Biatho biithuure
23
1 Mwathani eera Musa ata rî, 2 “Aria na antû ba Isiraeri ûbeere, ‘Bibi i bio biatho biakwa biithuure, bira bûgaakomanaga kûngoonga.Ntugû ya Sabatû
3 “ ‘Bûkaarutaga ngûgî cienu ntugû ithanthatû, îndî ntugû ya mûgwanja i Sabatû, ntugû ya kûnogoka, i ntugû ya mûceemanio ûmûtheru. Bûtikaarute ngûgî ntugû înu, wa naara ûkeegua bûtwîre n'ûntû i Sabatû ya Mwathani.
Kîatho gîa Pasaka na kîa Mîgaate Îtarî miimbithie
4 “ ‘Bibi i biatho biitheru bira bithuurîîtwe i Mwathani. Buugagîîrie bio kaingo bikûngwagîîrwa kagiita kara kaagîrîîte. 5 Gûkûngwîra kîatho gîa *Pasaka kwambagîîria ûgoro bwa ntugû ya îkûmi na inya ya mweri wa mbere. 6 Na Kîatho kîa mîgaate îtarî na ndawa ya kwimbithia kîambagîîria ntugû ya îkûmi na itaano. Kagiitaani ga ntugû mûgwanja bûtibatîîrue kûrîa mîgaate îrî na ndawa ya kwimbithia. 7 Ntugû ya mbere bwîgue bûrî na kîûthûrano kîîtheru na bûtikaarute ngûgî nwa irîkû ira bûrutaga wa îra ntugû. 8 Kagiitaani ga ntugû mûgwanja, bûrutagîre Mwathani igongwana bia kûbîîthia na mwanki wa îra ntugû na ntugû ya mûgwanja bûrîîkane n'ûntû bwa maromba na bûtikaarute ngûgî cienu ira bûrutaga wa îra ntugû.’ ”
Kîatho kîa maciaro ma mbere
9 Mwathani eera Musa ata rî, 10 “Îra antû ba Isiraeri, ‘Rîra, bûkaathûngîra nthîgûrû îra nkaabûnenkera na bûkethe maketha meenu, bûbatîîrue bwirîra mûthînjîri wa Ngai maciaro ma mbere. 11 Rûûni rwa Sabatûa mûthînjîri wa Ngai akamaûkîîria mbere ya Mwathani kaingo matûma bwîtîgîîrîka. 12 Na ntugû wenu bakûruta kîgongwana kîa irio barutanagîrie na kîgongwana kîra kîbîîthagua gîa gatûrûme ka mwanka ûmwe gatarî nwa koothûûku. 13 Bûkaarutanagîria ko na gacuncî kamwe kuuma kîrî itaano ka ndebe ya mûtu ûmwinyu mûno ûkimanîîtue na maguta kîrî kîgongwana gîa kûbîîthua na mwanki gîa gûtûma mûcinko ûmwega gwîguîgwa i Mwathani. Amwe na bibu bûrutage rita îmwe ya ndibei kîrî kîewa kîa biakûnyua. 14 Bûtikaarîe mîgaate kana sayiiri îmbîthî kana înkarange ya maketha meenu mwanka ntugû îra bûkaaretera Mwathani kîgongwana kîa maciaro ma mbere. Watho bûbû i bwa kûthingatagwa i nciarwa cienu cionthe wa naara ûkeegua bûtwîre.
Kîatho kîa Biumia
15 “ ‘Kuuma rûûni rwa ntugû ya Sabatû îra bwareetire maketha meenu kîrî kîegwa gîa gûûkîîrua bûgaatara biumia mûgwanja. 16 Ntugû ya mîrongo îtaano, taru rûûni rwa Sabatû ya mûgwanja, bwirîre Mwathani kîegwa kîa maketha ma irio biiyerû. 17 Woora mûciî ûkaaruta mîgaate îîrî bamînenkanîre kîrî Mwathani îrî kîewa kîa mwanya. Mîgaate înu îkeegua îrugîîtwe na gacuncî kamwe ga itaano ka ndebe ya mûtu ûmwinyu mûno ûrugîîtwe na ndawa ya kwimbithia na ûkaanenkanagîrwa kîrî Mwathani ta kîgongwana gîa gûûkîîrua mbere ya Mwathani kîa maciaro ma mbere. 18 Amwe na mîgaate antû bakaareeta tûtûrûme mûgwanja twa ûkûrû bwa mwanka ûmwe, ncamba îmwe ya kiumîri na ntûrûme ciîrî. Nyamû inu cionthe itikeegue irî nwa koothûûku. Nyamû inu i cia kîgongwana kîra kîbîîthagua, nacio ikaarutanîrua na kîegwa kîa irio na kîa ndibei kîrî kîgongwana gîa kûbîîthua na mwanki gîa gûtûma mûcinko ûmwega ûkenia Mwathani. 19 Îgûrû ya bibu bûrute nthenge îmwe îrî ya kîgongwana n'ûntû bwa wîyia na tûtûrûme twa mwanka ûmwe twîrî tûrî twa kîgongwana kîa ngwatanîro. 20 Mûthînjîri wa Ngai akaaruta mîgaate îrugîîtwe na maciaro ma mbere amwe na ntûrûme inu ciîrî kîrî kîegwa gîa gûûkîîria mbere ya Mwathani bia kûnenkerwa athînjîri ba Ngai. Biegwa bibi i biitheru. 21 Ntugû înu bûtikaarute ngûgî cienu cia wa îra ntugû, buugîîrie mûcemanio ûmûtheru. Nciarwa cienu i kaathingataga watho bûbû wa naara bakeegua batwîre magiita monthe.
