Bûra igongwana biitheru bibatîîrue bitûmîrwa
22
1 Mwathani eera Musa, 2 “Îra Arûni na nthaka ciake atarî, ‘Bûtigeekîre riîtwa rîakwa rîîtheru îgi, na njîra ya kûrega gûtîîya igongwana biitheru bira antû ba Isiraeri bakûndutîra. I niû Mwathani.’3 “Beere atarî, ‘Muntû kinya ûrîkû wa nciarwa cienu akaaya kûûya akubî na igongwana biitheru bira antû ba Isiraeri bakûndutîra rîra arî na mûgiro, muntû ûyu atikaaro aruta igongwana kîthînjîrooni kaîrî. Bûbu i watho bwa kûthingatagwa magiita monthe. I niû Mwathani.
4 “ ‘Gûtikaagîte muntû wa nciarwa cia Arûni ûra arî na mûtigiri kana akûrua nthakame abatîîrue kûrîa kuumania na kîgongwana kîîtheru mwanka rîra mûgiro ûkaathira. Mûthînjîri wa Ngai akaagwatwa i mûgiro akaaya gûtongithia gîntû kîrî na mûgiro gûkûrûkîîra kûringithia kiimba kana akaaya kwîgua eetûûrîîte mbeû yake, 5 kana akaaya gûtongithia nyamû îîkururagia na nthî îra yûûmba kûmûgwatithia mûgiro kana agatongithia muntû akamûgwatithia mûgiro woora ûkeegua ûrî. 6 Mûthînjîri wa Ngai ûra arî na mûgiro agaakara arî nau mwanka ûgoro bwa ntugû înu, îndî wanarîo atiûmba kûrîa into bira biumanîîtie na kîgongwana kîîtheru mwanka rîra akaathamba. 7 Riûa rîarîîkia kûthûa rîru akeegua arî ûmûtheru, na nwa arîe into kuumania na kîgongwana kîîtheru n'ûntû bibu n'irio biake. 8 Atibatîîrue arîa nyama cia nyamû îra îkuîte yongwa kana cia nyamû îra yûûragîîtwe i nyamû ya kîthaka aaya kwîgwatithia mûgiro n'yo. I niû Mwathani. 9 Athînjîri ba Ngai bonthe nwa mwanka bathingate mawatho mara neenkanîrîîte. Baarega kûmathingata i bakaabîtia na bagaakua n'ûntû bakûrega kwathîkîra mawatho maatheru. I niû Mwathani na I niû mbatheragia.
10 “ ‘Gûtirî muntû atarî wa mûciî wa mûthînjîri wa Ngai abatîîrue kûrîa kuumania na igongwana biitheru, wana kinya ûkeegua i mûgeni ûra akaraga kwa mûthînjîri wa Ngai kana mûruti ngûgî wake. 11 Îndî nkombo ya mûthînjîri wa Ngai wîgue n'ya kûgûra na mbia ciake kana ya gûciarîrwa gwake mûciî, înu nwa îrîe irio bira mûthînjîri wa Ngai anenkagîrwa. 12 Mwarî wa mûthînjîri wa Ngai ûra agûragwa i muntû atarî mûthînjîri wa Ngai atibatîîrue kûrîa kuumania na igongwana biitheru. 13 Îndî mwarî ûyu akeegua arî ntigwa kana ncooki îtarî na twana na acookeete agakaraga mûciî kwa îthe akîreragîrwa oogo wa ta bûra aareragwa arî mwana, ûyu nwa arîe irio bira îthe aneenkagîrwa ta mûthînjîri wa Ngai. Gûtirî mûgeni abatîîrue kûrîa irio bibu bitheru.
