Aisiraeri baagonga Mbaari
25
1 Rîra antû ba Isiraeri baambire marema kîbondeeni gîa Sitimu, antû arûme i baatwire kûmaama na aka ba Moabu bara baarî oogo. 2 Aka babu i baabathookagia biathooni bia kûruta igongwana, kûra ngai ya Moabu yaagoongawa. Aisiraeri i baarîîyaga irio na bakagoonga ngai înu. 3 Kwoogu antû ba Isiraeri beeringanîra na antû bara bangî kûgonga ngai îra yetawa Mbaari ya Peori. Mwathani aathûûra i bo.4 Mwathani aaria na Musa amwîra, “Thûkia atongoria bonthe ba antû, ûbaûrage na ûbacuurie mwathûûni karî ngûgû mbere ya Mwathani na naani ntithûûra n'antû ba Isiraeri kaîrî.”
5 Musa eera atongoria ba antû ba Isiraeri, “Wa kîra ûmwe wenu akaûraga antû bonthe ba mwîrîga wake ûra atuîkîîte mûrombi wa Mbaari wa Peori.”
6 Muntû mûrûme ûmwe wa Isiraeri aaya na mûka wa kuuma Mindiani îremaani rîake. Musa na antû bonthe ba Isiraeri bakîonaga barî mwîrîgaani wa Îrema rîa Kûrîîkanaga bakîrîraga. 7 Rîra Finiasi, mwana wa Eriasari kîûyûûyû kîa Arûni ûra Mûthînjîri wa Ngai, oonire ûgu, aûkîîra auma agu antû baarî. Aathi aathûkia îtumo 8 aathingata muntû mûrûme ûyu wa Isiraeri îremaani abamunta na îtumo rîabaungurukana barî baîrî na mûka ûyu. Rîru mûthiro ûra waathiragia Isiraeri warûngama; 9 Nau warî ûkûûraga antû ngiri mîrongo îîrî na inya.
10 Mwathani aaria na Musa amwîra, 11 “N'ûntû bwa bûra Finiasi mwana wa Eriasari, mwana wa Arûni aarûtha, mûthûûro wakwa îgûrû rîa antû ba Isiraeri ûkûthira. N'aremirwe i kwinyîkîria antû bakîgoonga ngai ciingî tiga niû na ûgu i bu bûtûmire ntîîra kûthiria antû i mûthûûro. 12 Kwoogu mwîre ata rî, i nkwaiga wîrane n'we bûra bûgaatûûra. 13 We na rûrîîyo rwake bagaatûûraga barî athînjîri n'ûntû n'arwîîrîîre gîtîîyo kîa Ngai wake na aatûma ndekera antû wîyia bwa antû ba Isiraeri.”
14 Riîtwa rîa muntû mûrûme wa Isiraeri ûra aûraganîîrue na mûka Mûmindiani i Simuri mwana wa Saru, mûtongoria mûciî wa mwîrîga wa Simioni. 15 Mûka ûyu Mûmindiani eetagwa Kosibi. Aarî mwarî wa Suri ûra aarî mûtongoria ûmûnene wa mwîrîga wa beethe.