GÛTARA
Mantû ma îbuku rîrî
Îbuku rîrî rîaragîîria mantû ma rûgendo rwa aana ba Isiraeri kuuma kîrîmaani gîa Sinai ara baanenkeerwe maathana îkûmi mwanka Rwanda rwa Moabu rûteere rwa umîîro bwa riûa bwa muuro wa Njorondani mwankaani wa Kanaani.
Rûgendo rûrû I rûgendo rûkîûmba kûthiîwa na rungu rwa mwanka ûmwe îndî rwathûkiirie mîanka mîrongo îthatû na înaana n'ûntû bwa antû kûûma biongo na kûrega kwathîkîra Ngai. Rîambere rîra antû beerirwe bathûngîre nthîgûrû ya wîrane, (Gûtara 13-14) I baakuthûkire kûrûtha bu. Gîku i kîo gîatûmire bakara bakîthiûrûûkaga Rwanda mwanka rîra nthuke îra yaregire kwathîka yonthe yakuire yathira. N'aana baao baacookire nyumaani kûthûngîra nthîgûrû ya wîrane batongoreetue I Njosua na Karebu. (Njos 1-12).
Îbuku rîrî Irîonanagia kûrega kwathîka gwa antû na mûthûûro wa Ngai, na kinya kîao na gwîtîgîka kwa Ngai n'ûntû bwa kûûyûria mawîrane maake. I Ngai waigire na aûyûria kîrîîkanîro gîake na Aburamu, na aatunyûkia nciarwa ciake kuuma ûkombooni bwa Miisiri na abatuîkithia antû baake wengwa. Na eebonania kîrî bo na aatûma bagwatanîra nwe. Kinya i Ngai akaanûkagia wîyia na akathaarima antû baake kaîrî kwa ngerekano ntheto cia Bireamu (Gîcu. 23-24).
Gwookubî îbuku rîrî rîkari ûûgû:
Antû ba Isiraeri beethuuranîra kuuma kîrîma gîa Sinai (1:1-9:23)
Kuuma kîrîma gîa Sinai mwanka Moabu (10:1-21:35)
Mantû mara maakarîkire barî Moabu (22:1-32:42)
Rûgono rwa bûra baumangire Miisiri kûthi Moabu (33:1-49)
Mawatho mbere ya kûringa muuro wa Njorondani (33:50-36:14)