Arandi yeenyangua
21
1 “Rîra mûnene wa taûni îmwe ya Akanaani yetagwa Arandi, ûra atûûraga Negebu, eegiirue antû ba Isiraeri i bakûrûkîîrîîte bantû eetagwa Atharimu, mûnene ûyu aabaithûkîîre na ataa antû bamwe baao. 2 Rîru antû ba Isiraeri baathiîtia beera Mwathani: Ûkeegua ûgaatûma tûcinda antû baba, tûkeenyangia taûni ciao cionthe cwee, na tûbathirie kûrû.” 3 Mwathani abeegua na abateethia baacinda antû babu ba Kanaani. Kwoogu antû ba Isiraeri babathiria kûrû na beenyangia taûni ciao. Bantû agu baatwîre eetwa Orima.aNjoka ya rûthuku
4 Antû ba Isiraeri bauma kîrîmaani kîa Ori baathi na njîra îra îthiîte îria Rîtuune kaingo bathiûrûûka nthî ya Endomu. Îndî barî njîraani woogu baanogerwa, 5 baanjîîria kûtheta n'ûntû bwa Ngai na Musa. Baûragia, “I mbi yatûmire ûtûruta Miisiri tûûya gûkuîra rwanda gûntû gûtarî irio kana rûûyî? Tûtiûmîîria kûrîa irio bibi bithûûkîîte ûûgû!”
6 Rîru Mwathani aatûmîra antû njoka îrî na cûmû; ciarûmanga antû na Aisiraeri baingî baakua. 7 Antû baaya kîrî Musa bamwîra, “Itweyiirie rîra twanung'unire n'ûntû bwa Mwathani na n'ûntû bwaku. Romba Mwathani atûrutaangîre njoka ino aaga.” Kwoogu Musa aarombera antû.
8 Rîru Mwathani aaria na Musa amwîra arûthe njoka ya rûthuku na amîtûûgîrie gîtugîîni kaingo muntû woora akaarûmagwa i njoka, aaraitha njoka înu ya rûthuku, akoora. 9 Kwoogu Musa aarûtha njoka ya rûthuku na amîtûûgîîria gîtugîîni. Na muntû wonthe ûra aarûmagwa i njoka, aaraitha njoka înu ya rûthuku nooraga.
Kuuma kîrîma kîa Ori mwanka kîbondeeni kîa Moabu
10 Antû ba Isiraeri baathi na mbere, baakinya Obothi baamba marema. 11 Bakuuma Obothi, baathiire baamba marema maganjooni ma Riye-Abarimu rwanda rûra rûrî mîankaani ya uumîîro bwa riûa bwa antû ba Moabu. 12 Rîru baamba marema kîbondeeni gîa Serendi. 13 Kuuma agu baathiire beenjîra marema mbarî ya n'eegûrû ya muuro wa Arinoni, ndeeni ya rwanda rûra rûtaambûrûkîîte rwakinya nthîgûrû ya Amori. (Arinoni n'uu warî mwanka wa Moabu na Amori.) 14 Na i kîo ndeeni ya mabuku ma Ndûa cia Mwathani kwandîkîîtwe: “Taûni ya Waebu naara Sufa na ibondeeni bibu, muuro wa Arinoni, 15 na mîtûndûrûko ya ibonde bira bitambûrûkîîte biakinya taûni ya Arîna kûerekera mwanka wa Moabu.”
16 Kuuma agu baathiire bantû eetagwa Beeri, ara Mwathani eerire Musa, “Îthîrania antû bantû amwe mbaneenkere rûûyî.”
17 Rîru antû ba Isiraeri i bainîre rwîmbo rûrû:
“I ka tûkeneere!
Kîthima i gîtûpeete rûûyî.
18 Bagîtûmagîra mîkwayû yao ya ûnene,
atongoria beetû i boorootire
ara kîthima gîkeenjwa.”
