Mawatho ma mûtûûrîre wa mûthînjîri wa Ngai
21
1 Mwathani aathi mbere kwîra Musa, “Mawatho mama i ma nciarwa cia Arûni cia antû arûme, athînjîri ba Ngai. Beerwe ata rî, ‘Gûtikaagîte nwa ûmwe wa cienu akeegwatithia mûgiro na njîra ya gûtonga biimba bia antû baao 2 tatiga arî wa mûciî ndeeni ta, îthe, gina, nthaka yake, mwarî wake, mûruagina 3 kana mwaragina ûra atarî mûgûre arî mûciî kwao ûra eegwetie we n'ûntû atirî na mûrûme, n'ûntû bwake wana we nwa egwatithie mûgiro. 4 We ta arî mûtongoria wa antû baao atibatîîrue eegwatithia mûgiro.a5 “ ‘Gûtikaagîte mûthînjîri wa Ngai akeenja kîrea kana eenja nteere cia kîreru gîake kana eetemanga mwîrî kwonania atî arî na kîeba gîa gûkuîrwa. 6 Nwa mwanka eegue arî ûmûtheru mbere ya Ngai na atikaire riîtwa rîakwa îgi. Nwa mwanka eegue arî ûmûtheru, na aandutagîra kîgongwana kîa irio gîa kûbîîthua na mwanki. 7 Mûthînjîri wa Ngai atibatîîrue agûra mûka ûra aarî îrwaya kana mwarî aaro amaama na muntû mûrûme kana ncooki, n'ûmûtheru. 8 Bûbatîîrue kûthûkia athînjîri ba Ngai ta antû baathûre, n'ûntû i bandutagîra igongwana bia irio. Bathûkieni barî baatheru n'ûntû niû Mwathani ndî ûmûtheru, na i niû mbûtheragia. 9 Mwarî wa mûthînjîri wa Ngai akeegwatithia mûgiro na njîra ya gûtuîka îrwaya, gaakwira îthe îgi; abatîîrue abîîthua na mwanki akua.
10 “ ‘Mûthînjîri ûra mûnene wa Ngai, ûra aûkîîrîîtue îgûrû rîa athînjîri bara bangî na eetûûrîrua maguta kîongo na aathûrwa kaingo eekagîra nguo cia ûthînjîri, atibatîîrue atiga ntundu ciake icuurib kana atembûranga nguo ciake akîonania kîeba gîa gûkuîrwa. 11 Atibatîîrue akinya akubî na kiimba kîa muntû, atibatîîrue kwîgwatithia mûgiro wana kinya ûkeegua n'ûntû bwa kiimba kîa îthe kana gina. 12 Atibatîîrue arega gûtîîya Îrema rîa Kûrîîkanaga na njîra ya kuumagarûka athi mathikooni n'ûntû we naathûrîîtwe na eetûûrîrua maguta ma Ngai wake. I niû Mwathani. 13 Abatîîrue agûra mwarî ataamaama na muntû mûrûme 14 na ti mûk'wantigwa kana ncooki kana mûka warî îrwaya. Abatîîrue agûra mwarî ataamaama na muntû mûrûme wa mwîrîga wao. 15 Wegua tûûgu, aana baake, bara babatîîrue kwîgua barî baatheru bakeegua batiîgua bagîîtîgîîrîka gûntûmîkîra ta athînjîri ba Ngai. I niû Mwathani na i niû mwathûrîîte.’ ”
16 Mwathani aathi na mbere kwîra Musa, 17 “Îra Arûni ata rî, ‘Gûtikaagîte nwa ûmwe wa nciarwa ciake ûra arî na wonje bwa mwîrî akaandutîra kîgongwana kîa irio magiita monthe. 18 Gûtikaagîte muntû ûrî na wonje bwa mwîrî akaathi akubî na kîthînjîro aruta kîgongwana, wîgue i ka arî ntûngi kana akûthua, kana aagîîte gîcuncî kîa mwîrî kana oongeerekeete gîcuncî kîa mwîrî, 19 kana ûmwonju kûgûrû kana njara 20 kana arî na îguku kana ntûûrûûbû kana arî ngaya kana arî na mûtigiri kana ûmûthûûku mîrigi. 21 Gûtikaagîte muntû nwa ûmwe wa nciarwa cia Arûni ûra arî na wonje bwa mwîrî akaanthengeera aandutîra kîgongwana gîa kûbîîthia. 22 Îndî muntû ta ûyu nwa arîe irio bira ndutîrîîtwe. Nwa arîe irio bia kîgongwana kîra kîrutîrîîtwe Ngai wake, na gîku i gîcuncî kîîtheru mûno gîa kîgongwana. 23 Îndî n'ûntû arî na wonje bwa mwîrî atibatîîrue athi akubî na gîtambaa kîra kîtheru gîa kûgaania kana athengeera kîthînjîro. Atikaarege gûtîîya into bibu bitheru, n'ûntû i niû Mwathani na i niû ntûmaga bathera.’ ”
24 Kwoogu Musa eera Arûni na nthaka ciake na antû bonthe ba Isiraeri mantû mama.