Mûnene wa Moabu aatûmana Mbaraamu
22
1 Antû ba Isiraeri baathi baanda marema rûtunguruuni rwa Moabu mbarî ya uumîîro bwa riûa ya muuro wa Njorondani cierekanîrîte na Njeriko.2 Rîra mûnene wa Moab, Mbaraki mwana wa Sipori eegiirue bûra antû ba Isiraeri baarûthîîte antû ba Amori na bûra Aisiraeri baingîîte, 3 we na antû baake i baaguayire n'ûntû bwa antû ba Isiraeri.
4 Antû ba Moabu beera atongoria ba Mindiani, “Mûkwîrî ûyû wengeerie kwînyangia gîntû kîonthe kîra tûrî nakîo, wa ta bûra ncamba îrîîyaga nyaki kîthakaani cwe.”
Kwoogu mûnene Mbaraki mwana wa Sipori 5 aatûma atûmwa baathi gwîta Mbaraamu mwana wa Mbeori ûra atûûraga Pethori akubî na muuro wa Yufîrîti nthîgûrû ya antû baao. Bamûreetera ntûmwa kuuma kîrî Mbaraki îkuuga:
“Kûrî mûgongo wa antû uumîîte Miisiri. Antû baau banyagaarîîte kunthe na i bakwenda gûtûtuunya nthî yetû. 6 Ncû îîndî ûndumîre antû baba n'ûntû barî na inya gûnkîra. Rîru kwaûmbîka tûkabacinda na tûkabeengîîria bakauma nthîgûrû yetû; n'ûntû imbiyî woû ûkathaarima muntû n'athaarimagwa, na waaruma muntû akagwatwa i kîrumi.”
7 Kwoogu atongoria ba Moabu na ba Mindiani baathi na îrîi rîa kûringîrua kûrî Mbaraamu na bamwîra ntûmwa ya Mbaraki.
8 Mbaraamu abeera, “Raaraani na rûû nkabwîra wa bûra Mwathani akaambîîra.” Kwoogu atongoria babu ba Moabu baaraara kwa Mbaraamu.
9 Ngai aaya kîrî Mbaraamu amûûria, “I baaû baba bûrî nabo?”
10 Amûcookeria amwîra, “Mbaraki mwana wa Sipori, mûnene wa Moabu, n'we abatûmîîte baambîîra: 11 Atî kûrî antû baumîîte Miisiri na banyagaarîîte nthîgûrû yonthe. Arîenda mûrumîra bo kaingo aûmba kûbatura na kûbeengîîria.”
12 Ngai aacookia Mbaraamu, “Ûtikaathi na antû baba bakûûyîrîte na ûtikaarume antû ba Isiraeri n'ûntû imbathaarimîte.”
13 Rûûni rûkîîrî Mbaraamu aathi kîrî atûmwa ba Mbaraki abeera, “Îcookani nthîgûrû yenu, Mwathani akûrega nthi naabi.”
14 Kwoogu atongoria ba Moabu baacooka kîrî Mbaraki bamwîra, “Mbaraamu n'aregire kûûyania naati.”
15 Rîru Mbaraki aatûma gîkundi kîînene nkûrûki gîa atongoria, bara baarî ba gîtûmi nkûrûki ya bara ba mbere. 16 Baathi kîrî Mbaraamu bamwirîra ntûmwa ya Mbaraki mwana wa Sipori îkuuga:
“Itû ûtikeende gîntû nwa kîrîkû gîkûrigîîria kûûya kûmbîtîga. 17 Ngakûrea bwega na nkûrûthîre bûra bunthe ûkeenda. Itû bai ncû ûûndumîre antû baba.”
18 Îndî Mbaraamu aacookia, “Wana Mbaraki agaampa thaabu na fetha cionthe ira arî nacio nyomba yake ya wathani, ntienda kûrega kwathîkîra maathana ma Mwathani Ngai wakwa na njîra nwa îrîkû. 19 Îndî inkûbûûria bûraare wa ta bûra bara bangî baarûthire, kaingo menya kana ga kûrî ûntû bûngî Mwathani akwenda kûmbîîra kana gûtirî bu.”
20 Ûtugû bûbu Ngai aaya kîrî Mbaraamu amwîra, “N'ûntû antû baba ka bakûûyîrîtea îîbîthîranie bûthi. Îndî naawe ûkaarûtha wa bûra ngaakwîra.”