Rîru antû ba Isiraeri baathi kuuma rwanda rûru mwanka Matana, 19 na kuuma Matana baathi Naarieri. Na kuuma Naarieri baathi Mbamothi. 20 Kuuma Mbamothi baathi kîbondeeni kîra kîrî nthîgûrû ya Moabu, ruungu rwa kîrîma gîa Pisiga. Na muntû atweete kathûmbîri ga kîrîma gîku noonaga ng'aarû.
Ûûmbani Îgûrû rîa mûnene Sioni na mûnene Ogu
(Kûri 2:26-3:11)
21 Rîru antû ba Isiraeri baatûma atûmwa kîrî Sioni mûnene wa Amori bamwîra:
22 “Twîtîgîîrie tûkûrûkîîre Nthîgûrû yenu. Tiû na nyamû cietû cia ndîîthia tûkaathi na njîra akî, tûtiathûkîra mîndaani yenu ya mîcabiibû, na tûtiinyua rûûyî ithimaani bienu. Tûkaathi na barabara mwanka tuume nthîgûrû yenu.”
23 Îndî Sioni ateetîgîîria antû ba Isiraeri bakûrûkîîra nthîgûrû yake. Eethîraniirie njûûrî yake ya ndûa na kûthi Njaasi naagu rwanda na kwithûkîra antû ba Isiraeri. 24 Îndî antû ba Isiraeri i baûragire anthû babu baao kwa wingî na baatûûra nthîgûrû înu yao kuuma muuro wa Arinoni mwanka muuro wa Njaboku kwa Amoni. Îndî bataakûrûka mwanka wa Amori, n'ûntû n'warî ûmûkabîre mûno. 25 Kwoogu antû ba Isiraeri baathûkia na baatûûra taûni cia Amori cionthe ûntû bûmwe na Esiboni na taûni inu iingî ciamîthiûrûkîrîîte. 26 Esiboni n'yo taûni îra mûnene Sioni aathanaga arî. Mûnene Sioni aarî agûtura mûnene wa Moabu ûra aarî agu mbere na amûtuunya nthîgûrû yake mwanka muuro wa Arinoni.
27 I kîo gîtûmi aini bainaga:
“Ncû Esiboni taûni ya mûnene Sioni
itûkwenda kwona îrî mbake wa ta tene.
28 Kûrî kagiita kamwe Esiboni Njûûrî ya ndûa ya Sioni yaumaga ku ta mwanki.
Yeenyangia taûni ya Ara ya Moabu,
yaacûna tûrîma twa Arinoni mbarî ya îgûrû.
29 Bûkoona thîîna biû antû ba Moabu!
Biû bûrombaga Kemosi bûgaatuîka maganjo!
ngai yenu n'îrekeerie antû arûme baataîgwa
na aka nabo baatuîka mîgwate ya Sioni mûnene wa Amori.
30 Îndî îîndî nciarwa ciao ikûthirua;
kuuma Esiboni mwanka Ndiboni.
Kuuma Nasimu,
mwanka Nofa akubî na Mendeba.”
31 Kwoogu antû ba Isiraeri batûûra nthîgûrû ya Amori.
32 Na Musa abatûma baathi kûthigaana boona njîra îra mbega mûno ya kwithûkîra taûni ya Njaseri. Antû ba Isiraeri bamîthûkia amwe na taûni ira ingî ciarî akubî na beengatia Amori bara baatûûraga ku. 33 Rîru antû ba Isiraeri baûndûka baagwata barabara ya kûthi Mbasani. Mûnene Ogu wa Mbasani aumagara na njûûrî yake yonthe ya ndûa aumagarûka arîîkana nabo Endirei arûa nabo.
34 Mwathani aaria na Musa amwîra, “Ûtikaamakue n'we, n'ûntû i mûnenkanîrîîte kîrî woû, amwe na njûûrî yake yonthe, na nthîgûrû yake. Mûrûthe wa ta bûra warûthire Sioni mûnene wa Amori ûra aathanaga Esiboni.”
35 Kwoogu antû ba Isiraeri baûraga Ogu na nthaka ciake na antû baake bonthe na gûtirî matigari maatigwa ku. Rîru, batûûra nthîgûrû înu yake.