22 “ ‘Rîra bûgûketha mînda yenu bûtigaakethage nteereeni cia mûnda na bûtikaaringage rûûa, tigaragîriani nkea na ageni kaingo booyaga matigari mamu. Mwathani i Ngai wenu.’ ”
Kîatho kîa Mwanka Ûmûyerû
23 Mwathani aathi na mbere kwîra Musa, 24 “Îra antû ba Isiraeri ûûgû, ‘Ntugû ya mbere ya mweri wa mûgwanja bûbatîîrue bûnogoka na bwîgua bûrî na mûceemanio ûmûtheru wa mûririkanab ûra ûkaugîîrua na njîra ya kûringa rûgoci. 25 Bûrutîre Mwathani kîgongwana gîa kûbîîthua na mwanki na bûtikaarute ngûgî ntugû înu.’ ”
Ntugû ya kûthambua meeyia
26 Mwathani aaria na Musa amwîra ata rî, 27 “Ntugû ya îkûmi ya mweri wa mûgwanja woora mwanka n'yo ntugû ya kûthambia antû meeyia maao. Ntugû înu bûtikaarîe nwa mbi, bûrîîkane amwe bûrombe na bûrute kîgongwana gîa kûbîîthua na mwanki kîrî Mwathani. 28 Bûtikaarute ngûgî ntugû înu n'ûntû i ntugû ya kûbûthambia meeyia, kaingo bûthera mbere yakwa, niû Mwathani Ngai wenu. 29 Muntû ûra akaarega gûtîîrîra kûrîa irio ntugû înu akaarutarutwa kuuma kîrî antû baao. 30 Niigû ningwa i niû nkaûraga muntû ûra akaaruta ngûgî ntugû înu. 31 Bûtikaarute ngûgî nwa aniini. Watho bûbû i bwa kûthingatagwa i nciarwa cienu wa ara onthe bagaatûûra. 32 Kuuma riûa rîkîthûa ntugû ya kenda ya mweri ûyu mwanka riûa rîkîthûa ntugû ya îkûmi bûthûkie ntugû înu îrî Sabatû yaku ya kûnogoka na bûtikaarîe gîntû nwa kîrîkû.”
Kîatho gîa tûganda
33 Mwathani aaria na Musa amwîra ata rî, 34 “Îra antû ba Isiraeri ûûgû, ‘Kîatho gîa tûganda gîkaanjagîîria ntugû ya îkûmi na itaano ya mweri wa mûgwanja na gîkathira nyuma ya ntugû mûgwanja. 35 Ntugû ya mbere n'ya mûceemanio ûmûtheru na bûtibatîîrue kûruta ngûgî cienu cia wa kîra ntugû. 36 Gwa kagiita ga ntugû inu mûgwanja, wa îra ntugû bûkaarutaga kîgongwana gîa kûbîîthua na mwanki. Ntugû ya inyanya bwîgue bûrî na mûceemanio ûmûtheru na bûrute kîgongwana kîra kîbîîthagua na mwanki kîrî Mwathani. Ntugû înu i ntugû ya mûceemanio ûmûtheru na bûtibatîîrue bûruta ngûgî cienu cia wa kîra ntugû.
37 (“ ‘Biatho bibi i bio Mwathani athuurîîte kaingo bwîgagua bûrî na mûceemanio ûmûtheru wa kûrutîra Mwathani igongwana bia kûbîîthua na mwanki. Na bio ni igongwana bira bibîîthagua, igongwana bia irio, igongwana bia nyamû na biewa biakûnyua bira bibatîîrue wa kîra kîewa na ntugû îra kîbatîîrue. 38 Igongwana bibi bikaarutagwa amwe na igongwana bira birutagwa biathooni bia Sabatû cia Mwathani amwe na biegwa bira bûrutagîra Mwathani bia kwîbendera na bia kûûyûria mûthiîtio.)
39 “ ‘Bwarîîkia gûtua matunda kuuma mîndaani yenu kûngwagîîraani kîatho gîkî kagiita ga ntugû mûgwanja, kwanjîîria ntugû ya îkûmi na itaano ya mweri wa mûgwanja. Ntugû ya mbere na ntugû ya inyanya ikeegua irî ntugû cia mwanya cia kûnogoka. 40 Ntugû înu ya mbere bûtue matunda mara mathongi mûno kuuma mîtîîni na buune mpong'i cia mîkîîndû na cia mîtî îîngî îra îrî matî maingîc rîru bwanjîîrie gûkûngwîra mbere ya Mwathani Ngai wenu kagiita ga ntugû mûgwanja. 41 Bûgîkûngwîre kîrî kîatho kîa Mwathani gwa kagiita ga ntugû mûgwanja mweriini wa mûgwanja woora mwanka. Bûbû i watho bwa kûthingatagwa i nciarwa cienu magiita monthe. 42 Antû bonthe ba Isiraeri bagaatûûraga tûgandaani tûtu gwa kagiita ga ntugû mûgwanja, 43 kaingo nciarwa cienu ikaamenya bûra ndaatûmire antû ba Isiraeri batûûra tûgandaani rîra ndaabarutire Miisiri. I niû Mwathani Ngai wenu.’ ”
44 Kwoogu, Musa aamenyithia antû ba Isiraeri biatho bira bithuure bia Mwathani.