Mbaraamu na îng'ooi rîake
21 Kwoogu rûûni rûkîîrî Mbaraamu aathuuranîra îng'ooi rîake aathiiyania na atongoria ba Moabu. 22 Ngai aathûûra n'ûntû Mbaraamu nathiyaniirie na antû babu.b Na wa bûra Mbaraamu athiîte atwete îng'ooi rîake arî na aruti ngûgî baake baîrî, Mûraîka wa Mwathani aarûngama gatîgatî ka barabara mbere yao abarigîîria. 23 Rîra îng'ooi rîonire Mûraîka wa Mwathani arûûngi agu agweete rûûyiû, rîathûkîra kuuma barabaraani rîathi bwa kîthaka. Mbaraamu aringaanga îng'ooi arîcookia barabaraani.
24 Rîru Mûraîka wa Mwathani aathi aarûngama ara barabara yarî înjicianu na mînda ya mîcabiibû yarî mbarî irî ciîrî cia barabara na i kwarî na nthingo cia maiga mbarî irî ciîrî. 25 Rîra îng'ooi rîonire Mûraîka ûyu wa Mwathani i irîekirimaniirie na rûthiingo rwa iiga riainyanîîria kûgûrû kwa Mbaraamu. Wa kaîrî Mbaraamu aaringaanga îng'ooi.
26 Rîru Mûraîka wa Mwathani aathi mbere aarûngama bantû ara barabara yayiciene cwe mwanka gwatuîka gûtirî mwanya wa kwebera mbarî nwa îrîkû. 27 Îgiita rîrî, rîra îng'ooi rîonire Mûraîka wa Mwathani, i rîamaamire nthî. Mbaraamu aathûûra mûno anjîîria kûrîtika na mûraagi wake. 28 Rîru Mwathani aatûma îng'ooi rîûmba kwaria na rîaûria Mbaraamu, “N'ata ndakûrûtha? I mbi n'ûntû wandinganga maita mama mathatû?”
29 Mbaraamu arîcookeria arîîra, “N'ûntû n'ûkûndiitia! Ûkeegua ndî na rûûyiû njaraani i nkûûraga.”
30 Îng'ooi rîamûcookeria rîamwîra, “Anga ti niû îng'ooi rîra ûtwîre ûthiiyaga narîo ûtûûrooni bwaku bunthe? Ûroona nkûrûthîîte ûûgû kaîrî?”
Mbaraamu acookia, “Arî.”
31 Rîru Mwathani aatûma Mbaraamu oona Mûraîka arûûngi agu agweete rûûyiû. Mbaraamu eegwîthia atiirithia ûthiû nthî.
32 Mûraîka wa Mwathani amûûria, “I mbi îgûtûmaga ûringaanga îng'ooi rîrî rîaku wa maita mathatû? I mbûyîîte gûkûrigîîria n'ûntû ûtibatîîrue ûthi naagu ûthiîte. 33 Îndî îng'ooi rîaku irîmbonire na rîathûkîra maita mathatû. Rîkîrega kwathûkîra, nkûûyaga gûkûûraga îndî ntikîrîûraga.”
34 Mbaraamu amûcookeria, “I mbîyîîtie. Ntikwiyî kana ûkûrûûngi njîraani kaingo ûndigîîria. Îndî wegua n'ûkûthûgaania ntibatîîrue nthi na mbere na rûgendo, inkûgarûka ncooke mûciî.” 35 Îndî Mûraîka wa Mwathani auga, “Îthiiyania na antû îndî uuge wa bûra ngaakwîra uuge.” Kwoogu Mbaraamu aathiiyania na antû babu ba Mbaraki.
Mbaraamu aagwatwa ûgeni i Mbaraki
36 Rîra Mbaraki eegiirue Mbaraamu naayîîte, aumagarûka kûmûthagaana. Aarî taûni îra îrî îkumbo rîa muuro ûra wîtagwa Arinoni mwankaani wa Moabu. 37 Mbaraki amûûria, “I mbi yaagiriirie ûûya warîra ndaagûtûmanire rîa mbere? Kawonaga taka ntakîûmba gûkûrea bûra ûkwenda?”
38 Mbaraamu aacookia, “I bwega îîndî nkûûya. Îndî rî ngaakûguna nakî? N'ûntû gûtirî bu mbûûmba kuuga tatiga bûra Ngai akaambîîra mbuge.”