Ûroria bwa mbere bwa Mbaraamu
23
1 Mbaraamu eera Mbaraki, “Mbakîra ithînjîro mûgwanja aaga na ûndeetere ncamba cia ng'ombe mûgwanja na ntûrûme mûgwanja.” 2 Mbaraki aarûtha wa ta bûra eerirwe, we na Mbaraamu baaruta kîgongwa, ncamba na ntûrûme kîrî wa kîra kîthînjîro.3 Rîru Mbaraamu eera Mbaraki, “Woû rûngama aaga igongwanaani biaku bia kûbîîthua nani nthi mbone kana Mwathani akeenda kûrîîkana naani. Ngakwîra wa bûra bunthe akaangwûrîra.” Kwoogu aatwa karîmaani kathûmbîri arî wenka.
4 Ngai amuumîîra. Mbaraamu amwîra, “Ngwaka ithîînjîro mûgwanja na ndaathîînjîra ncamba na ntûrûme kîrî wa kîra kîmwe kîa bio.”
5 Mwathani eera Mbaraamu bûra akauga na amûtûma kaîrî aacooka kîrî Mbaraki amwirîra ntûmwa yake.
6 Kwoogu aacooka eethîra Mbaraki arûngî kîrî kîgongwana gîake arî na atongoria ba Moabu. 7 Mbaraamu aanjîîria kûroria:
Mbaraki mûnene wa Moabu araandeetire kuuma Aramu,
kuuma irîmaani bira birî naara uumîîro bwa riûa.
Ambîîra, “Ncû ûûmbugîre”
“Ruma antû ba Njakubu, Rîrîka antû ba Isiraeri.”
8 N'ata mbûmba kûruma
kîra Ngai atarumîîte?
N'ata mbûmba kûmena bara
Mwathani atameneete?
9 Inkûboona kuuma njaraani cia maiga,
nkabaraithîîria kuuma tûrîmaani.
Bo batwîre mwanya na antû bara bangî,
ibaathûre kuuma mîgongooni îra îîngî.
10 “Nciarwa cia Njakubu ikari ta tîîri
înyiingî na îtiûmba gûtarîka.
Gaantûûre ta bara batheru,
na nkue na thîîrî ta antû ba Ngai!”
11 Rîru Mbaraki aûria Mbaraamu, “Aabu rîru n'ata wandûthîra? Nkûreetire aaga ûndumîra anthû baakwa. Aî woû waûkania na kûbathaarima!”
12 Mbaraamu amûcookeria, “Mbûûmba kuuga bûra Mwathani akûûmbîîra mbuge bunka.”
Ûroria bwa maîrî bwa Mbaraamu
13 Rîru Mbaraki eera Mbaraamu, “Ncû tûthi naawe bantû angî ara ûkeegua ûkîona kagucî kamwe ga antû babu ba Isiraeri na ti bonthe, ûûndumîre bo ûrî agu.” 14 Amûthûkia amwira kîthakaani gîa Sopimu kîrîmaani kîa Pisiga kathûmbîri. Kinya noogo aaka ithînjîro mûgwanja na aaruta ncamba îmwe na ntûrûme kîrî wa kîra kîthînjîro. Cionthe ciarî ncamba mûgwanja na ntûrûme mûgwanja wa bûra ithînjîro biagana.
15 Mbaraamu eera Mbaraki, “Rûûngama aaga kîgongwanaani gîaku gîa kûbîîthua nani nthi tûrîîkane na Ngai naara.”
16 Mwathani aarîîkana na Mbaraamu, amwîra bûra akauga, na amûtûma kîrî Mbaraki amwirîra ntûmwa yake.
17 Kwoogu aacooka eethîra Mbaraki wa arûûngi kîgongwanaani gîake gîa kûbîîthua arî na atongoria ba Moabu. Mbaraki aûria bûra Mwathani augîîte.
18 Mbaraamu aanjîîria kûroria:
“Ncû, Mbaraki mwana wa Sipori;
Na ûthikîîrie bûra nkuuga.
19 Ngai atikari ta antû, bara barongoaga;
Ti ta muntû ûra agarûkaga mathûgaania.
Wee bûra auga n'arûthaga.
Aaragia mantû makarûthîka.
20 Mbîîrîîtwe nthaarimane;
Na rîra Ngai aathaarimana, ntiûmba kûrigîîria kîthaarimo gîake.
21 Gûtirî mûbango wa thîîna îgûrû rîa Njakubu,
na Isiraeri îtikaaro yoona ûthûûku;
Mwathani Ngai wao arî amwe nabo;
Baumbûraga n'we mûnene wao.
22 Ngai naabarutire Miisiri;
Abarûagîîra ta na inya ta mbogo.
23 Gûtirî ûrogi bwa kûthûûkia Njakubu,
gûtirî mîtheega ya kwînyangia Isiraeri
Îndî antû bauga îgûrû rîa Isiraeri,
‘Raithani bûra Ngai arûthîîte!
24 Mûgongo ûûkîîrîîte ta cimba ya nka;
webûkia ta cimba,
îra îtanogokaga mwanka rîra îgatembûranga îrîe,
na înyue nthakame ya nyamû îra yûûragîîte.’ ”
25 Rîru Mbaraki eera Mbaraamu, “Ûkûrega kûruma antû ba Isiraeri, îndî mbîtîgîîria itû ûtikabathaarime.”
26 Mbaraamu amûcookeria, “Anga ntaakwîrire nwa mwanka mbuge bûra bunthe Mwathani akaambîîra?”
Ûroria bwa mathatû bwa Mbaraamu
27 Mbaraki eera Mbaraamu, “Ncû tûthi bantû angî. Nûmba Ngai agagwîtîgîîria ûndumîre antû baba ûrî oogo.” 28 Kwoogu aira Mbaraamu kîrîmaani gîa Peori kîra kîraitheene na ng'aarû kûra îgûrû kathûmbîri.