14 “ ‘Muntû atarî wa mûciî wa mûthînjîri wa Ngai akaaya kûrîa kuumania na igongwana biitheru atakûmenya abatîîrue area mûthînjîri wa Ngai into bibu arîîre bionthe na oongeere gacuncî ga itaano ga into bibu arîîre. 15 Athînjîri batibatîîrue bagwatithia igongwana biitheru bira antû ba Isiraeri bareetagîra Mwathani mûgiro 16 barekeeretie birîîyagwa n'antû batarî na rûûtha rwa kûbirîa. Antû bara bateetîgîîrîtue kûbirîa bakaaya kûbirîa bakaabîtia na bagaakaanûkua. I niû Mwathani na i niû ntûmaga athînjîri beegua barî batheru.’ ”
Igongwana bira biîtîgîîrie na bira bitarî biîtîgîîrie
17 Mwathani aathi na mbere kwaria na Musa amwîra ata rî, 18 “Aria na Arûni na nthaka ciake na antû bonthe ba Isiraeri ûbeere ata rî, ‘Rîra Mûisiraeri kana mûgeni ûra atwîre Isiraeri akûruta kîgongwana kîra kîbîîthagua, wîgue i ka aathiîtiirie akaaruta kana wîgue arîruta na kwîbendera wake, 19 nwa mwanka îîgue îrî ndûme îtarî nwa koothûûku kuuma ng'ombeeni, ng'onduuni kana mbûriini ciake kaingo igaatûma bwîtîgîîrîka. 20 Ûtikaarute nyamû îrî na koothûûku, n'ûntû îgaatûma bûrega gwîtîgîîrîka.
21 “ ‘Muntû akaaya kûrutîra Mwathani kîgongwana kîa ngwatanîro kuuma nyamûûni ciake cia ndîîthia, wîgue i ka aathiîtîîtie akaaruta kana arîruta na kwîbendera, nwa mwanka arute nyamû îtarî na koothûûku kaingo îîtîgîîrîka. 22 Bûtikaarutîre Mwathani nyamû îtakwona, kana îmbonju kana îkûthua kana îrî na maronda, kana îrî na mwimba kana îrî na mûng'ûrû. Bûtikaarute nyamû ta înu kîthînjîrooni kîrî kîgongwana gîa kûbîîthia na mwanki. 23 Îndî kûrî kîgongwana gîa kwîbendera nwa arute karemera nthî kana nyamû îtarî na gîcuncî kîmwe kîa mwîrî. Îndî nyamû ta înu îtiîtîgîîrîka îrî ya kûûyûria mûthiîtio. 24 Bûtikaarutîre Mwathani nyamû îînkabe kana îra mîrigi yaayo îrî mîgiite kana îrî na kîronda kana îrî mîtembûku. Kîgongwana ta gîku gîtiîtîgîîrîîtue nthîgûrû yenu. 25 Bûtikaarute nyamû ta înu kinya îreteetwe i mûgeni kîrî kîgongwana kîrî Mwathani birî biakûrîa. Nyamû ta inu itiitûma bwîtîgîîrîka n'ûntû irî na ûthûûku.’ ”
26 Mwathani aaria na Musa amwîra ata rî, 27 “Rîra kayaû, kabûri kana kagondu gaaciarwa kabatîîrue gakara na gina kagiita ga ntugû mûgwanja. Îndî kuuma ntugû ya inyanya nwa karutwe kîrî kîgongwana gîa kûbîîthia na mwanki. 28 Bûtikaarute kîgongwana kîa nyamû na kaana kaayo ntugû îmwe.
29 “Rîra ûkûruta kîgongwana kîa ngwatanîro kîrî Mwathani, kîrute na njîra îra îgaatûma wîtîgîîrîka. 30 Kîgongwana gîku kîbatîîrue kîrîîgwa ntugû wenu na ûtigaagîtigarie mwanka rûûni. I niû Mwathani. 31 Menyagîîraani maathana maakwa na bûmaathîkîre, I niû Mwathani. 32 Bûtigeekîre riîtwa rîakwa rîîtheru îgi. Antû ba Isiraeri bonthe i babatîîrue bantîîya n'ûntû ndî ûmûtheru. I niû Mwathani na i niû mbûtheragia. 33 I niû ndaabûrutire Miisiri kaingo ntuîka Ngai wenu. I niû Mwathani.”