îîrî.

26 “ ‘Gîtûra îria kîa nyamû cionthe i kîa Mwathani na kwoogu gîtiûmba kwathûrîrwa we na mûthiîtio. Kayaû, kagondu kana kabûri, tûtu tunthe i twa Mwathani. 27 Îndî gîtûra îria kîa nyamû ya ira irî mûgiro nwa gîkûûrwe i mwene na îrîi rîra rîtue rîûyûri na akoongeera gacuncî kamwe ga itaano ka îrîi rîru. Na ûkeegua mwene nyamû înu atikwenda kûmîkûûra nyamû înu nwa yeenderue muntû ûngî na îrîi rîru rîtue.

28 “ ‘Îndî, gûtirî gîntû nwa kîrîkû kîra muntû anenkanîrîîte kîrî Mwathani kûrû kîûmba gûkûûrwa kuuma intooni biake, eegue i muntû kana i nyamû kana i kîthaka gîa kîûyûûyû gîake, gîtienderua muntû ûngî kana mwene kîo agîkûûra. Gîntû kîonthe kîra kînenkanîrîîtwe na njîra ta înu i kîa Mwathani tene na tene na i kîîtheru mûno. 29 Muntû ûra anenkanîrîîtwe kaingo athirua atikûûrîka nwa mwanka aûragwe.

30 “ ‘Gîcuncî gîa îkûmi gia into bia mînda yenu, biîgue birî mûthemba wa matunda kana mîthemba înu îîngî ya irio kîonthe i kîathûrîrîtwe Mwathani. 31 Muntû akeenda gûkûûra gacuncî gaake ga îkûmi abatîîrue arîa îrîi rîako rîûyûri na aacooka oongeera gacuncî kamwe ga itaano ka îrîi rîru. 32 Nyamû îmwe ya ndîîthia kuuma kîrî nyamû îkûmi n'ya Mwathani. Na rîra muntû agûtara kaingo amenya ira akairîra Mwathani, wa îra yoongwa îkeegagua îrî ya îkûmi n'yo ya Mwathani. 33 Mwene ûrîîthi atibatîîrue abaanga nyamû ciake bûra ira nceng'u ikaathûkua irî cio. Wana atibatîîrue akûûrania nyamû îmwe na îra îîngî. Akaaya gûkûûrania nyamû îmwe na îra îîngî, nyamû inu irî ciîrî igaatuîka cia Mwathani na itiûmba gûkûûrwa.’ ”

34 Mamu i mo maathana mara Mwathani anenkeere antû ba Isiraeri gûkûrûkîîra Musa kîrîmaani gîa Sinai.