24
1 Mwanka agu Mbaraamu naarî akûmenya Mwathani eendaga athaarima antû ba Isiraeri, na kwoogu ataathi kûringia ta bûra aariingagia agu mbereeni. Aagarûka eerekera bwa ng'aarû. 2 Rîra Mbaraamu oonire antû ba Isiraeri bûra baambîîte marema wora mwîrîga bantû aau, Kîrundu wa Ngai amûûyûra, 3 na aanjîîria kûroria:Ntûmwa ya Mbaraamu mwana wa Mbeori,
biugo bia muntû ûra wonaga caû,
4 ûra aûmbaga kwîgua bûra Ngai akuuga,
nkûnûûrîîte meetho, nkwona kîrootooni kîoneki kuuma kîrî Ngai Mwene Inya.
5 Ka marema maaku mathongamîîte ata, woû Njakubu,
ikaro biaku, woû Isiraeri!
6 Ta mîstaarî ya mînaathi,
kana mînda ya îkumbo rîa muuro
ta mabirinca mara maandîîtwe i Mwathani,
kana mîthithinda ya îkumbo.
7 Bakeegagua barî na mbura ya kûgana,
bakaandaga mbeû ciao mîndaani îrî na ithithina.
Mûnene wao akeegua arî mûnene kîrî Agagi,
ûnene bwake bûgaataamba gûntû kunthe.
8 Ngai aabarutire Miisiri;
Abarûagîîra na inya ta mbogo.
Ibacambûragîra anthû baao,
bathithiraga maîndî maao, bakaunanga mîgwî yao.
9 Mûgoongo ûyû ûkari ta cimba îrî na inya.
Rîra îmaami gûtirî we agerekeeria kûmiindûkîria.
Ûra akaathaarima Isiraeri akaathaarimwa,
na ûra akaaruma Isiraeri akaarumwa!
10 Mbaraki aakûnja nkundi i mûthûûro eera Mbaraamu, “Ndaragwîtîîte ûûya kûndumîra anthû baakwa îndî woû mwanka îîndî ûkûbathaarima maita mathatû. 11 Îîndî uma aaga îthi wînûke. Ndarakwîrîîte ngakûrea îndî Mwathani akûrigîîria ûtirawata îrîi rîaku.”
12 Mbaraamu amûcookeria, “I ndeerire antû bara watûmîîte kîrî niû atî, 13 wana ûkeegua n'ûgûûmpa fetha na thaabu ira ûrî nacio nyomba yaku ya wathani, ntienda kûrega kwathîkîra maathana ma Mwathani ndûtha bûra ngwîciiria ningwa. Nkauga wa bûra Mwathani akaambîîra mbuge.” 14 Mbaraamu eera Mbaraki, “Îîndî ncookeete kîrî antû beetû. Îndî mbere nthi, gangûkaanie, kûrî bu antû ba Isiraeri bakaarûtha antû baaku kagiita kaayîîte.”
Ûroria bwa inya bwa Mbaraamu
15 Rîru Mbaraamu aanjîîria kûroria:
Îno i ntûmwa ya Mbaraamu mwana wa Mbeori,
Biugo bia muntû ûra wonaga caû,
16 ûra aûmbaga kwîgua bûra Ngai akuuga,
na akagwata ûmenyo kuuma kîrî Ngai Ûra Arî Îgûrû Mûno,
nkûnîîrîîte meetho nkwona kîrootooni,
kîoneki kuuma kîrî Ngai Mwene Inya:
17 “Ndaaraithîîria îgiita rîkaaya,
ndoona mûgongo wa Isiraeri.
Mûnene, akari ta nthata, agaûkîîra kuuma kîrî antû ba Njakubu.
Ta nthata îkûûkîîte akoonekana aumîîte Isiraeri.
Akaathiria atongoria ba Moabu.
Na athithire antû ba Sethi.
18 Endomu îgacindwa,
Seiri, anthû baake gûkaûmbwa;
Isiraeri îkaathi na mbere na kûûmbana.
19 Mûnene akauma kîrî antû ba Njakubu,
na akaathiria bara bagaatigara Iri.”
Ûroria bwa Mbaraamu bwa mûthia
20 Rîru Mbaraamu oona Aamareki kîonekiini na aroria akiugaga:
“Amareki n'uu mûgongo warî na inya nkûrûki,
îndî mûthiani ûkaathirua tene na tene.”
21 Aacooka oona Akeni kîonekiini na aroria akiugaga:
“Bantû ara bûtwîre atirî na ûgwati,
Wa ta ntara îra yaakîîte nkurungaani ya maiga;
22 Îndî biû Akeni bûkaathirua
rîra Aaramu îkaabûgwata mîgwate.”
23 Mbaraamu aaroria ûûgû:
“N'antû barîkû baba beethîranîîte mbarî ya bwa îgûrû?
24 Antû bakaithûka kuuma Kitimu;a
Bagaacinda Aaramu na Eberi,
îndî bo mûthiani bakaathira cwe.”
25 Rîru Mbaraamu eebîthîrania eenûka, n'we Mbaraki eethiîra bwake.